သျှမ်းပြည် မြောက်ပိုင်း၊ မူဆယ်မြို့တွင် အွန်လိုင်းလိမ်လည်မှု(ကျားဖြန့်) လုပ်ငန်းလုပ်ကိုင်သူ တရုတ်နိုင်ငံသား အပါအဝင် (၅၉) ဦး ဖမ်းဆီးရခဲ့ကြောင်း စုံစမ်းသိရသည်။

ယမန်နေ့ (ဇွန်လ ၂၂ရက်) ညနေ ၃ နာရီခွဲ မူဆယ်မြို့ တော်ရွက်ရပ်ကွက်ရှိ အဆောက်အဦးတစ်လုံးကို စစ်ကော်မရှင်နှင့် သက်ဆိုင်ရာ ပူးပေါင်းအဖွဲ့များ ဝင်ရောက် စစ်ဆေးရာ အွန်လိုင်းလိမ်လည်မှု (ကျားဖြန့်) လုပ်ငန်းနေသည့် တရုတ်နိုင်ငံသား ၂ ဦး နှင့် မြန်မာနိုင်ငံသား ၅၇ ဦး စုစုပေါင်း (၅၉) ဦးတို့ကို ဖမ်းဆီးမိခဲ့ကြောင်း စစ်ကော်မရှင်က ယနေ့(ဇွန်လ ၂၃ ရက်)တွင် သတင်းထုတ်ပြန်သည်။

“မနေ့က ဝင်ဖမ်းတာ တော်ရွက်ရပ်ကွက်မှာ အဲ့တာတရုတ်တွေလည်းပါသွားတယ်။ သံသယရှိလို့ သတင်းရလို့ ဝင်တာနေမယ် ” ဟု မူဆယ်မြို့ အမျိုးသားတစ်ဦးက ပြောသည်။

ထိုအွန်လိုင်း လိမ်လည်မှု (ကျားဖြန့်) လုပ်ငန်း လုပ်ကိုင်သူနှင့် အတူ သက်သေခံပစ္စည်းများဖြစ်သည့် ဖုန်းမျိုးစုံ ၂၀၀ လုံး၊ All In One ကွန်ပျူတာ ၁၀ လုံး၊ Laptop ၅ လုံး၊ ဆိုင်ကယ် ၁၀ စီးတို့ကို သိမ်းဆည်း ရမိကြောင်း ဖော်ပြထားသည်။

ပြီးခဲ့သည့် (မေလ ၂၈ ရက်)တွင် မူဆယ်မြို့ စွမ်စော်ရပ်ကွက်ရှိ နေအိမ်တလုံးတွင် သတင်းအရ ဝင်ရောက်ရှာဖွေခြင်းကြောင့် အွန်လိုင်းလိမ်လည်မှု (ကျားဖြန့်) လုပ်ငန်းနေသည့် တရုတ်နိုင်ငံသား ၅ ဦး နှင့် မြန်မာနိုင်ငံသား ၂၃ ဦး စုစုပေါင်း (၂၈) ဦးတို့ကို ဖမ်းဆီးမိခဲ့ကြောင်း သိရသည်။

၂၀၂၃ ခုနှစ်ကုန်ပိုင်းမှစတင်၍ တရုတ်နိုင်ငံသည် နယ်စပ်တစ်လျှောက်ရှိ အွန်လိုင်းလိမ်လည်မှု ဂိုဏ်းများကို နှိမ်နင်းရန် စစ်ကောင်စီကို ဖိအားပေးခဲ့သည်။

တစ်ဖက်တွင်လည်း အမေရိကန်ပြည်ထောင်စုက Cyber Scam Task Force ကို ဖွဲ့စည်းကာ ဒေသတွင်း အွန်လိုင်းရာဇဝတ်မှုများကို တိုက်ဖျက်ရန် ကြိုးပမ်းနေသည်။

မြန်မာနိုင်ငံအခြေစိုက် ငွေလိမ်ဂိုဏ်းများကြောင့် အမေရိကန်နိုင်ငံသားများမှာ ၂၀၂၅ ခုနှစ်အတွင်း ဒေါ်လာ ၇.၂ ဘီလီယံကျော် ဆုံးရှုံးခဲ့ရကြောင်း သိရသည်။

ထို့ကြောင့် အမေရိကန်နိုင်ငံခြားရေးဝန်ကြီးဌာန (INL) က ကရင်ပြည်နယ်အတွင်းရှိ Tai Chang 1.0, 2.0 နှင့် 3.0 ဟုခေါ်သော ငွေလိမ်စင်တာများ၏ ငွေကြေးခဝါချမှုကွန်ရက်ကို ဖော်ထုတ်နိုင်ရန် ဒေါ်လာ ၁၀ သန်း ဆုကြေးငွေအဖြစ် ပြီးခဲ့သည့် (ဧပြီ ၂၄ ရက်) တွင် ကြေညာလိုက်သည်။