ထိုင်း၊ အမေရိကန်နှင့် လာအိုနိုင်ငံတို့မှ တရားဥပဒေ စိုးမိုးရေးအရာရှိများသည် နယ်စပ်ဖြတ်ကျော် ရာဇဝတ်မှုများ တိုက်ဖျက်ရေး ပူးပေါင်းဆောင်ရွက်မှု အားကောင်းစေရန်အတွက် တွေ့ဆုံဆွေးနွေးခဲ့ကြောင်း Khaosod English သတင်းတွင် ဖော်ပြသည်။

အဆိုပါတွေ့ဆုံဆွေးနွေးပွဲကို စက်တင်ဘာလ ၂၃ ရက်မှ ၂၄ ရက်အထိ ဘန်ကောက်မြို့တွင် ပြုလုပ်ခဲ့ပြီး ထိုင်းနှင့် လာအိုနိုင်ငံရှိ အမေရိကန်သံရုံးများက ညှိနှိုင်းဆောင်ရွက်ခဲ့ခြင်း ဖြစ်ကြောင်း သိရသည်။

သုံးနိုင်ငံထိပ်သီးအစည်းအဝေးတွင် ထိုင်းနှင့် လာအိုမှ လူဝင်မှုကြီးကြပ်ရေး ရဲအရာရှိ ၃၀ ဦးစီ၊ လူဝင်မှုကြီးကြပ်ရေး ရဲတပ်ဖွဲ့မှ အကြီးတန်းရဲအရာရှိ ၁၅ ဦးစီအပြင် ပြည်တွင်းလုံခြုံရေး စုံစမ်းစစ်ဆေးရေး၊ အကောက်ခွန်နှင့် နယ်စပ်ကာကွယ်ရေး အပါအဝင် အမေရိကန်လုံခြုံရေး ကိုယ်စားလှယ်များ တက်ရောက်ခဲ့ကြောင်း Khaosod English သတင်းတွင် ဖော်ပြထားသည်။

ထိုအစည်းအဝေးတွင် လူကုန်ကူးမှု၊ ကလေးသူငယ် ခေါင်းပုံဖြတ်မှု၊ မူးယစ်ဆေးဝါး မှောင်ခိုကူးမှု၊ လက်နက်မှောင်ခိုကူးမှုနှင့် အရှေ့တောင် အာရှတလွှားသားကောင်များကို ပစ်မှတ်ထား၍ ပိုမိုပျံ့နှံ့နေသော ဆိုက်ဘာစကမ် စစ်ဆင်ရေးများကို ထိုင်း၊ အမေရိကန်၊ လာအို အာဏာပိုင်များက ဆွေးနွေးခဲ့ကြောင်း သိရသည်။

ထို့ပြင် ဆက်သွယ်ရေးလမ်းကြောင်းများ ချောမွေ့စေရန်နှင့် နယ်စပ်ဖြတ်ကျော်ရာဇဝတ်မှု ကျူးလွန်သည့် အဖွဲ့အစည်းများကို နှိမ်နင်းရေးဗျူဟာများအား သုံးနိုင်ငံ ညှိနှိုင်းဆောင်ရွက်ရန် ရည်ရွယ်လုပ်ဆောင်ခဲ့ခြင်း ဖြစ်ကြောင်း သိရသည်။

ရာဇဝတ်မှုကျူးလွန်သူများသည် ဒေသအာဏာပိုင်များကို မလေးစားသောကြောင့် လုပ်ဆောင်ခြင်း ဖြစ်သဖြင့် ယခုသုံးနိုင်ငံဆွေးနွေးပွဲတွင် ပါဝင်သည့် အာဏာပိုင်များ ဒေသတွင်း ပူးပေါင်းဆောင်ရွက်မှုများ တိုးမြှင့်ရန် လိုအပ်နေကြောင်း၊ ယခုလုပ်ဆောင်သည့် ဆွေးနွေးပွဲသည် အာဆီယံတဝှမ်းတွင် တရားဥပဒေ စိုးမိုးရေးမိတ်ဖက်များ အားကောင်းလာစေရန်အတွက် ပဏာမခြေလှမ်းဖြစ်ကြောင်း ဆိုထားသည်။