သျှမ်းပြည် သီပေါမြို့နယ်ရှိ စိန်ကျော့ဌာနေ ပြည်သူ့စစ် ဌာနချုပ်ကို ကိုးကန့်တပ်ဖွဲ့ MNDAA က ထိုးစစ်ဆင်တိုက်ခိုက်ခဲ့ခြင်းကြောင့် စိန်ကျော့ပြည်သူ့စစ်အားလုံး တပ်ဆုတ်ခွာပေးခဲ့ရကြောင်း စုံစမ်းသိရသည်။

ယမန်နေ့ (ဧပြီလ ၂၉ ရက်) နေ့လယ်ပိုင်းတွင် သီပေါမြို့နယ် ဆင်ကျော့ကျေးရွာအုပ်စုရှိ စိန်ကျော့ဌာနေပြည်သူ့စစ် ဌာနချုပ် အနီးတဝိုက်ကို ကိုးကန့်တပ်ဖွဲ့ MNDAA မှ ထိုးစစ်ဆင် တိုက်ခိုက်ခဲ့ခြင်းကြောင့် စဝ်ဆိုင်ဟန် ဦးဆောင်သည့် စိန်ကျော့ပြည်သူ့စစ်အဖွဲ့ဝင် (၁၀၀) ခန့်သည် ညနေ ၄ နာရီကျော်တွင် ဌာနချုပ်နေရာမှ တပ်ဆုတ်ခွာပေးခဲ့ရကြောင်း ဒေသခံများက ပြောသည်။

“အခုတော့ စိန်ကျော့ပြည်သူ့စစ် ဌာနချုပ်နေရာမှာ ကိုးကန့်စစ်သားတွေ အကုန်နေရာယူထားပြီ။ ပြည်သူ့စစ်လုပ်တဲ့ သျှမ်းစစ်သား တစ်ယောက်မှ မရှိတော့ဘူး။ လူကြီးတွေက မဟာမိတ်လို့ ပြောတာကိုး၊ အခု သူများမောင်းထုတ်တော့ မဟာမိတ်လည်း တပ်ဆုတ်ပေးရတာပဲ”ဟု သီပေါဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

တိုက်ပွဲအတွင်း MNDAA ဘက်မှ တပ်သား ၂ ဦး သေဆုံးခဲ့ပြီး ဒဏ်ရာရသူများလည်း ရှိကာ ထိခိုက်သေဆုံးမှု အသေးစိတ်ကို မသိရသေးကြောင်း ဒေသခံများက ပြောသည်။

ယမန်နေ့ (ဧပြီလ ၂၉ ရက်) နံနက်ပိုင်းတွင် ကိုးကန့်တပ် MNDAA မှ နမ္မကျေးရွာအုပ်စုရှိ နမ္မကျောက်မီးသွေးတွင်းမှ SSPP တပ်သားများကို လာရောက်မောင်းထုတ်ခဲ့ရာ နှစ်ဘက်သေနတ်ပစ်ခတ်မှု ဖြစ်ပွားခဲ့သည်။

အလားတူ ယမန်နေ့ ညနေပိုင်းတွင် သီပေါမြို့နယ် ဆောင်ကြဲကျေးရွာအုပ်စု၊ လင်တိ (လႅၼ်တီႈ)၊ ဝမ်စန့်ကျေးရွာများဘက်သို့ MNDAA ဘက်မှ (၁၀၀၀) ခန့် စစ်အင်အားဖြည့်လာခြင်းကြောင့် ဒေသခံများမှာ တိုက်ပွဲဖြစ်ပွားမည်ကို စိုးရိမ်ပြီး ထွက်ပြေးတိမ်းရှောင်နေကြောင်း သိရသည်။

