ဂျပန်နိုင်ငံတောင်ပိုင်း၊ ကူမာမိုတိုခရိုင် (Kumamoto Prefecture) တွင် ယမန်နေ့ (ဇူလိုင် ၂၈ ရက်) က ပြင်းအား ၇.၁ ရှိ ပြင်းထန်သော ငလျင် လှုပ်ခတ်ခဲ့ရာ လူသေဆုံးမှုရှိပြီး၊ သောင်းနှင့်ချီသော နေအိမ်များ လျှပ်စစ်မီး ပြတ်တောက်ကာ လမ်းပန်းဆက်သွယ်ရေးနှင့် စက်ရုံများ လည်ပတ်မှုများ ထိခိုက်ပျက်စီးခဲ့ကြောင်း သိရသည်။

ငလျင်ကြောင့် စျေးဝယ်စင်တာတစ်ခုအတွင်း ပေါက်ကွဲမှုဖြစ်ပွား၍ အသက် ၂၀ အရွယ် အမျိုးသမီး ၂ ဦး သေဆုံးခဲ့ရပြီး၊ အခြားမြို့တစ်မြို့တွင်လည်း အဆောက်အအုံ ပြိုကျမှုကြောင့် လူတစ်ဦး သေဆုံးခဲ့သည်။

ငလျင်၏ ဗဟိုချက်မှာ လူဦးရေ ၇ သိန်း ခန့် နေထိုင်သည့် ကူမာမိုတိုမြို့၏ တောင်ဘက် ၁၂ မိုင် (၂၀ ကီလိုမီတာ) အကွာတွင် ဖြစ်ပေါ်ခဲ့ခြင်းဖြစ်သည်။

ငလျင်လှုပ်ပြီးနောက် ဆိုင်ပေါင်း ၂၀၀ ခန့်ရှိသော Aeon Mall Kumamoto စျေးဝယ်စင်တာ၏ ဘေးတစ်ဖက်မှာ ပြင်းထန်စွာ ပေါက်ကွဲခဲ့ပြီး အပျက်အစီးများ ပြန့်ကျဲသွားခဲ့သည်။ အာဏာပိုင်များက ဓာတ်ငွေ့ယိုစိမ့်မှုမှတစ်ဆင့် ပေါက်ကွဲခြင်းဖြစ်နိုင်သည်ဟု ယူဆကာ စုံစမ်းစစ်ဆေးလျက်ရှိသည်။

ထို့ပြင် Nippon Paper Industries စက်ရုံ၏ မီးခိုးခေါင်းတိုင် ပြိုကျမှုကြောင့် လူပေါင်းများစွာ ပျောက်ဆုံးနေဆဲဖြစ်ပြီး ဆေးရုံအချို့တွင်လည်း ဒဏ်ရာရသူများပြားလျက်ရှိသည်။

ဂျပန်ဝန်ကြီးချုပ် ဆာနာအဲ တာကာအိချိ (Sanae Takaichi) က အာဏာပိုင်များအနေဖြင့် ပျက်စီးဆုံးရှုံးမှု အခြေအနေအပြည့်အစုံကို စိစစ်နေဆဲဖြစ်ကြောင်းနှင့် နေရာအချို့တွင် မီးလောင်မှု၊ လျှပ်စစ်မီးပြတ်တောက်မှုနှင့် လမ်း၊ တံတားများ ပြိုကျမှုများ ဖြစ်ပေါ်ခဲ့ကြောင်း ပြောကြားခဲ့သည်။

ယနေ့(ဇူလိုင် ၂၉)ရက် တွင်လည်း ပို့ဆောင်ရေးလုပ်ငန်းနှင့် စက်ရုံများ လုပ်ငန်းခေတ္တရပ်ဆိုင်းထားသည်။

ငလျင်ကြောင့် ကူးရှူး (Kyushu) ကျွန်းပေါ်ရှိ နေအိမ် ၄၈,၀၀၀ ကျော် လျှပ်စစ်မီး ပြတ်တောက်ခဲ့ပြီး ပြင်းထန်အဆင့်ရှိ နောက်ဆက်တွဲ ငလျင်များ ဆက်လက်လှုပ်ခတ်နေသဖြင့် ဒေသခံ ၃ သိန်း ခန့်ကို ဘေးလွတ်ရာသို့ ရွှေ့ပြောင်းကြရန် ညွှန်ကြားထားသည်။

ကျည်ဆန်ရထား ပြေးဆွဲမှုများအပါအဝင် ရထားလမ်းပိုင်းများ ရပ်နားထားပြီး၊ ကူမာမိုတို လေဆိပ်ပြေးလမ်းကိုလည်း ပိတ်ထားခဲ့ရသည်။ ထို့ပြင် ကမ္ဘာ့အကြီးဆုံး ဆီမီးကွန်ဒက်တာ ထုတ်လုပ်သည့် TSMC၊ Sony၊ Fujifilm၊ Tokyo Electron နှင့် Honda မော်တော်ဆိုင်ကယ် စက်ရုံတို့ကလည်း ၎င်းတို့၏ စက်ရုံများအတွင်းရှိ လုပ်သားများကို ဘေးလွတ်ရာသို့ ရွှေ့ပြောင်းပေးခဲ့ပြီး လုပ်ငန်းများကို ခေတ္တရပ်ဆိုင်းထားသည်။

ဂျပန်နျူကလီးယား စည်းမျဉ်းထိန်းသိမ်းရေး အာဏာပိုင်အဖွဲ့က ဒေသတွင်းရှိ နျူကလီးယား ဓာတ်အားပေးစက်ရုံများတွင် ပုံမှန်မဟုတ်သည့် ထိခိုက်မှုများ မရှိကြောင်း အတည်ပြုထားသည်။

ဂျပန် မိုးလေဝသအေဂျင်စီက ငလျင်ဒဏ် ပြင်းထန်စွာ ခံစားခဲ့ရသည့် ဒေသများတွင် လာမည့် တစ်ပတ်ခန့်အထိ နောက်ဆက်တွဲ ငလျင်များနှင့် မြေပြိုမှု အန္တရာယ်များကို သတိထားကြရန် သတိပေးထားသည်။

ထို့အပြင်ယနေ့ (ဇူလိုင် ၂၉)ရက်တွင်လည်း အပူချိန် ၃၄ ဒီဂရီ စင်တီဂရိတ်ထိ မြင့်တက်လာနိုင်သဖြင့် ဘေးလွတ်ရာ ရောက်ရှိနေသူများအနေဖြင့် အပူရှိပ်မှု (Heatstroke) အန္တရာယ်ကိုပါ သတိပြုကြရန် ထပ်မံ အသိပေးထားသည်။

ကိုးကား – Reuters