ထိုင်းနိုင်ငံ၊ ဘန်ကောက်မြို့၊ ဘန်ခေ့ (Bang Khae ) နယ်မြေတွင် မြန်မာနိုင်ငံသားလင်မယားနှစ်ဦး စကားများရန်ဖြစ်သည်ကို သေနတ်ဖြင့် ဝင်ရောက်ဟန့်တားပေးရန်ကြိုးစားခဲ့သည့်ထိုင်းအလုပ်ရှင်တစ်ဦး သေနတ်ထိမှန်သေဆုံးသွားကြောင်း ထိုင်းသတင်းဌာတစ်ခုဖြစ်သည့် Khaosod-English တွင်ဖော်ပြထားသည်။

အသက် ၂၃ နှစ်အရွယ် စိုင်းဟန်ဆိုသည့် မြန်မာနိုင်ငံသားမှ ၎င်း၏အမျိုးသမီးဖြစ်သူအား နာကျင်အောင်ပြုလုပ်ရန်ကြိုးစားသည့်အချိန် အလုပ်ရှင်ဖြစ်သူအသက် ၇၀ နှစ် အရွယ် Mr. Yuttharoj Suwansumet မှ သေနတ်ဖြင့် ဝင်ရောက်ဟန့်တားပေးရာ ရုန်းရင်းဆန်ခတ်ဖြစ်ပွားပြီး သေနတ်ကျည်ထွက်ကာ အလုပ်ရှင်ဖြစ်သူသေဆုံးသွားခဲ့သည်။

ထိုဖြစ်စဉ်မှာ အလုပ်ရှင်ဖြစ်သူ Mr. Yuttharoj Suwansumet ၏ နေအိမ်တွင်ဖြစ်ပွားခဲ့ခြင်းဖြစ်ပြီး ကျူးလွန်သူ စိုင်းဟန်မှ ခဲနက်ရောင်ဟွန်ဒါ – စီအာဗီ အမျိုးအစားကားအားယူဆောင် မောင်းနှင်ထွက်ပြေးသွားခဲ့ကြောင်း သိရသည်။
ထွက်ပြေးသွားသည့် တရားခံဖြစ်သူ စိုင်းဟန်အား လူသေစေမှုဖြင့် အမှုဖွင့်ဝရမ်းထုတ်ထားပြီး ဖမ်းဆီးရမိလျှင် ဘတ်ငွေ ၂ သောင်းဆုချမည်ဖြစ်ကြောင်း ဘန်ကောက် Petchaskem ရဲစခန်းမှ ရဲအရာရှိ Pramote Chanbuonkaew က ထုတ်ပြန်ပြောဆိုထားသည်။

ပြီးခဲ့သည့် မတ်လအတွင်းကလည်း ထိုင်းနိုင်ငံ ချင်းမိုင်မြို့တွင် အသက် ၁၈ နှစ်အရွယ် ထိုင်းအမျိုးသားတစ်ဦးအား မြန်မာရွှေ့ပြောင်းအလုပ်သမား လူငယ် ၈ ဦးမှ ဓား၊ တုတ်နှင့် အခြားလက်နက်များဖြင့် ရိုက်နှက်ခဲ့ကြပြီး ပြင်းထန်ဒဏ်ရာများကြောင့် ဆေးရုံသို့ပို့ဆောင်စဉ် သေဆုံးသွားခဲ့သည်။

အလားတူ မတ်လအတွင်း ဆန်ဆိုင်းမြို့နယ်အတွင်း မြန်မာရွှေ့ပြောင်း အလုပ်သမား လူငယ် ၄ ဦးမှ ဈေးဝယ်စဉ်ပိုက်ဆံမလောက်သည့် အတွက် ဈေးဆိုင်ပိုင်ရှင်အမျိုးသားတစ်ဦးကို ဓားဖြင့်ခုတ်သည့် ဖြစ်စဉ်များလည်း ဖြစ်ပွားခဲ့ကြောင်း ထိုင်းသတင်းဌာနများတွင်ဖော်ပြထားသည်။