သျှမ်းပြည်မြောက်ပိုင်း မူဆယ်၊ နမ့်ခမ်းမြို့နယ်အတွင်း တိုင်းရင်းသားလက်နက်ကိုင်တပ်ဖွဲ့ အမည်ခံပြီး ပြည်သူများထံ ဖုန်းဆက်အကြောင်းကြားကာ ဆက်ကြေးတောင်းခံနေကြောင်း စုံစမ်းသိရှိရသည်။

ဇန်နဝါရီလပိုင်းက စတင်ပြီး SSPP နှင့် TNLA တို့တပ်ဖွဲ့ ကို အမည်ခံကာ ဖုန်းဆိုင်များ၊ ရွှေဆိုင်များကို ငွေတောင်းပြီး Kpay သို့မဟုတ် wave money မှ တဆင့် ငွေလွှဲပေးရန် ဖုန်းဆက်အကြောင်းကြားခဲ့ကြောင်း နမ့်ခမ်းဒေသခံများက ပြောဆိုကြသည်။

“တစ်ခါတလေ SSPP အဖွဲ့လို့ပြောတယ်။ တစ်ခါတလေ TNLA အဖွဲ့လို့ ပြောတယ်။ ပြီးခဲ့တဲ့ရက်ပိုင်းမှာပဲ မူဆယ်က အသိတစ်ယောက် သိန်း (၃၀) ပေးရတယ်။ နမ့်ခမ်းမှာက (၅) သိန်း၊ ထပ်တစ်ယောက် ကျန်သေးတယ်။ သူတော့ မပေးလိုက်ရသေးဘူး” လို့ နမ့်ခမ်းဒေသခံ အမည်မဖော်လိုသူ တစ်ဦးက ပြောသည်။

မူဆယ်၊ နမ့်ခမ်းတွင် တိုင်းရင်းသားလက်နက်ကိုင်များစွာရှိပြီး ထိုအဖွဲ့များကို နှစ်စဉ်နှစ်တိုင်း ဆက်ကြေးပေးရပြီး လုပ်ငန်းကြီးပါက ငွေပမာဏ များစွာ ပေးရကြောင်း စုံစမ်းသိရှိရသည်။

“ဖုန်းဆက်အကြောင်းကြားတာက ဗမာလိုပြောတယ်။ ရှမ်းလိုလဲပြောတယ်။ ဘယ်အဖွဲ့လဲလို့ မေးရင် သိစရာမလိုဘူးလို့ ပြန်ပြောတာရှိတယ်” လို့ နမ့်ခမ်းဒေသခံ တစ်ဦးက ပြောသည်။

ထို တပ်ဖွဲ့အမည်ခံ ငွေကြေးလိမ်လည်တောင်းဆိုသည့်သူကို နေရပ်လိပ်စာ၊ အမည် အပြည့်အစုံ သိရှိထားပြီး ၎င်းကို လိုက်လံ ရှာဖွေနေကြောင်း SSPP ပြောရေးဆိုခွင့်ရှိသူ ဗိုလ်မှူးကြီး စိုင်းဆု က သျှမ်းသံတော်ဆင့် ကို ပြောသည်။

“ပြီးခဲ့တဲ့ ၂ နှစ် ၃ နှစ်ကလည်း ဒီလို ပြသာနာရှိခဲ့ဖူးတယ်။ ကျနော်တို့ တပ်ဖွဲ့မှာက တစ်နှစ်တစ်ကြိမ် ကောက်တာရှိတယ်။ ကောက်ရင်လည်း ကျနော်တို့ တံဆိပ်ပါရှိထားပြီးသားပဲ။ ဖုန်းဆက်ပြီး ငွေလွှဲပေးဖို့တော့ ပေါ်လစီ မရှိထားဘူး” ဟု ဗိုလ်မှူးကြီး စိုင်းဆု က ပြောသည်။

ယခုလို ဖုန်းဆက်ပြီး ငွေကြေးလိမ်လည်တောင်းဆိုခြင်းသည် မူဆယ်၊ နမ့်ခမ်းအပြင် သီပေါ၊ ကျောက်မဲ၊ နောင်ချို တို့တွင်လည်းရှိကြောင်း ၎င်းက ထပ်မံပြောဆိုသည်။

“ဖုန်းနဲ့ ငွေကြေးလိမ်လည်တောင်းဆိုတဲ့သူတွေဟာ ဘယ်အဖွဲ့မှ မဟုတ်ဘူး။ အဝေးမှာနေပြီး ဖုန်းဆက် ခြိမ်းခြောက်တာပါ။ သူတို့ကို မယုံကြည်ဖို့၊ မလွှဲပေးဖို့။ တကယ်လို့ ထပ်ပြီး ဖုန်းဆက်အကြောင်းကြားလာရင် ကျနော်တို့ကို အကြောင်းကြားလာပေးပါ။ ကျနော်တို့ဘက်လည်း သူတို့ကို လိုက်ရှာနေတယ်” လို့ ဗိုလ်မှူးကြီး စိုင်းဆု က ပြောသည်။

ယခုလို ဖြစ်စဉ်မျိုး ပြီးခဲ့သည့် နှစ်ကလည်း နမ့်ခမ်းမြို့ ရှိ ရွှေဆိုင် တစ်ဆိုင်မှ သိန်း (၃၀) လွှဲပေးခဲ့ရကြောင်း သိရှိရသည်။