စိုင်းဆိုင်အိုက်၊ ၂၀၂၆ ဩဂုတ်လ ၈ ရက်

ရွှေတြိဂံဟု နာမည်ကြီးသည် မြန်မာ-ထိုင်း-လာအိုနယ်စပ် သျှမ်းပြည်အရှေ့ပိုင်း တာချီလိတ်မြို့နယ်အတွင်း တရားမဝင် နယ်စပ်ဖြတ်ကျော် ဝင်ရောက်နေထိုင်သည့် တရုတ်နိုင်ငံသားများကို ဖမ်းဆီးရမိကြောင်း သတင်းရရှိသည်။

သြဂုတ် ၆ရက် မနက်ပိုင်းတွင် တာချီလိတ်မြို့နယ် မိုင်းဖုန်း(ခ)အုပ်စု၊ဝှေလေလန် ပူးပေါင်းစစ်ဆေးရေးဂိတ်အနီးရှိ ရှောင်ကွင်းလမ်းတွင် မြန်မာနိုင်ငံသို့ တရားမဝင် ဝင်ရောက်လာသည့် တရုတ်နိုင်ငံသား (၂)ဉီးကို စတင်ဖမ်းဆီးရမိခဲ့သည်။

ထိုဖမ်းဆီးရမိသည့် အမျိုးသား(၂)ဉီးကို စစ်ဆေးမေးမြန်းရာ တာချီလိတ်မြို့နယ် ဝမ်ပုံကျေးရွာအနီးတွင် တရုတ်နိုင်ငံသားများ ခိုးအောင်နေသည့်ဟု သိရှိရာပြီး သွားရောက် အမျိုးသား ၃၈ဉီးနှင့် အမျိုးသမီး ၁ဉီးကို တွေ့ရှိရာပြီး တရုတ်နိုင်ငံသား စုစုပေါင်း ၄၁ဉီး ဖမ်းဆီးရမိကြောင်း စစ်ကော်မရှင် ဝါဒဖြန့် သတင်းစာတွင်ရေးသားထားသည်။

“ တရုတ်တွေက တာချီလိတ်မြို့ပေါ်တော့ သိပ်မတွေ့ဘူး၊ ကျေးရွာတွေဘက်တော့ ပေါတယ်။ အရမ်းများတယ်။ ပေါ်တင်သွားလာနေကြတာ။ ကျားဖြန့် လည်းဖြစ်နိုင်သလို သတ္တုတွေ ရွှေတွေလာတူးတဲ့တရုတ်လည်း ဖြစ်နိုင်တယ်” ဟု မိုင်းဖုန်းအုပ်စု ဒေသခံ အမျိုးသားတဉီးက သျှမ်းသံတော်ဆင့်ကိုပြောသည်။ ျ

တာချီလတ်မြို့နယမ်အတွင်းသို့ ရောက်ရှိလာသည့် တရားမဝင် တရုတ်နိုင်ငံသားများသည် လာအိုနိုင်ငံမှ တဆင့် ဝင်ရောက်လာကြသူများဖြစ်ကြောင်း၊ ထိုသူများသည် ကျားဖြန့်လုပ်ငန်းနှင့် သတ္တုတူးဖော်သည့် လုပ်ကွက်များတွင် လုပ်ကို်ငနေသူများဖြစ်နိုင်ကြောင်း ၎င်းကဆိုသည်။

“သူတို့တွေက လာအိုဘက်မှာ ကျားဖြန့်တွေ စစ်ဆေးတာရှိရင် ဒီဘက်ကို ပြောင်းလာနေကြတယ်။ အခုဆိုရင် ရွာဘက်တွေမှာ မျက်နှာစိမ်း တရုတ်တွေကများတယ်။ ရွာကလူတွေကလည်း အိမ်ခန်းငှားခရရင်ပြီးရောဆိုပြီး လက်ခံတာရှိတယ်။” ဟု တာချီလိတ်မြို့ ဒေသခံအမျိုးသမီးတဉီးက သျှမ်းသံတော်ဆင့်ကို ပြောသည်။

လက်ရှိ ဖမ်းဆီးခံရသည့် တရားမဝင် နယ်စပ်ဖြတ်ကျော် တရုတ်နိုင်ငံသား ၄၁ဉီးကို သက်ဆိုင်ရာ၌ ထိန်းသိမ်းထားရှိပြီး ၁၉၄၇ ခုနှစ် မြန်မာနိုင်ငံ လူဝင်မှုကြီးကြပ်ရေး (လတ်တလောပြဋ္ဌာန်းချက်များ) အက်ဥပဒေပုဒ်မ ၃(၁)/၁၃(၁) အရ အရေးယူဆောင်ရွက်သွားမည်ဖြစ်ကြောင်း စစ်ကောင်စီက ထုတ်ပြန်ထားသည်။

“ ကျမ အထင်ကတော့ ဒီထက်များနိုင်သေးတယ်။ ဒါကလည်း ဟန်ပြ ဖမ်းတဲ့သဘောပါပဲ။ တာချီလိတ်မြို့နယ်မှာ မြန်မာစကားမတက်တဲ့တရုတ်တွေက အရမ်းများတာ။ မျက်နှာစိမ်းတွေပဲ” ဟု ၎င်းအမျိုးသမီးက ထပ်လောင်းပြောသည်။

တာချီလိတ်မြို့နယ်သည် လာအိုနိုင်ငံ လွမ်နမ်သာပြည်နယ်နှင့် မဲခေါင်မြစ်တစ်လျှောက် နယ်စပ်ချင်းဆက်စပ်နေပြီး ဝမ်ပုံ–မိုင်းမော နယ်စပ်ဖြတ်သန်းရေးလမ်းကြောင်းမှတစ်ဆင့် လာအိုနိုင်ငံဘက်သို့ ဆက်သွယ်ထားသည်။

အဆိုပါ နယ်စပ်ဖြတ်သန်းရေးလမ်းကြောင်းသည် ကိုဗစ်-၁၉ ကာလအတွင်း နှစ်နှစ်အတော်ကြာ ပိတ်ထားခဲ့ပြီး ၂၀၂၆ ခုနှစ် ဇူလိုင်လ ၁၆ ရက်တွင် ပြန်လည်ဖွင့်လှစ်ခဲ့သည်။

နယ်စပ်လမ်းကြောင်း ပိတ်ထားသည့်ကာလအတွင်း လာအိုနိုင်ငံဘက်သို့ သွားရောက်လိုသူများနှင့် အလုပ်သွားလုပ်သူများသည် တရားဝင်လမ်းကြောင်းအစား တရားမဝင် မော်တော်လှေများ အသုံးပြု၍ မဲခေါင်မြစ်ကို ဖြတ်သန်းခဲ့ကြကြောင်းသိရသည်။