သျှမ်းပြည်တောင်ပိုင်းတွင် ငလျင်လှုပ်ခတ်ပြီးနောက်ပိုင်း ဘိလပ်မြေဝယ်ယူသူ များလာခြင်းကြောင့် ဈေးနှုန်းအဆမတန် မြင့်တက်နေလျှက်ရှိသည်ဟု စုံစမ်းသိရှိရသည်။
ပြီးခဲ့သည့် မတ်လ (၂၈) ရက်တွင် အင်အားပြင်း ငလျင်လှုပ်ခတ်ပြီးနောက်ပိုင်း သျှမ်းပြည်တောင်ပိုင်းရှိ မြို့နယ်များတွင် ဘိလပ်မြေဈေးနှုန်းများ တစ်အိတ်လျှင် ကျပ်(၃၄၀၀၀)အထိ အဆမတန် မြင့်တက်လာသောကြောင့် ဆောက်လုပ်ရေး လုပ်ကိုင်သူများနှင့် ငလျင်ဒဏ်သင့် အိမ်များ ပြန်လည်ပြုပြင်ရန် လိုအပ်သူများအတွက် အဆင်မပြေမှုများနှင့် ကြုံတွေ့နေရသည်ဟု သိရသည်။
ရွာငံမြို့နယ်တွင် ဘိလပ်မြေဈေး အဆမတန် မြင့်တက်လာခြင်းကြောင့် ဆောက်လုပ်ဆဲ နေအိမ်များနှင့် ငလျင်ဒဏ်သင့်ပြီးနောက် ပြန်လည်ပြုပြင်ရမည့် အိမ်များမှ ပြည်သူများ အခက်အခဲများနှင့် ကြုံတွေ့နေရပြီး ဘိလပ်မြေတစ်အိတ်လျှင် ကျပ်(၃၄၀၀၀)အထိ ဈေးကြီးပေး ဝယ်ယူနေရသည်ဟု ရွာငံဒေသခံ အမျိုးသားတစ်ဦးက ပြောသည်။
“ကျနော်တို့နားမှာ ဆောက်လက်စအိမ်တွေဆို ဒီအတိုင်း ထားရတယ်။ ဆက်ပြီး အိမ်မဆောက်နိုင်သေးဘူး၊ ဘိလပ်မြေဈေးကလည်း ကြောက်စရာကြီး။ တစ်သက်နဲ့တစ်ကိုယ် မကြားဖူးဘူး။ ငလျင်လှုပ်တုန်းက ဘုရားတွေ ပြိုတဲ့ဟာလည်း ခုထိ မပြင်နိုင်သေးဘူး။ စားဖို့တောင် အနိုင်နိုင်နဲ့၊ အလုပ်ကလည်း ရှားနေတာ ဆိုတော့ မလွယ်ကူနေဘူး” ဟု ရွာငံဒေသခံ အမျိုးသားတစ်ဦးက ပြောသည်။
အလားတူ အင်းလေးတွင်လည်း ယခင်က ဘိလပ်မြေဈေး တစ်အိတ်လျှင် (၁၇၀၀၀) ကျပ်သာ ရှိသော်လည်း ယခုလက်ရှိတွင် ကျပ်(၂၅၀၀၀) အထိ ရှိလာပြီး တခါတရံ ဈေးပိုမြင့်နိုင်သည်ဟု အင်းလေးဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“အခုက ဘိလပ်မြေတွေ ဈေးတက်လာတယ်။ အင်းထဲမှာလည်း ငလျင်လှုပ်တော့ မြေအနေအထားတွေ မမှန် ဖြစ်ကုန်တယ်။ အရင်က ရေထဲမှာ တိုင်စိုက် ဆောက်ရပေမဲ့ အခု မရတော့ဘူး၊ ဘိလပ်မြေသုံးပြီး ဆောက်မှရမှာ။ ကျမတို့ အင်းလေးက နွေဆိုလည်း ရေခမ်းတော့ သွားရေးလာရေးခက်ခဲ၊ မိုးရွာလည်း ရေကြီးတော့ အဆင်မပြေ။ ငလျင်ဒဏ်ကြောင့်လည်း ဒုက္ခရောက်၊ ဘိလပ်မြေဈေးကြီးလို့ အိမ်ကလည်း မပြင်နိုင်သေးဘူး” ဟု အင်းလေး ဒေသခံ အမျိုးသမီးတစ်ဦးက ပြောသည်။
