သျှမ်းပြည်တောင်ပိုင်း၊ ဟိုပုံးမြို့နယ် မဲနယ်တောင်ဒေသတွင် ငလျင်လှုပ်မည် ဟူသော သတင်းမှားကြောင့် ဒေသခံများ ခြံမသွားရဲကြဘဲ ကွင်းပြင်မှာ စုနေကြကြောင်း စုံစမ်းသိရှိရသည်။
ယနေ့ ဧပြီလ (၂၁) ရက်တွင် လူမှုကွန်ရက် စာမျက်နှာပေါ်များမှ ငလျင်လှုပ်မည်ဟု ဆိုသည့် သတင်းမှား ပျံ့နှံ့မှုကြောင့် ဟိုပုံးမြို့နယ် မဲနယ်တောင်ဒေသ စံဖူးကျေးရွာရှိ ဘုန်းကြီးမှလည်း အန္တရာယ်ကင်းနိုင်စေရန် အဆောက်အဦ မရှိသည့် ကွင်းပြင် နေရာများတွင် နေကြရန် မှာကြားထားသောကြောင့် ရွာလုံးကျွတ် ခြံမသွားကြကြောင်း ဒေသခံများက ပြောသည်။
“ငလျင်လှုပ်ရင် အိမ်ပေါ်မှာထက် အပြင်မှာက ပိုလုံခြုံတော့ အပြင်မှာပဲ နေကြတယ်။ ငလျင်ကြောင့် လူတွေ အများကြီး သေကြတာမြင်တော့ ကြောက်စိတ်ရှိတာပေါ့။ ဘုန်းကြီးကလည်း သတိပေးထားတော့ လုံခြုံစိတ်ချရအောင်လို့ ခြံမသွားကြဘူး”ဟု မဲနယ်တောင် ဒေသခံ အမျိုးသမီးတစ်ဦးက ပြောသည်။
ထို့အပြင် အဆိုပါ ငလျင်သတင်းကြောင့် မနက်ပိုင်းမှ နေ့လည် (၁)နာရီအထိ အဆောက်အဦနှင့် ဝေးရာတွင် နေကြရပြီး ညနေပိုင်းမှ နေအိမ်သို့ ထမင်းပြန်စားကြကြောင်း ၎င်းက ဆက်ပြောသည်။
အလားတူ ရွာငံမြို့နယ်တွင်လည်း အဆိုပါ ငလျင်လှုပ်ခတ်မည်ဟူသော သတင်းမှားကြောင့် ခြံမသွားရဲကြဘဲ တဲအိမ်များတွင်သာ နေထိုင်နေကြရပြီး စိုးရိမ်ကြောက်ရွံ့မှုများ ရှိနေသည်ဟု သိရသည်။
“ဒီနေ့ဆို လက်ဖက်ခူးတောင် ဘယ်သူမှ မသွားကြဘူး၊ အိမ်မှာပဲ နေကြရတယ်။ တိုက်အိမ်ထဲမှာလည်း မနေရဲကြဘူး ဝါးတဲထဲမှာပဲနေရတယ်၊ တော်ကြာ ပိသေမှာစိုးလို့။ လက်ဖက်ခြံသွားမယ်ဆိုလည်း ခြံမှာက ကျောက်တုံးကြီးတွေ ရှိတယ်။ငလျင်လှုပ်ပြီး ကျောက်တုံးလိမ့်လာမှာစိုးလို့” ဟု ရွာငံဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ယခုကဲ့သို့ ငလျင်လှုပ်မည်ဟူသော သတင်းမှားများကို လူမှုကွန်ရက် စာမျက်နှာပေါ်တွင် မကြာခဏ တွေ့လာရပြီး ပြည်သူများ၏ စိုးရိမ်မှုကို ပိုမို မြင့်တက်လာအောင် လုပ်ဆောင်နေခြင်းဖြစ်ပြီး ကောလာဟလ သတင်းများကို အလွယ်တကူ မယုံမိစေလိုကြောင်း ပအိုဝ်းလူငယ် အမျိုးသားတစ်ဦးက အကြံပြုပြောထားသည်။
“မတ်လ (၂၈) ရက်နေ့တုန်းက အင်အားပြင်း ငလျင်လှုပ်ပြီးနောက်မှာ ပြည်သူတွေက စိတ်ဒဏ်ရာတွေ ရသွားကြတယ်။ တစ်ခုခုဆို ငလျင်လှုပ်တယ်ပဲ တွေးနေတာ။ သူတို့မှာ စိတ်ဒဏ်ရာ ရှိထားတော့ လွယ်လွယ်နဲ့ မေ့လို့ရမှာတော့ မဟုတ်ဘူး။ လိုင်းပေါ်မှာ လူစိတ်ဝင်စားမှုရအောင် အခုလို ငလျင်သတင်းတွေကို တင်နေကြတာ။ ငလျင်ဆိုတာက ကြိုတင်ခန့်မှန်းလို့ မရနိုင်တဲ့အကြောင်း ပြည်သူတွေ သိထားမယ်ဆိုရင် စိုးရိမ်မှု လျော့ကျစေနိုင်လိမ့်မယ်” ဟု ၎င်းပအိုဝ်းလူငယ်တစ်ဦးက ပြောသည်။
အလားတူ ပင်လောင်းမြို့နယ်၊ နန်းပန်ကျေးရွာတွင်လည်း ငလျင်လှုပ်မည်ဟူသော သတင်းကြောင့် ဒေသခံများ မိုးကာတဲဆောက်ကာ နေထိုင်နေကြရသည်ဟု သိရသည်။
ယခင် မတ်လ (၂၈)ရက်နေ့တွင် စစ်ကိုင်းမြို့အနီး ဗဟိုပြု လှုပ်ခတ်ခဲ့သော ပြင်းအား (၇.၇) ရစ်ချ်တာစကေးရှိ အင်အားပြင်း ငလျင်ကြောင့် မြန်မာတစ်နိုင်ငံလုံးတွင် စုစုပေါင်း (၄၂၁၂)ဦး သေဆုံးခဲ့ပြီး (၆၅၈၈) ဦးကျော်ဒဏ်ရာ ရရှိခဲ့ကြောင်း သိရသည်။
Leave a Comments