နေပြည်တော်တွင် “ ငြိမ်းချမ်းရေး ဖိုရမ်” “ Peace Forum” ကျင်းပနေသည့်ကာလ တအာင်း(ပလောင်) အမျိုးသားလွတ်မြောက်ရေးတပ်မတော် (TNLA) ထိန်းချုပ်သော နယ်မြေများကို စစ်ကောင်စီ က လေကြောင်းဖြင့် ဗုံးကြဲတိုက်ခိုက်မှု အကြီးအကျယ်ပြုလုပ်နေသည်။

ယခုရက်ပိုင်း စစ်ကောင်စီလေကြောင်းဖြင့် အကြီးအကျယ် ဗုံးကြဲတိုက်ခိုက်သည့်နေရာများမှာ “၁၀၂၇ စစ်ဆင်ရေး” ဒုတိယလှိုင်း တွင် TNLA ထိန်းချုပ်နိုင်ခဲ့သည့် မိုးကုတ်မြို့၊ ကျောက်မဲမြို့၊ နောင်ချိုမြို့နယ်တို့ ဖြစ်သည်။

TNLA ထိန်းချုပ်သည့်နယ်မြေများကို စစ်ကောင်စီ လေကြောင်းဖြင့် ဗုံးကြဲတိုက်ခိုက်မှုပြုလုပ်နေချိန် တဖက်တွင်လည်း စစ်ကောင်စီ က “ငြိမ်းချမ်းရေး ဖိုရမ်” ခေါင်းစဉ်ဖြင့် နေပြည်တော်တွင် ယမန်နေ့ (ဇွန် ၂၅ရက် မှ ဇွန် ၂၇ )ရက်ထိ သုံးရက်တာ ဆွေးနွေးမှုပြုလုပ်နေသည်။

ထို “ငြိမ်းချမ်းရေးဖိုရမ်” အဖွင့်စကားတွင်လည်း စစ်ခေါင်းဆောင် ဗိုလ်ချုပ်ကြီးမင်းအောင်လှိုင်က “ပဋိပက္ခချုပ်ငြိမ်းရေးနှင့် ထာဝရ ငြိမ်းချမ်းရေးက အသက်နှင့်ရင်းပြီး အရေးကြီးလှကြောင်း” စစ်အာဏာသိမ်းပြီး ၂၀၂၁ခုနစ်နောက်ပိုင်း စစ်ကောင်စီအုပ်ချုပ်လာသည့် ကာလအတွင်း ငြိမ်းချမ်းရေး အတွက် ဘက်ပေါင်းစုံ ကြိုးစားဆောင်ရွက်ခဲ့ကြောင်း” ဆိုပြီး ပြောဆိုခဲ့သည်။

သို့သော် တဖက်တွင်လည်း ယမန်နေ့ (ဇွန် ၂၅ ရက်) ည ၁၁နာရီခွဲဝန်းကျင်တွင် TNLA နှင့် PDF တို့ ပူးတွဲထိန်းချုပ်သည့် မိုးကုတ်မြို့ အုန်းကိုင်းရပ်ကွက် ကို စစ်ကောင်စီ က လေကြောင်းဖြင့် ဗုံးကြဲတိုက်ခိုက်ခဲ့ရာ ကလေးအပါအဝင် အရပ်သား ၃ဦး ထိခိုက်ဒဏ်ရာရခဲ့ကြောင်း TNLA က ယနေ့ (ဇွန် ၂၆)ရက်တွင် သတင်းထုတ်ပြန်ခဲ့သည်။

“မနေ့ ည လူအိပ်မောကျချိန်မှာ လာပစ်သွားတာ၊ လူ ၃ဉီးထိတယ်။ ဒဏ်ရာကတော့မစိုးရိမ်ရဘူး။ ဘယ်ချိန်ထပ်လာမှာလဲ ဆိုတာတော့ စိုးရိမ်နေရတယ်” ဟု မိုးကုတ်မြို့ ဒေသခံ အမျိုးသမီးတစ်ဉီးက သျှမ်းသံတော်ဆင့်ကိုပြောသည်။

မိုးကုတ်မြို့တွင် ယနေ့ (ဇွန် ၂၆ ရက်) နံနက် ၆နာရီပိုင်းအထိ သေနတ်သံများဆက်တိုက် ကြားနေရကြောင်း သိရသည်။

ဆက်လက်ပြီး (ဇွန် ၂၄ ရက်)တွင်လည်း ကျောက်မဲမြို့ ပေါ် လူစည်းကားသည့် နေရာကို စစ်ကောင်စီ က ဉီးတည်ပြီး လေကြောင်းဗုံးကြဲ တိုက်ခိုက်မှုပြုလုပ်ခဲ့ရာ အရပ်သား (၄)ဉီး သေဆုံးခဲ့ပြီး၊ ၁၄ဦး ထိခိုက်ဒဏ်ရာရရှိခဲ့သည်။

စစ်ကောင်စီက လာရောက်ကြဲသည့် ဗုံးသည် ပေါင် ၅၀၀ ဗုံးနှင့် ပေါင် ၃၀၀ ဗုံးများဖြစ်သည်။

ထို့ကြောင့် ကျောက်မဲမြို့ တွင် နေထိုင်သည့် ပြည်သူများသည် စစ်ကောင်စီ မှ လေကြောင်းဖြင့် ဗုံးထပ်မံ လာရောက်ကြဲမည်ကို စိုးရိမ်ထိတ်လန့်နေကြောင်း ကျောက်မဲမြို့ ဒေသခံ အမျိုးသား တစ်ဉီးက သျှမ်းသံတော်ဆင့်ကို ပြောသည်။

