သျှမ်းပြည်ဘက်ခြမ်းပြန်၀င်ရန်အတွက် ထိုင်း-မြန်မာနယ်စပ်  မယ်ဆိုင်တွင် ရွှေ့ပြောင်းအလုပ်သမား ၁၀၀ ကျော်ရှိနေကြောင်း သိရသည်။

၄င်းရွှေ့ပြောင်းအလုပ်သမားများအား ထိုင်းနိုင်ငံဘက်မှအာဏာပိုင်များက  တာချီလိတ်သို့ပြန်ပို့ရန်အတွက် စီစဉ်နေဆဲဖြစ်ကြောင်း ပြန်ပို့မည့်ရက်မသိရသေးကြောင်း ကူညီသယ်ယူပို့ဆောင်ပေးရာတွင် ပါ၀င်သည့် တာချီလိတ်လူငယ်  တဉီးက သျှမ်းသံတော်ဆင့်အားပြောသည်။

“ထိုင်းဘက်ခြမ်းမှာ တာချီလိတ်ကိုပြန်ပို့ဖို့ မြန်မာနိုင်ငံသား ၁၀၀ ကျော်စုထားတယ်လို့သိရတယ်။ ဘယ်နေ့ပြန်ပို့မလဲဆိုတာ စောင့်ကြည့်နေပါတယ်။  ကျနော်တို့ဆီမှာရောက်နေတဲ့ ထိုင်းနိုင်ငံသားတွေကိုတော့ တပတ် ၃ ကြိမ် မှန်မှန်ပို့ပေးဖို့ ထိုင်းဘက်ကတောင်းဆိုထားတယ်။ ဆိုတော့ တနင်္လာ ဗုဒ္ဓဟူးနဲ့သောကြာနေ့တိုင်း ရှိသလောက် ပို့ပေးတယ်။ ” –   အဆိုပါလူငယ်ကပြောသည်။

တာချီလိတ်-မယ်ဆိုင်ကြား ထိုင်း-မြန်မာ နယ်စပ်ဂိတ်များ အား ဧပြီလကတည်းက ပိတ်ပြီးနောက်ပိုင်း ၂ နိုင်ငံဘက်ခြမ်းရှိ နေရပ်ပြန်မည့်သူများအား ၂ နိုင်ငံအာဏာပိုင်များ ဆက်သွယ်ညှိနှိုင်းကာ စစ်ဆေးမှုပြုပြီး ပို့ပေးခဲ့သည်ဟုသိရသည်။

သို့သော် ထိုင်းဘက်ခြမ်းကမူ ထိုင်းအာဏာပိုင်များက နေရပ်ပြန်မည့်မြန်မာနိုင်ငံသားများအား ပုံမှန်ပို့ပေးခြင်းမရှိဘဲ သတ်မှတ်လူဉီးရေပြည့်မှသာ မြန်မာဘက်ခြမ်းရှိ အာဏာပိုင်များနှင့်ဆက်သွယ်ကာပို့ပေးခဲ့သည်ဟုလည်း ကူညီရေးအဖွဲ့မှပြောပြချက်အရသိရသည်။

ဒီဇင်ဘာလ  ၂ ရက် ယနေ့မနက်ပိုင်း ၁၀ နာရီကလည်း တာချီလိတ်ဘက်ခြမ်းရောက်ရှိပိတ်မိနေသော ထိုင်းနိုင်ငံသား ၃၁ ဉီးနှင့် သံဃာတော် ၄ ပါးတို့အား    တာချီလိတ်မြို့အမှတ် ( ၂ ) ချစ်ကြည်ရေတံတား မှတဆင့် လဝက ဌာနခွဲ (၆) မှ လက်ထောက်ညွှန်ကြားရေးမှူး ဦးမောင်မောင်မြင့်ဦးစီးနှင့် ထိုင်းနိုင်ငံရောက်မြန်မာနိုင်ငံသားများအားကူညီစောင့်ရှောက်ရေးနှင့်စေ့စပ်ညှိနှိုင်းရေးကော်မတီ  CNCMC အဖွဲ့တို့က ထိုင်းနိုင်ငံနယ်စပ်ဂိတ်ရှိတာ၀န်ရှိသူများထံသွားရောက်အပ်နှံပေးခဲ့ကြောင်း သိရသည်။

“ဒီတပတ်အတွင်းမှာဘဲ ထိုင်းဘက်ခြမ်းကိုကျနော်တို့ပို့ရတာ ၅၀ လောက်ရှိပါပြီ ”- ဟု လူငယ်ကပြောသည်။

နို၀င်ဘာ ၂၅ ရက်နေ့စကပြီးယနေ့အထိ တပတ်အတွင်း တာချီလိတ်မြို့နယ်တွင် ကိုဗစ်နိုင်တင်း ကူးစက်ခံရသူ ၇၀ နီးပါးရှိလာပြီးနောက် တာချီလိတ်ဘက်ခြမ်းရောက် ထိုင်းနိုင်ငံသားများ နေရပ်အသီးသီးပြန်ကြခြင်းဖြစ်သည်။  လက်ရှိသျှမ်းပြည်နယ်အတွင်း ကိုဗစ်နိုင်တင်းပိုးကူးစက်ခံရသူ ၄၃၈ ဉီးရှိပြီဖြစ်ကြောင်းသိရသည်။