သျှမ်းပြည်တောင်ပိုင်း မိုင်းကိုင်မြို့နယ် ပန်ကေတုကျေးရွာအုပ်စု၊ မောင်လျန်ကျေးရွာမှ ဒေသခံ အမျိုးသမီးတစ်ဦး ကျောင်းကာရံရန်အတွက် ဝါးသွားခုတ်စဉ် မိုင်းနင်းမိခဲ့ပြီး ဆေးကုသရန် ခက်ခဲနေကြောင်း စုံစမ်းသိရှိရသည်။
ဖြစ်စဉ်မှာ ဇန်နဝါရီ (၁၇)ရက် နေ့လည် ၂ နာရီခွဲဝန်းကျင်တွင် ဝါးသွားခုတ်စဉ် မိုင်းနင်းမိခဲ့သောကြောင့် ခြေထောက်တွင် ပြင်းထန်ဒဏ်ရာ ရရှိခဲ့ကြောင်း သိရသည်။
“သူက ကျောင်းကာရံဖို့ အတွက် ဝါးသွားခုတ်တာ။ မနက်ကတည်းက သွားတာ။ နေ့လည်ပိုင်းလောက်မှာ မိုင်းနင်းမိတာ။ မိုင်းနင်းမိတော့ ခြေထောက်တွေမှာ ဒဏ်ရာရသွားတာ။ ကျန်းမာရေးအခြေနေတော့ ပြင်းထန်တယ်။ အခုတော့ လွိုင်လင်ဆေးရုံကို ပို့ထားပေးပြီ” ဟု မိုင်းကိုင်မြို့ စစ်ရှောင်များကို ကူညီပေးနေသည့် ပရဟိတအဖွဲ့ဝင် အမျိုးသားတစ်ဦးက ပြောသည်။
ထိုအမျိုးသမီးသည် လက်ရှိ လွိုင်လင်ဆေးရုံတွင် ရောက်ရှိနေပြီး ခြေထောက်ကို စတီးထည့် ကုသရန်အတွက် ဆေးဖိုး အခက်ခဲများစွာရှိနေကြောင်း သိရသည်။
“ခြေထောက်က စတီးထည့်ရမယ်လို့ ဆရာဝန်တွေကတော့ ပြောတယ်။ ကျနော်တို့လည်း တတ်နိုင်သလောက် ကူညီပေးထားတယ်။ သူတို့ကလည်း အဆင်ပြေတဲ့ မိသားစုမဟုတ်ဘူး။ ဆေးကုသဖို့ ပိုက်ဆံလည်း ၁ သောင်းဘဲ ရှိတယ်တဲ့။ အခု ဆေးကုသဖို့တော့ အခက်ခဲတွေ ရှိနေပါတယ်” ဟု အထက်ပါ အမျိုးသားတစ်ဦးက ပြောသည်။
မိုင်းကိုင်မြို့နယ်တွင် သျှမ်းပြည် ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA) နှင့် သျှမ်းပြည်တိုးတက်ရေးပါတီ၊ သျှမ်းပြည်တပ်မတော် (SSPP/SSA) တို့ တိုက်ပွဲ ပြင်းထန်နေသည့်နေရာဖြစ်ပြီး ဒေသခံ(၃၀၀၀) နီးပါး ထွက်ပြေးတိမ်းရှောင်နေရကြောင်း သိရသည်။
ထိုတိုင်းရင်းသားလက်နက်ကိုင်အချင်းချင်းဖြစ်ပွားသည့်တိုက်ပွဲကြောင့် အရပ်သား ၅ ဦးထက်မနည်း မြေမြုပ်မိုင်း နင်းမိခဲ့ကြောင်း သိရသည်။
Leave a Comments