“စိတ်ပူစရာတွေကတော့ တိုက်ပွဲတွေဖြစ်ပြီးကတည်း အခုချိန်ထိ ပြည်သူတွေအတွက်ကလည်း ငြိမ်းချမ်းမှုတွေက မရှိသေးဘူး။အလုပ်အကိုင်တွေ အသွားအလာတွေကလည်း အရင်လို ပြန်မဖြစ်သေးဘူးလေ။ ပြီးတော့ (ဇွန်လ ၂၅ ရက်)မှာ ၁ နှစ်ပြည်ပြီလေ။ကျောက်မဲမှာလည်း ဘယ်မှသွားလို့မရလို့ မတက်နိုင်လို့သာ ဆက်နေကြတဲ့လူတွေပါ။ ငြိမ်းချမ်းမှုတွေ ကတော့ မရှိသေးဘူး သူတို့တွေ ပြန်ဆွေးနွေးမှုတွေမရှိသေးရင်ပေါ့”ဟု ကျောက်မဲဒေသခံအမျိုးသားတစ်ဦးက ပြောသည်။

အလားတူ ပြီခဲ့သည့် (ဇွန်လ ၂၄ ရက်) တွင်လည်း နောင်ချိုမြို့နယ် ရွှေသွန်းကျေးရွာအနီးတဝိုက်တွင် စစ်ကောင်စီတပ် ထိုးစစ်ဆင်မှုကြောင့် (TNLA) ပူးပေါင်းတပ်တို့နှင့်တိုက်ပွဲပြင်းထန်ခဲ့ပြီး စစ်ကောင်စီက လေကြောင်းဖြင့် ပေါင် ၅၀၀ ဗုံးအပါအဝင် ဗုံးအလုံး ၈၀ ကျော်ကြဲခဲ့ကြောင်း DPLA မှ ထုတ်ပြန်ခဲ့သည့်။

လက်ရှိတွင်လည်း နောင်ချိုမြို့ ပြန်ရရှိရန်အတွက် နည်းလမ်းပေါင်းစုံ အသုံးပြုပြီး စစ်ရေး တိုက်ခိုက်မှု ပြုလုပ်နေကြောင်း၊ စစ်အင်အားများလည်း ဖြည့်တင်းနေကြောင်း သိရသည်။

“မနေ့ကနေ ဒီနေ့ထိတော့ တိုက်ပွဲဖြစ်ပွားခြင်းမရှိသေးပါဘူး။နှစ်ဖက်တော့ စစ်ရေးအနေအထားအရ အသင့်ပြန်ပြင်တဲ့ အခြေအနေမှာရှိနေပါတယ်။ဇွန်လ ၂၄ ရက်တစ်ရက်ထဲကိုပဲ Jet fighter ၃ စီး Y12 ၃ စီး နဲ့ ဗုံး အလုံး ၈၀ ကျော်ကြဲချတာဗျ။ လေကြောင်းတိုက်ခိုက်မှုက အရင်ထပ်ပိုပြီးသုံးတာမျိုးပါ။” DPLA ၏တာဝန်ရှိသူတစ်ဦး ပြောသည်။

နောင်ချိုမြို့တွင် TNLA နှင့်အတူ ဓနုပြည်သူ့လွတ်မြောက်ရေးတပ်တော်( DPLA) အဖွဲ့လည်းပူးပေါင်းကာ စစ်ကောင်စီကို တိုက်ခိုက်နေသည်။

ထို့ကြောင့် နေပြည်တော်တွင် ကျင်းပသည့် “ငြိမ်းချမ်းရေးဖိုရမ်”တွင် ငြိမ်းချမ်းရေး၊ ရွေးကောက်ပွဲကိစ္စ၊ လက်နက်ကိုင်လမ်းစဉ်ဖြင့် အကြမ်းဖက်လုပ်ရပ်ကြောင့် နိုင်ငံတော်ဆုံးရှုံးနစ်နာမှုကို ထောက်ရှုပြီး နိုင်ငံရေးနည်းလမ်းဖြင့်ဆွေးနွေးရန် စစ်ခေါင်းဆောင်က ပြောဆိုသော်လည်း မြေပြင်တွင် စစ်ကောင်စီတပ်ဖွဲ့က လေကြောင်းဖြင့် ဗုံးကြဲတိုက်ခိုက်မှုပြုလုပ်နေသည်မှာ စဥ်းစားစရာဖြစ်လာသည်။

“ငြိမ်းချမ်းရေး ဖိုရမ် တွင် တရုတ်၊ အိန္ဒိယ၊ ထိုင်း နှင့် ရုရှားနိုင်ငံတို့မှ ကိုယ်စားလှယ်များ တက်ရောက်ခဲ့ပြီး အပစ်ခတ်ရပ်စဲထားသော တိုင်းရင်းသားလက်နက်ကိုင်များ၊ နိုင်ငံရေးပါတီများနှင့် အရပ်ဘက် ကိုယ်စားလှယ်များလည်း တက်ရောက်ကြသည်။

ထို့ပြင် အပစ်ခတ်ရပ်စဲ လက်မှတ်မထိုးထားသည့် ‘ဝ” သွေးစည်းညီညွတ်ရေး “UWSA” ၊မိုင်းလား နှင့် SSPP မှ ကိုယ်စားလှယ်များလည်း တက်ရောက်ကြောင်းသိရသည်။