ရှမ်းပြည်နယ် မြောက်ပိုင်း ကျောက်မဲမြို့ရှိ TNLA ထွေအုပ်ရုံးနှင့် သဘာဝပတ်ဝန်းကျင်ရုံးကို စစ်ကောင်စီတပ်က လေကြောင်းဖြင့် ဗုံးကြဲတိုက်ခိုက်ရာ TNLA တပ်ဖွဲ့ဝင် အများအပြား ထိခိုက်သေဆုံးကြောင်း ဖြန့်ချိနေပါသည်။

အဆိုပါ အကြောင်းအရာကို စစ်ကောင်စီဝါဒဖြန့် တယ်လီဂရမ်ချန်နယ်တစ်ခုဖြစ်သော People Media တယ်လီဂရမ်ချန်နယ်က ဇွန်လ ၃၀ ရက်နေ့တွင် ဖြန့်ချိခဲ့ခြင်း ဖြစ်သည်။

၎င်းက “ဇွန်လ ၂၉ ရက် နေ့ခင်း (၂) နာအချိန်က ကျောက်မဲမြို့ရှိ စစ်သွေးကြွ TNLA ထွေအုပ်ရုံးကို တပ်မတော်က လေကြောင်းဖြင့် ပေါင် ၅၀၀ ဗုံးကြဲရှင်းလင်းခဲ့ရာ စစ်သွေးကြွ အဖွဲ့ဝင် ၁၁ ဦးခန့် သေဆုံးခဲ့ပြီး ၂၈ ဦးခန့် ဒဏ်ရာအပြင်းအထန်း ရရှိခဲ့ကြောင်း” ဟု (မူရင်း) ဓာတ်ပုံများနှင့်တကွ ရေးသားဖြန့်ချိခဲ့ရာ ဝင်ရောက်ကြည့်ရှုသူ ၂၀,၀၀၀ ကျော်ရှိသည်။

ထို့ပြင် စစ်ကောင်စီ ဝါဒဖြန့်တယ်လီဂရမ်ချန်နယ်များဖြစ်ကြသော ဝါဝိမ်းနီ၊ Ye’Ba Nyein၊ ရွှေနေကြာများကလည်း အဆိုပါအကြောင်းအရာကို ထပ်ဆင့်ဖော်ပြထားကြသည်။

မူရင်းလင့်ခ် – https://archive.ph/5jdUt

ဝါစိမ်းနီ – https://archive.ph/7oUxy

Ye’ Ba Nyein – https://archive.ph/cCdA1

ရွှေနေကြာ – https://archive.ph/40RrO

တယ်လီဂရမ်တွင် ပျံ့နှံ့နေသော အကြောင်းအရာနှင့် ပတ်သက်၍ MFCN အဖွဲ့ဝင် သျှမ်းသံတော်ဆင့်က စစ်ဆေးကြည့်သည့်အခါ အကြောင်းအရာက တစ်စိတ်တစ်ပိုင်း မှားယွင်းနေကြောင်း စိစစ်တွေ့ရှိရသည်။

သတင်း စိစစ်ချက်

စစ်ဆေးတွေ့ရှိချက်အရ ဇွန်လ ၂၉ ရက်နေ့တွင် ကျောက်မဲမြို့ကို စစ်ကောင်စီက လေကြောင်းဖြင့် ပေါင် ၅၀၀ ဗုံးကြဲတိုက်ခိုက်ခဲ့ရာ လူ ၅ ဦးထက်မနည်း ဒဏ်ရာရရှိသွားခဲ့ကြောင်း ကျောက်မဲမြို့ ပရဟိတအသင်းကို ကိုးကားပြီး ရွှေဖီမြေသတင်းက ဖော်ပြထားသည်။

အလားတူ စစ်ကောင်စီတပ်၏ ဗုံးကြဲမှုကြောင့် ရပ်ကွက် ၁ ပင်လုံလမ်းမဘေးရှိ ရှမ်းကျောင်းကြီး စာသင်ကျောင်းနှင့် သိမ်ကျောင်းအနီး ကျရောက်ပေါက်ကွဲ့ခဲ့ရာ လူ ၅ ဦးထက်မနည်း ဒဏ်ရာရရှိသွားခဲ့ကြောင်း TNLA ၏ထုတ်ပြန်ချက်ကို ကိုးကားပြီး The Irrawaddy သတင်းက ဖော်ပြထားသည်။

ပြီးခဲ့သည့် ဇွန်လ (၂၄) ရက်နှင့် ဇွန်လ (၂၆) ရက်နေ့တွင်လည်း စစ်ကောင်စီတပ်မှ ကျောက်မဲမြို့အတွင်း လေကြောင်းဖြင့် ဗုံးကြဲတိုက်ခိုက်ခဲ့ရာ ပြည်သူ ၅ ဦးသေဆုံးခဲ့ပြီး ကလေးငယ် ၂ ဦးအပါအဝင် ပြည်သူ ၁၆ ဦး ထိခိုက်ဒဏ်ရာရရှိခဲ့ကြောင်း TNLA က ထုတ်ပြန်ထားသည်။

