သျှမ်းပြည်တောင်ပိုင်း၊ တောင်ကြီးမြို့တွင် လိုင်စင်မဲ့ယာဉ်များကို စက်သုံးဆီရောင်းချ ခွင့်မပေးတော့ကြောင်း သတင်းရရှိသည်။

တောင်ကြီးမြို့တွင် လိုင်စင်မဲ့ ယာဉ်များကို စက်သုံးဆီရောင်းချပေးမည် မဟုတ်ဘဲ စက်သုံးဆီဆိုင်တွင် လိုင်စင်မဲ့ယာဉ်များ တန်းစီဝယ်ယူခြင်းတွေ့ရှိလျှင် ဥပဒေနှင့်အညီ အရေးယူဆောင်ရွက် သွားမည်ဖြစ်ကြောင်း စစ်ကော်မရှင်က အသိပေးထုတ်ပြန်ထားသည်။

ထိုသို့ စစ်ကော်မရှင်က အသိပေးထုတ်ပြန်ပြီးနောက် ယနေ့ (မတ်လ ၁၂ရက်)တွင် စက်သုံးဆီဆိုင်များက လိုင်စင်မဲ့ယာဉ်များကို သေချာစိစစ်ကာ စက်သုံးဆီများကို ရောင်းချပေးနေကြောင်း သိရသည်။

“လိုင်စင်လည်းမရှိဘူး လိုင်စင်လုပ်ရင်လည်း ဆိုင်ကယ်ဖိုးထက် နှစ်ဆ ကုန်တော့ မလုပ်ထားဘူး၊မရောင်းတော့ ဘာဖြစ်လဲ ပုလင်းနဲ့ ဝယ်သုံးရတော့မှာပေါ့၊ ဈေးဘယ်လောက်ကြီးကြီး ရပ်ကွက် ဆီဆိုင်တွေက ပုလင်းနဲ့ ဈေးတင်ရောင်းတာပဲ ဝယ်ရတော့မှာပေါ့။ ဒီဆိုင်ကယ်လေးနဲ့ လုပ်စားနေရတာ အခုလို စနစ်ပြောင်းတော့ ထမင်းငတ်ပြီပေါ့။”ဟု တောင်ကြီးမြို့ခံ နေ့စားလုပ်စားနေသူ အမျိုးသားတစ်ဦးက ပြောသည်။

စက်သုံးဆီမပြတ်လပ်စေရေးနှင့် စက်သုံးဆီ အမှန်တကယ်လိုအပ်သူများ အဆင်ပြေစွာ ဝယ်ယူနိုင်စေရန် အရောင်းဆိုင်များတွင် တစ်ရက်လျှင် နှစ်ကြိမ်အထက် ဝယ်ယူသူများ ပပျောက်စေ၍ရန် အတွက် အက်ပလီကေးရှင်း ဖြင့် QRကုဒ်ကို အသုံးပြု၍ စိစစ်ရောင်းချမှုများ ဆောင်ရွက်သွားမည်ဟု စစ်ကော်မရှင်လက်အောက်ခံ စက်သုံးဆီစီမံခန့်ခွဲရေးက ယမန်‌ေန့ မတ်လ ၁၁ရက်နေ့တွင် ထုတ်ပြန်ထားသည်။

မော်တော်ယာဉ်များအတွက် Whel Tax တွင်ပါရှိသော Barcod အား ဆိုင်ဝန်ထမ်းမှ scan ဖတ်၍ စနစ်မှ အလိုအလျောက်စစ်ဆေးပြီး တစ်ရက်အတွင်း တစ်ကြိမ်မျှ ဝယ်ယူထားခြင်း မရှိသည့်ယာဉ်များကို မည်သည့် ဆီဆိုင်တွင် မဆို စက်သုံးဆီရောင်းချပေးသွားမည်ဟု ထုတ်ပြန်ချက်တွင် ဖော်ပြထားသည်။

“တောင်ကြီးမှာ လိုင်စင်ရှိတဲ့ ယာဉ်က ခပ်ရှားရှားပဲ၊ ဒီလိုစနစ်နဲ့ စကင်ဖတ်ရင်တော့ တန်းစီတဲ့သူမရှိလောက်တော့ဘူး၊ စက်သုံးဆီဆိုင်လည်း အရောင်းနည်းမှာ၊ အခြေခံလူတန်းစားတွေအတွက် စားဝတ်နေရေး‌ေရာ အကုန်ခက်ကုန်မှာ၊ ဘယ်လိုအတွေးမျိုးနဲ့ ဒီလိုစနစ် သတ်မှတ်လိုက်လည်း မသိဘူး။”ဟု တောင်ကြီးမြို့ခံ အမျိုးသမီးတစ်ဦးက ပြောသည်။

ထို့အပြင် တောင်ကြီးမြို့နယ်၊ရပ်စောက်၊ အောင်ပန်း၊ ညောင်ရွှေ စသည့် မြို့နယ် မှ ဒေသခံ အများစုသည် လျှပ်စစ်ကားနှင့် ဆိုင်ကယ်များကို ပို၍ ဝယ်ယူလာကြသောကြောင့် လျှပ်စစ်ကားနှင့် ဆိုင်ကယ်များ ရောင်းအားကောင်းနေသည်ဟု အဆိုပါ အမျိုးသမီးတစ်ဦးက ပြောသည်။

ကမ္ဘာ့နိုင်ငံရေး အခြေနေနှင့် အရှေ့အလယ်ပိုင်းဒေသတွင် စစ်ရေးပဋိပက္ခများကြောင့် လောင်စာဆီတင်သွင်းသည့် ရေလမ်းကြောင်း တလျှောက် အတားဆီး အဟန့်တားဖြစ်ပေါ် နေခြင်းကြောင့် စစ်ကော်မရှင်တပ်က အကြောင်းပြ ထုတ်ပြန်ထားသည်။

ပြီးခဲ့သည့် မတ်လ (၉)ရက် နေ့မှ စ၍ တောင်ကြီးမြို့တွင် စက်သုံးဆီချွေတာရေး အတွက် စစ်ကော်မရှင်တပ်က သတ်မှတ်ထားသည့် စုံ၊မ ရက် ခွဲ၍ ယာဉ်မောင်းနှင်ရမည်ဟု သတ်မှတ်ပြီး လိုက်နာခြင်းမရှိပါက အရေးယူဆောင်ရွက်သွားမည်ဟု စစ်ကော်မရှင်က ထုတ်ပြန်ထားသည်။