သျှမ်းပြည် သိန္နီမြို့နှင့် နမ္မတူမြို့ကြား ကိုးကန့်တပ်ဖွဲ့ MNDAA စခန်းချ တပ်စွဲထားသည့် နေရာများတွင် တပ်အပြောင်းအရွှေ့ ပြုလုပ်ခဲ့ကြောင်း စုံစမ်းသိရသည်။

ဧပြီလ တတိယပတ်မှ စတင်ပြီး ကိုးကန့်တပ်ဖွဲ့ MNDAA ထိန်းချုပ်ထားသည့် သိန္နီမြို့နှင့် တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် နမ္မတူမြို့ကြားရှိ မိုင်းရင်ကျေးရွာအုပ်စုဘက်တွင် MNDAA ဘက်မှ တပ်အပြောင်းအရွှေ့ ပြုလုပ်ခဲ့ကြောင်း စစ်ရေးသတင်းရင်းမြစ်တစ်ဦးက ပြောသည်။

“လားရှိုးဘက်က အီနိုင်းနဲ့ သိန္နီဘက်က ဆင်းတဲ့ ပန်ခမ်း၊ မိုင်းရင်အုပ်စုထဲက စစ်ကြောင်းကတော့ အင်အားဖြည့်တာ မဟုတ်ဘူး၊ တပ်အပြောင်းအလဲ လုပ်တဲ့သဘောပါ။ လားရှိုး-သိန္နီ-နမ္မတူ ဒီမြို့နယ်အစပ်မှာ MNDAA ရဲ့ တပ်နေရာချထားမှုက နဂိုအတိုင်း ရှိနေတုန်းပါ။ နမ္မတူထဲမှာတော့ TNLA ဘက်က လှုပ်လှုပ်ရှားရှား ရှိနေတယ်” ဟု အဆိုပါ စစ်ရေးသတင်းရင်းမြစ်က သျှမ်းသံတော်ဆင့်ကို ပြောသည်။

အတုအယောင် ရွေးကောက်ပွဲမှတဆင့် စစ်ကော်မရှင်အသွင်ပြောင်း စစ်အစိုးရ ဖြစ်လာပြီးနောက် ပိုးလမ်းမစီမံကိန်း BRI တစိတ်တပိုင်းဖြစ်သည့် တရုတ်-မြန်မာ စီးပွားရေးစင်္ကြံကို အလျင်အမြန် အကောင်အထည်ဖော်နိုင်ရေး တရုတ်ကိုယ်စားလှယ်များမှ စစ်တပ်အပါအဝင် မြောက်ပိုင်းမဟာမိတ်တပ်ဖွဲ့များနှင့် သင်္ကြန်ကာလအတွင်း လားရှိုးမြို့၌ တွေ့ဆုံဆွေးနွေးခဲ့ကြောင်း သတင်းထွက်ပေါ်နေစဉ် MNDAA ဘက်မှ ထိုသို့ တပ်အပြောင်းအရွှေ့ ပြုလုပ်ခဲ့ခြင်းဖြစ်သည်။

“သင်္ကြန်နောက်ပိုင်းမှာ နမ့်ခမ်းနဲ့ နမ္မတူကနေ ပလောင်စစ်သားတွေ ထွက်သွားအောင် တရုတ်နဲ့ စစ်ကောင်စီဘက်က အကြံရှိထားတယ်လို့ ကြားရတယ်။ တကယ်လို့ မထွက်ဘူးဆိုရင်တော့ ကွတ်ခိုင်လို ကိုးကန့်ကို တိုက်ခိုင်းမယ်လို့ သတင်းထွက်နေတယ်။ TNLA အတွက်က ထောက်ပို့လမ်းကြောင်း အခက်အခဲ ဖြစ်နေတယ်” ဟု အဆိုပါ စစ်ရေးသတင်းရင်းမြစ်က ဆက်ပြောသည်။

ညီနောင်မဟာမိတ်တပ်များက “၁၀၂၇ စစ်ဆင်ရေး”အတွင်း မြို့သိမ်းတိုက်ပွဲ ဖော်ဆောင်ခဲ့သည့် သျှမ်းပြည်မြောက်ပိုင်းရှိ မြို့ကြီးများကို အဓိက ဖြတ်သန်းသွားမည့် တရုတ်စီမံကိန်းများကို လုံခြုံရေးယူပေးရန် တရုတ်ကိုယ်စားလှယ်အဖွဲ့မှ UWSA ၊ MNDAA နှင့် SSPP/SSA တာဝန်ရှိသူများနှင့် လားရှိုးမြို့တွင် တွေ့ဆုံဆွေးနွေးခဲ့ကြောင်း သတင်းထွက်ပေါ်နေသော်လည်း သျှမ်းသံတော်ဆင့်မှ သီးခြားအတည်ပြုနိုင်ရန် ဆက်လက်စုံစမ်းနေသည်။

ကွတ်ခိုင်မြို့နယ်ကို ကိုးကန့်တပ်ဖွဲ့ MNDAA ဘက်မှ မတ်လ (၁၆) ရက်တွင် အလုံးစုံ ထိန်းချုပ်လိုက်ပြီးနောက် TNLA ထိန်းချုပ်ထားသည့် နမ့်ခမ်းမြို့နှင့် နမ္မတူမြို့ဘက်သို့ ဆက်လက်ထိုးစစ်ဆင် တိုက်ခိုက်မည်ဟု သတင်းများ ကျယ်ကျယ်ပြန့်ပြန့် ထွက်ပေါ်ခဲ့စဉ် နှစ်ဘက်တပ်ဖွဲ့မှ ဗဟိုအဆင့် ခေါင်းဆောင်များ မတ်လ (၁၇) ရက်မှ စတင်ပြီး လောက်ကိုင်မြို့တွင် တွေ့ဆုံဆွေးနွေးကာ အပစ်ရပ် သဘောတူခဲ့သည်။