မိုင်းကိုင်မြို့နယ် စစ်ရှောင်များ နေရပ်ပြန်

0

သျှမ်းပြည် တောင်ပိုင်း မိုင်းကိုင်မြို့နယ် ဟမ်းငိုင်းကျေးရွာ အုပ်စုအတွင်း စစ်ဘေးရှောင်များ မိမိနေရပ်သို့ပြန်သွားပြီဖြစ်ကြောင်း သတင်းရရှိသည်။

Photo by စိုင်းစံမိဏ်း၊ ကျေးသီးမြို့နယ်အတွင်း ထွက်ပြေးတိမ်းရှောင်နေရသည့် ပြည်သူမျာ

အဆိုပါ စစ်ရှောင်များသည် ဖေဖော်ဝါရီ ၂၇ ရက် ကစပြီး သျှမ်းပြည် ပြန်လည်ထူထောင်ရေးကောင်စီ၊ သျှမ်းပြည်တပ်မတော်(RCSS/SSA) နှင့် အစိုးရတပ်မတော် တို့ကြား မိုင်းကိုင်မြို့နယ် ဟမ်းငိုင်းကျေးရွာ လွိုင်တွန်းတောင်ကြော တွင်ဖြစ်ပွါးသော တိုက်ပွဲများကြောင့် ဘုန်းကြီးကျောင်းသို့ အသီးသီးစစ်ဘေးရှောင်လာကြခြင်းဖြစ်သည်။

“ဒီနေ့ စစ်ရှောင်တွေ နေရပ်ပြန်ကြမယ်။ မနေ့ည က ကျနော့ဆီကို ဗျူဟာ မှူးဖုန်းဆက်လာတယ်။ စစ်ရှောင်တွေ နေရပ်ပြန်လို့ရတယ်ဆိုတဲ့အကြောင်းပြောလာပါတယ်” ဟု မိုင်းကိုင်မြို့နယ် အမှတ်(၂) ပြည်နယ်လွှတ်တော် ကိုယ်စားလှယ် ဦးစိုင်းလုံ က သျှမ်းသံတော်ဆင့် သို့ပြောသည်။

မတ်လ ၆ ရက် ယနေ့ နေရပ်ပြန်မည့် စစ်ရှောင်များမှာ ဟမ်းငိုင်းကျေးရွာ အုပ်စု အတွင်းရှိ ကုန်းစုံ ကျေးရွာ ဘုန်းကြီး ကျောင်းနှင့် လွယ်စက် ကျေးရွာ ဘုန်းကြီးကျောင်းတွင် တိမ်းရှောင်နေသည့် စစ်ရှောင်မျာ်းဖြစ်ကြောင်း ဦးစိုင်းလုံ က ပြောသည်။

“ သူတို့တွေ ဘုန်းကြီးကျောင်း သန့့်ရှင်းရေး တွေလုပ်ပြီးရင် ပြန်ကြမယ်။ ကျေးရွာထဲ ပျက်စီးတာတွေ ဆုံးရှုံးတာတွေကို စာရင်းပေးဖို့ပြောထားပါတယ်” ဟု ဦးစိုင်းလုံ က ဆိုသည်။

မတ်လ ၂ ရက် မှစတင်ကာ ဟမ်းငိုင်းကျေးရွာ အုပ်စု အတွင်းရှိ ကုန်းညောင် ဖာဆား ကျေးရွာ နှင့် ဟိုဖိုင်ကျေးရွာအတွင်း ရှိ နေအိမ်၊ ဈေးဆိုင် အတွင်း ရှိ ပစ္စည်းများ၊ ဘုရားစင်များ နှင့် စားသောက်ကုန်များကို အစိုးရ စစ်ကြောင်းမှ စစ်သားများက ဝင်ရောက် မွှေနှောက် ယူဆောင်သွားကြကြောင်း စစ်ရှောင်ရွာသားများပြောပြချက်အရသိရသည်။

“ ကျနော်တို့ ကျေးရွာကတော့ လောဆယ် မပြန်သေးဘူး။ စံပေါင်းကျေးရွာနဲ့ ဟိုနောင် ကျေးရွာတွေက လူတွေကတော့ ပြန်သွားပြီ။ ကျနော်တို့လည်းပြန်ဖို့လုပ်နေပါတယ်” ဟု ကုန်းညောင် ဖာဆား ကျေးရွာ က ဒေသခံ စိုင်းမု က သျှမ်းသံတော်ဆင့် သို့ပြောသည်။

မတ်လ ၄ ရက်က စစ်ရှောင်တချို့နှင့်ပြည်နယ်လွှတ်တော်ကိုယ်စားလှယ်တချို့ နေရပ်ပြန်ကြည့်ရန်အသွား အစိုးရ စစ်ကြောင်း၏ ဟန့့်တားခြင်းကို ခံခဲ့ရသည်။

မိုင်းကိုင်မြို့နယ် ဟမ်းငိုင်းကျေးရွာ အတွင်း စစ်ဘေးရှောင် ၅၀၀ ဝန်းကျင်ရှိသည်ဟုသိရသည်။

Leave a Comments

SHARE