ရွှေဖီမြေ – https://shorturl.at/dhaCT

The Irrawaddy – https://shorturl.at/4tvPr

TNLA ထုတ်ပြန်ချက် – https://shorturl.at/rz33y

သတင်းမီဒီယာများ၏ ဖော်ပြချက်အရ ဒဏ်ရာရရှိသူ ၅ ဦးမှာ ဒေသခံများဟုရေးသားဖော်ပြကြသော်လည်း မြေပြင်သတင်း အလက်အချက်အရ TNLA တပ်ဖွဲ့ဝင်တချို့လည်း ထိခိုက်သေဆုံးမှုရှိကြောင်း ကျောက်မဲမြို့ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“ကျောက်မဲဗုံးကြဲမှုမှာ TNLA တပ်ဖွဲ့ဝင်တချို့လည်း ထိခိုက်သေဆုံးတာတွေ ရှိတယ်။ ပြီးခဲ့တဲ့ တစ်ခေါက်က ဗုံးကြဲခံရတုန်းကလည်း အတူတူပဲ”ဟု ဒေသခံတစ်ဦးက ပြောသည်။
TNLA ထိန်းချုပ်ထားသည့် နောင်ချို၊ နမ္မတူ၊ ကျောက်မဲနှင့် မိုးကုတ်တို့တွင် စစ်ကောင်စီတပ်မှ လေကြောင်း၊ လက်နက်ကြီးနှင့် ဒရုန်းဖြင့် ပစ်ခတ်တိုက်ခိုက်မှုကြောင့် ဇွန်လအတွင်းမှာပင် ပြည်သူ ၅ ဦးသေဆုံးခဲ့ရပြီး ၃၂ ဦး ထိခိုက်ဒဏ်ရာရရှိခဲ့ကြောင်း TNLA က ဇူလိုင် ၂ ရက်နေ့တွင် သတင်းထုတ်ပြန်ထားသည်။

TNLA ထုတ်ပြန်ချက် – https://shorturl.at/vy3TQ

သုံးသပ်ချက်

သတင်းမီဒီယာများနှင့် TNLA ၏ဖော်ပြချက်များအရ ကျောက်မဲမြို့ကို စစ်ကောင်စီတပ်က လေကြောင်းဖြင့် ဗုံးကြဲတိုက်ခိုက်ခဲ့ရာ ဇွန်လ ၂၄ ရက်နေ့မှ ၂၉ ရက်နေ့အတွင်းမှာ ပြည်သူ ၅ ဦးသေဆုံးပြီး ၂၀ ကျော် ထိခိုက်ဒဏ်ရာရရှိကြောင်း သိရသည်။

အဆိုပါ လေကြောင်းတိုက်ခိုက်မှုတွင် TNLA တပ်ဖွဲ့ဝင်တချို့ ထိခိုက်သေဆုံးမှုရှိသည်ဟု ဒေသခံများ၏ ပြောပြချက်အရ သိရသည်။ သို့သော် ထိခိုက်သေဆုံးမှုအများစုမှာ အရပ်သားပြည်သူများဖြစ်ကြောင်း စစ်ဆေးတွေ့ရှိရသည်။

ထိုကြောင့် စစ်ကောင်စီ ဝါဒဖြန့်တယ်လီဂရမ်ချန်နယ်များ ဝါဒဖြန့်သကဲ့သို့ TNLA တပ်ဖွဲ့ဝင် အများအပြား ထိခိုက်သေဆုံးမှုရှိသည် ဆိုသည့် အကြောင်းအရာက တစ်စိတ်တစ်ပိုင်း မှားယွင်းနေကြောင်း စိစစ်တွေ့ရှိရသည်။

အထက်ပါ သတင်းအချက်အလက် စစ်ဆေးမှုများသည် ဇူလိုင် ၂ ရက်နေ့အထိ စစ်ဆေးတွေ့ရှိထားသော သက်သေပြ အချက်အလက်များ ဖြစ်သည်။

စာဖတ်ပရိတ်သတ်များအနေဖြင့် အွန်လိုင်းပေါ်ရှိ သတင်းအချက်အလက် အကြောင်းအရာများကို အလွယ်တကူ မယုံကြည်ဘဲ လွတ်လပ်သည့် သတင်းမီဒီယာဌာနမှ သတင်းများကို ဝင်ရောက်ဖတ်ရှုရန် အကြုံပြု တိုက်တွန်းလိုပါသည်။

ထို့ပြင် သတင်းတု/ သတင်းမှားဟု ယူဆရသော သတင်းအချက်အလက်များဖြစ်စေ၊ မှန်ကန်သော သတင်းများ ဟုတ်/ မဟုတ် အတည်ပြု မေးမြန်းလိုသည်ဖြစ်စေ MNFC နှင့် သျှမ်းသံတော်ဆင့်၏ (chat box) မက်ဆင်ဂျာကနေတစ်ဆင့် ဆက်သွယ်ပြီး အချက်အလက်စစ်ဆေးပေးပို့ရန် အကူညီတောင်းနိုင်ပါသည်။

Myanmar Fact-Checking Network အဖွဲ့ဝင်တွေ၏ အချက်အလက် စစ်ဆေးထားသည့် သတင်းတွေကိုလည်း အောက်မှာဖော်ပြထားသည့် လင့်များတွင် ဝင်ရောက်ဖတ်ရှုနိုင်ပါသည်။

Web-https://myanmarfactcheckingnetwork.org/
Fb-https://www.facebook.com/myanmarfactcheckingnetwork