ယနေ့ (မတ်လ ၂၈) ရက် နေ့လ​ယ်ပိုင်းတွင် မြန်မာနိုင်ငံ စစ်ကိုင်းတွင်းဗဟိုပြုလှုပ်ခတ်ခဲ့သော အင်အား ပြင်းထန်သည့် ငလျင်လှုပ်ခတ်ခဲ့သည်။

ထို့ကြောင့် နောက် ၂၄ နာရီအတွင်း ပြင်းထန်မှုအင်းအားနည်းပါးနိုင်သော်လည်း သိသာသည့် အန္တရာယ်ရှိငလျင်များထပ်မံလှုပ်ခတ်နိုင်သည့်အတွက် တနိုင်ငံလုံးအား အရေးပေါ်အခြေအနေကြေညာကြောင်း ထိုင်းဝန်ကြီးချုပ်ပေထုန်တန်ရှင်နာဝပ်မှ ကြေညာထားသည်။

ယနေ့ (မတ် ၂၈)ရက် နေ့လ​​​ယ်ပိုင်းတွင်လည်း ထိုင်းနိုင်ငံအတွက် လှုပ်ခတ်ခဲ့သော ငလျင်ပြင်းအားမှာ မြန်မာနိုင်ငံကဲ့သို့ အင်အားမပြင်းထန်သော်လည်း ဘန်ကောက်မြို့အတွင်းဆောက်လက်စ စာရင်းစစ်ချုပ်ရုံးအဆောက်အဦးပြိုကျမှုအတွင်း အလုပ်သမား ၈၁ ဦးထက်မနည်းပိတ်မိနေဆဲဖြစ်ပြီး အဆောက်အဦးပြိုကျချိန်တွင် ဆောက်လုပ်ရေးလုပ်သား ၁၀၀ နီးပါးရှိနေခဲ့သည်။

လုပ်ငန်းခွင်အတွင်း အလုပ်သမားဦးရေ စုစုပေါင်း ၄၀၀ ကျော်ရှိကြောင်း ဘန်ကောက်ပို့စ် သတင်းတွင် ဖော်ပြထားသည်။ 

အင်အားပြင်းထန်ပြီး ၈ ရစ်ချ်တာစကေးနီးပါးရှိသည့် ငလျင်ကြီးသည် မြန်မာနိုင်ငံ စစ်ကိုင်းတိုင်း အနီးလှုပ်ခတ်ခဲ့ပြီးနောက် နောက်ဆက်တွဲ ငလျင်ငယ် ၁၂ ကြိမ်ထပ်မံလှုပ်ခတ်ခဲ့သေးကြောင်း ထိုင်းမိုးလေဝသဌာန မြေငလျင်စောင့်ကြည့်ရေးဌာနက ထုတ်ပြန်ထားသည်။

နောက်ဆက်တွဲငလျင်များသည် အဓိကလှုပ်ခတ်ခဲ့သည့် ငလျင်ကြီးလောက်မပြင်းထန်နိုင်ဘဲ အင်အားလျော့သွားနိုင်ချေရှိသော်လည်း လုံးဝရပ်တန့်သွားရန် ရက်သတ္တပတ်ခန့်ကြာမြင့်နိုင်ကြောင်းလည်း ထိုင်းနိုင်ငံ၏ သတ္တုအရင်းအမြစ်ဌာနမှထုတ်ပြန်ထားသည်။

သို့သော်လည်း ငလျင်ဒဏ်ကြောင့် ထိုင်းနိုင်ငံတဝှမ်း ဓာတ်အားပေးစက်ရုံများနှင့် ဆည်များ၏လည်ပတ်မှုကို ထိခိုက်ခြင်းမရှိကြောင်း ထိုင်းလျှပ်စစ်ထုတ်လုပ်ရေး အာဏာပိုင်အဖွဲ့မှ ပြောကြားထားသည်။