ထိုင်းနိုင်ငံ မှ သျှမ်းပြည်အရှေ့ပိုင်း တာချီလိတ်မြို့သို့ ပြန်လည်ဝင်ရောက်လာသည့် နေရပ်ပြန် မြန်မာရွှေ့ပြောင်းအလုပ်သမား (၃၃၀) ကျော် ရှိကြောင်း သတင်းရရှိသည်။

ယမန်နေ့ သြဂုတ် ၄ ရက်က ထိုင်းအာဏာပိုင်များ လွဲအပ်သော နေရပ်ပြန် မြန်မာရွှေ့ပြောင်းအလုပ်သမား ၃၃၄ ဦးကို တာချီလိတ် ဘက်ခြမ်းမှ ကူညီရေးအဖွဲ့က မယ်ဆိုင်- တာချီလိတ် ချစ်ကြည်ရေး တံတားအမှတ် ၂ တွင်စောင့်ဆိုင်းလက်ခံခဲ့ပြီး ၊ တာချီလိတ်ဒေသခံ ၆၄ ဦးမှ အပ ကျန်သည့် နေရပ်ပြန်အားလုံးကို သက်ဆိုင်ရာ တိုင်းဒေသကြီး၊ မြို့နယ်များသို့ ဆက်လက်ပို့ဆောင်လိုက်ပြီဖြစ်ကြောင်း တာချီလိတ်မြို့နယ် အုပ်ချုပ်ရေးမှူး ဦးချမ်းမြေ့စော က သျှမ်းသံတော်ဆင့် ကိုပြောသည်။

“ထပ်ဝင်လာဖို့ ရှိသေးတယ်။ ရောဂါဖြစ်နေတဲ့ ကာလတစ်လျှောက်လုံး ဆက်ဝင်လာဖို့ ရှိသေးတယ်။ တာချီလိတ်ကလူတွေပဲ Quarantine ထားမယ်။ ကျန်တဲ့သူတွေကိုတော့ မနေ့ကတည်းက လွှတ်လိုက်ပါပြီ။ သူတို့တွေကတော့ သက်ဆိုင်ရာ မြို့နယ်မှာ Quarantine ဝင်ရမယ်” ဟု ဦးချမ်းမြေ့စော က သျှမ်းသံတော်ဆင့် ကိုပြောသည်။

ကိုဗစ်-၁၉ ကပ်ရောဂါကြောင့် ကမ္ဘာတဝှမ်းရှိ စက်ရုံများ အလုပ်ရုံများ၊ လေကြောင်းလိုင်းများ နှင့် ကားလိုင်းများ ရပ်ဆိုင်းထားခံရသကဲ့သို့ ထိုင်းနိုင်ငံတွင်လည်း လုပ်ငန်းခွင်များစွာ ရပ်ဆိုင်းခဲ့ရသည်။

ထို့ကြောင့် ထိုင်းနိုင်ငံတွင် သွားရောက် အလုပ်လုပ်ကိုင်သည့် မြန်မာရွှေ့ပြောင်းအလုပ်သမားများသည် မြန်မာနိုင်ငံသို့ နေ့စဉ် နှင့်အမျှ ပြန်လည်ဝင်ရောက်လာသည်။

မတ်လ မှ စတင်ပြီး တာချီလိတ် တံတား အမှတ်(၂) မှ နေရပ်ပြန် မြန်မာရွှေ့ပြောင်းအလုပ်သမားများကို စတင်လက်ခံရာမှာ သြဂုတ် ၄ ရက် အထိ (၄၀၀၀) ကျော် ရှိသွားပြီဖြစ်ကြောင်း တာချီလိတ်မြို့နယ် အုပ်ချုပ်ရေးမှူး ဦးချမ်းမြေ့စော က ပြောသည်။

အလားတူ ထိုင်းနိုင်ငံ မဲဆောက်မှ ကရင်ပြည်နယ် မြဝတီမှ တဆင့် နေရပ်ပြန် သူများအနက် သျှမ်းပြည်တောင်ပိုင်း တောင်ကြီးသို့ ပြန်လာသူများမှာ မေ (၂၇) မှ သြဂုတ် (၄) ရက်ထိ စုစုေပါင်း ၂၇၂၈ ဦး ရှိပြီဖြစ်ကြောင်း သျှမ်းပြည်နယ် အစိုးရအဖွဲ့ထံ မှ စုံစမ်းသိရှိရသည်။

“မြဝတီမှ ဝင်လာသည့် သူတွေ ရဲ့ ဓါတ်ခွဲနမူနာ ယူဖို့ ကျန်တာ (၅၃၁) ဦး ကျန်သေးတယ်” ဟု လူမှုရေး ဝန်ကြီး ဒေါက်တာမျိုးထွန်း ကပြောသည်။

မြန်မာ – ထိုင်း ချစ်ကြည်ရေး တံတားသည် ကိုဗစ်-၁၉ ဖြစ်ပွားပြီးနောက် မတ် ၂၅ ရက်မှ စတင်ပိတ်လိုက်သော်လည်း နေရပ်ပြန် မြန်မာရွှေ့ပြောင်းအလုပ်သမားများ ဆက်တိုက်လက်ခံနေကြောင်း သိရသည်။

လွန်ခဲ့သည့် မတ် ၂၅ ရက်က ထိုင်းနိုင်ငံ ဘန်ကောက်မြို့မှ မြန်မာနိုင်ငံ တာချီလိတ်မြို့သို့ ပြန်လာသည့် အသက် ၂၄ နှစ် အရွယ် ကျောက်မဲသား အမျိုးသားတစ်ဦး ကိုဗစ်-၁၉ အတည်ပြု လူနာ အဖြစ်တွေ့ရှိခဲ့သည်။

ထို့နောက် ပြည်ပ မှပြန်လာသည့် ပြည်တော်ပြန်များကို သက်ဆိုင်ရာ အာဏာပိုင်များမှ နေရပ်ပြန်မည့် ဒေသခံများကို Quarantine ဝင်ပြီးမှ မိမိနေရပ်သို့ ပြန်ခွင့်ပြုကြောင်း သိရသည်။

ယခင်တွင် မြန်မာ – ထိုင်း နယ်စပ် ချစ်ကြည်ရေး တံတား အမှတ် (၁) တွင် တရားဝင် နိုင်ငံကူး လက်မှတ်ကိုင်ဆောင်သူများကို မတ် (၂၅) ရက် ညနေ ၅ နာရီအထိ တာချီလိတ် သို့ ဖြတ်သန်းခွင့်ပေးမည်ဟု ထိုင်းအာဏာပိုင်များက ကြေငြာခဲ့သည်။

မြန်မာ – ထိုင်း နယ်စပ် ချစ်ကြည်ရေး တံတားများကို မတ် (၂၃) ရက်တွင် ပိတ်ရန် နှစ်ဖက်နိုင်ငံ၏ သက်ဆိုင်ရာ ဌာနမှ ထုတ်ပြန်ကြေညာခဲ့သည်။