ယမန်နှစ် ၂၀၂၄ စက်တင်ဘာလ ၅ ရက်တွင် စိန်ကျော့ပြည်သူ့စစ်အဖွဲ့ ဥက္ကဋ္ဌ စဝ်လွယ်မောဝ် ဦးဆောင်ပြီး စိန်ကျော့ဌာနေပြည်သူ့စစ်နှင့် ယခင် SSPP မိုင်းခေး တပ်မဟာ (၃) မှ စစ်အင်အား (၁၀၀၀) ခန့်သည် လက်နက်အပြည့်အစုံဖြင့် မူရင်း SSPP/SSA ထံ ပြန်လည်ပူးပေါင်းခဲ့သည်။

MNDAA ထိန်းချုပ်လိုက်သည့် စိန်ကျော့ပြည်သူ့စစ် ဌာနချုပ်သည် ၂၀၁၀ ခုနှစ် မတိုင်မီအချိန်ထိ SSPP/SSA ၏ ယခင် ဌာနချုပ်ဟောင်း ဖြစ်ခဲ့ဖူးပြီး ယမန်နှစ် ၂၀၂၄ ဩဂုတ်လအတွင်း ၎င်းအနီးရှိ စစ်ကောင်စီ ခြေလျင်တပ်ရင်း ခလရ-၂၃ နှင့် ခလရ -၁၄၇ တို့ကို MNDAA မှ တိုက်ခိုက်သိမ်းပိုက်ထားသည်။

အလားတူ ယမန်နေ့ (ဧပြီ ၂၉ ရက်) နေ့လယ် ၁၂ နာရီခွဲခန့်တွင် မူဆယ်မြို့နယ် ပန်ဆိုင်း(ကြူကုတ်)မြို့အနီး နမ့်ဆွမ်းကျေးရွာရှိ SSPP စစ်ဆေးရေးဂိတ်တစ်ခုကို MNDAA တပ်သားများ လာရောက်မီးရှို့ ဖျက်ဆီးခဲ့ကြောင်း ဒေသခံများထံမှ သိရသည်။

ထို့အပြင် ၎င်းဂိတ်ရှိ SSPP အစောင့်တပ်သားများကို နမ့်ပန်းကျေးရွာရှိ MNDAA စစ်ဆေးရေးဂိတ်ဘက် နာရီဝက်ကြာ ခေါ်ဆောင်သွားခဲ့ပြီးနောက် ပြန်လွှတ်ပေးခဲ့ကြောင်း ပန်ဆိုင်းဒေသခံများက ပြောသည်။

“နမ့်ဆွမ်း တံတားနားမှာ SSPP ဂိတ်တစ်ခုရှိတယ်။ နေ့လယ် ၁၂ နာရီခွဲလောက်မှာ အဲ့ဂိတ်ကို ကိုးကန့်တပ်သားတွေ ဝိုင်းလာပြီး ဂိတ်စောင့်တွေကို နမ့်ပန်းဘက် ဖမ်းခေါ်သွားတယ်။ ပြီးတော့ ဂိတ်နေရာကို ကိုးကန့်က မီးရှို့လိုက်တယ်၊ တည်းတဲ့နေရာကိုတော့ မရှို့ဘူး။ နာရီဝက်ကြာတော့ အဲ့ဒီ SSPP တပ်သားတွေကို ပြန်လွှတ်လာတယ်၊ အခု SSPP ပြန်ထိုင်နေပြီ။ နမ္မမှာ တိုက်ပွဲဖြစ်လို့ အကြောင်းရှာချင်တာ”ဟု ပန်ဆိုင်းဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

MNDAA အနေဖြင့် တရုတ်ဖိအားကြောင့် လားရှိုးမြို့ကို စစ်ကောင်စီထံ ပြန်လွှဲအပ်လိုက်သော်လည်း လားရှိုးမြို့ပြင်ရှိ ကျေးရွာများတွင် ဆက်လက်တပ်စွဲထားပြီး သီပေါမြို့နယ်ရှိ နမ္မကျောက်မီးသွေးတွင်းကို အပြည့်အဝ ထိန်းချုပ်နိုင်ရန်အတွက် သျှမ်းတပ် SSPP/SSA နှင့် တိုက်ပွဲများ ဖော်ဆောင်လာကြောင်း ဒေသခံများက ပြောသည်။