ထိုင်းနိုင်ငံ ချင်းမိုင်မြို့ Chang Klan လမ်းရှိ နာမည်ကြီး အဆင့်မြင့်ဟိုတယ်တစ်ခုကို ချင်းမိုင်မြို့ လူဝင်မှုကြီးကြပ်ရေးနှင့် ရဲတပ်ဖွဲ့များက ဝင်ရောက်စီးနင်းခဲ့ရာ ထိုင်းအမျိုးသမီး ၁ ဦးနှင့် တရုတ်နိုင်ငံသား ၂ ဦးကို ဖမ်းဆီးရမိကြောင်း Chiang Mai News က ဇန်နဝါရီလ ၁၆ ရက်တွင် ဖော်ပြသည်။

ချင်းမိုင်မြို့ လူဝင်မှုကြီးကြပ်ရေးနှင့် ရဲတပ်ဖွဲ့သည် ချင်းမိုင်ခရိုင် တရားရုံး၏ ရှာဖွေဝရမ်းဖြင့် ချင်းမိုင်မြို့ Chang Klan လမ်းရှိ နာမည်ကြီး အဆင့်မြင့်ဟိုတယ်တစ်ခုကို ဝင်ရောက်စီးနင်း ရှာဖွေခဲ့ခြင်းဖြစ်ကြောင်း ဆိုသည်။

အဆိုပါဟိုတယ်တွင် တရုတ်စီးပွားရေးသမားများက ထိုင်းလူမျိုးကို နာမည်ခံအဖြစ်အသုံးပြုကာ ဖွင့်လှစ်ထားကြောင်း အထောက်အထားများ တွေ့ရှိရပြီးနောက် မစ္စတာမာ (Mr.Ma) နှင့် မစ္စတာမီ (Mr.Mi) အမည်ရှိ တရုတ်နိုင်ငံသား ၂ ဦးကို ဖမ်းဆီးခဲ့ကြောင်း Chiang Mai News က ဖော်ပြထားသည်။

ထို့အပြင် ကုမ္ပဏီ၏ ဒါရိုက်တာအဖြစ် နာမည်ခံပေးထားသည့် ထိုင်းအမျိုးသမီးမဂျင် (အမည်လွှဲ) ကိုလည်း ဟိုတယ် အစည်းအဝေးခန်းမအတွင်း ထပ်မံဖမ်းဆီးရမိခဲ့ကြောင်း သိရသည်။

၂၀၂၅ နှစ်လယ်ပိုင်းကတည်းက စုံစမ်းစစ်ဆေးမှုအရ ထိုင်းအမျိုးသမီး မဂျင်သည် ဒါရိုက်တာနှင့် အစုရှယ်ယာရှင်အဖြစ် အမည်ခံထားပြီး၊ မစ္စတာမာနှင့် မစ္စတာမီတို့က အမှန်တကယ် ရှယ်ယာရှင်များအဖြစ် Chang Klan လမ်းရှိ နာမည်ကြီး အဆင့်မြင့်ဟိုတယ်ကို ငှားရမ်းလုပ်ကိုင်နေခြင်း ဖြစ်ကြောင်း သိရှိခဲ့ရသည်ဟု ဆိုသည်။

ဖမ်းဆီးခံရသည့် တရုတ်နိုင်ငံသား ၂ ဦးမှာလည်း အလုပ်လုပ်ကိုင်ခွင့် (Work Permit) လက်မှတ် မရှိသကဲ့သို့ ဟိုတယ်လုပ်ငန်း လိုင်စင်မရှိဘဲ လုပ်ကိုင်နေကြောင်း သိရသည်။

အလားတူ တရုတ်နိုင်ငံသားများသည် ဗီဇာကင်းလွတ်ခွင့်ဖြင့် ထိုင်းနိုင်ငံအတွင်းသို့ ဝင်ရောက်လာသူများ ဖြစ်သော်လည်း လက်တွေ့တွင် တရားမဝင် စီးပွားရေးလုပ်ငန်များ လုပ်ကိုင်နေခြင်း ဖြစ်ကြောင်း ရဲမှူးချုပ်က ပြောကြားခဲ့သည်။

၎င်းတို့သည် ဟိုတယ်ငှားရမ်းခအတွက် ဘတ် ၃ သန်းကျော် လွှဲပြောင်းထားသည့် ငွေကြေးလမ်းကြောင်း အထောက်အထားများရှိပြီး ဟိုတယ်မှရရှိသော ဝင်ငွေများမှာ တရုတ်ရင်းနှီးမြှုပ်နှံသူများ၏ ဘဏ်အကောင့်ထဲသို့ တိုက်ရိုက်ဝင်ရောက်နေကြောင်း စစ်ဆေးတွေ့ရှိခဲ့သည်ဟု သိရသည်။

ထို့အပြင် ထွက်ပြေးတိမ်းရှောင်နေသည့် တရုတ်အမျိုးသမီးတစ်ဦးကိုလည်း ဖမ်းဆီးနိုင်ရန် ဆက်လက်စုံစမ်း နေကြောင်း သိရသည်။

လက်ရှိတွင် ရင်းနှီးမြှုပ်နှံသူ တရုတ်နိုင်ငံသား ၂ ဦးကို အလုပ်လုပ်ကိုင်ခွင့် လက်မှတ်မရှိဘဲ အလုပ်လုပ်ကိုင်မှု၊ နိုင်ငံခြားသား စီးပွားရေးလုပ်ငန်းဥပဒေကို ရှောင်လွှဲရန် ထိုင်းနိုင်ငံသားအား နာမည်ခံအဖြစ် အသုံးပြုမှု၊ ခွင့်ပြုချက်မရှိဘဲ စီးပွားရေးလုပ်ငန်း လုပ်ကိုင်မှု၊ ဟိုတယ်လုပ်ငန်းလိုင်စင်မရှိဘဲ လုပ်ငန်း လုပ်ကိုင်မှုဖြင့် အရေးယူထားကြောင်း သိရသည်။

အလားတူ နာမည်ခံပေးသည့် ထိုင်းအမျိုးသမီး မဂျင်ကိုမူ နိုင်ငံခြားသားများ တရားမဝင် စီးပွားရေးလုပ်ကိုင်နိုင်ရန် ကူညီထောက်ပံ့ပေးမှု၊ နိုင်ငံခြားသားများအတွက် အစုရှယ်ယာ ကိုယ်စားကိုင်ဆောင်ပေးမှု (Nominee) ၊ ဟိုတယ်လုပ်ငန်းလိုင်စင်မရှိဘဲ စီးပွားရေး လုပ်ကိုင်မှုဖြင့် အရေးယူထားသည်။