ဆက်လက်ပြီး တောင်ကြီးမြို့ရှိ ဘိလပ်မြေ တစ်အိတ်ဈေးနှုန်းသည် ယခင်က ကျပ်တစ်သောင်းကျော် ဝန်းကျင်သာ ရှိခဲ့သော်လည်း ယခုရက်ပိုင်းအတွင်း Alpha တံဆိပ် ဘိလပ်မြေတစ်အိတ်ကို ကျပ်(၃၄၀၀၀)၊ အပါချီ တံဆိပ် ဘိလပ်မြေတစ်အိတ်လျှင် ကျပ်(၃၃၀၀၀)နှင့် ကြံ့နီတံဆိပ် ဘိလပ်မြေတစ်အိတ်လျှင် ကျပ်(၃၃၀၀၀) အထိ ဈေးမြင့်တက်လာနေသည်ဟု တောင်ကြီးမြို့ခံ ကုန်မာဆိုင်ပိုင်ရှင် အမျိုးသားတစ်ဦးထံမှ သိရသည်။
“ခုတလောက ဈေးမငြိမ်ဘူး၊ ဘိလပ်မြေတစ်အိတ်ကို ကျပ် (၃၄၀၀၀) လောက်ရှိတယ်။ ဘိလပ်မြေ အတုတွေလည်း ပေါလာတော့ ဈေးတွေ မငြိမ်တာလည်း ပါမယ်ထင်တယ်။ ခေတ်မကောင်းတော့ အတုတွေ လုပ်တဲ့သူ ပိုများလာတော့ ပြည်သူတွေပဲ ပိုခံရတာပေါ့လေ” ဟု အဆိုပါ အမျိုးသားက ပြောသည်။
ဘိလပ်မြေ အတုဆိုသည်မှာ ဘိလပ်မြေ အစစ်ကို အိတ်အရေအတွက် တိုးလာစေရန်အတွက် အစစ်တစ်ဝက် အတုတစ်ဝက် ရောစပ်ထားသည့် အိတ်များ ဖြစ်၍ အလွယ်တကူ ခွဲခြားနိုင်ရန် မလွယ်ကူကြောင်း ၎င်းအမျိုးသားက ဆက်ပြောသည်။
ဘိလပ်မြေ အတု အစစ် ခွဲခြားရန် အလွယ်ကူဆုံး နည်းလမ်းမှာ ဘိလပ်မြေအမှုန့်ပေါ်သို့ သံပရာရည် (သို့မဟုတ်) ရှောက်ရည် အနည်းငယ်ကို ညှစ်လိုက်၍ အစစ်ဆိုလျှင် ပွက်ပွက်ဆူလာမည်ဖြစ်ပြီး အတုဆိုလျှင် ဆူပွက်လာခြင်း မရှိကြောင်း သရက်မြို့မှ ဘိလပ်မြေစက်ရုံ အမှတ်(၁)၊ အမျိုးအစား စစ်ဆေးရေးဌာနမှ ဦးအေးကျော် ၏ အကြံပြုချက်အရ သိရသည်။
ပြီးခဲ့သည့် ဧပြီလ (၂၃) ရက်နေ့တွင်လည်း ဘိလပ်မြေအရောင်းဆိုင်များအား ဈေးနှုန်းမှန်ကန်မှု ရှိစေရေးအတွက် သက်ဆိုင်ရာ ဌာနများက လိုက်လံစစ်ဆေးစဉ် အေးသာယာမြို့၊ ရပ်ကွက်(၅)၊ အမှတ် (၅၃)ရှိ “ပြည့်စုံအောင်” ဘိလပ်မြေဂိုဒေါင်တွင် ကျောက်စာမှုန့်များနှင့် ဘိလပ်မြေများ ရောစပ်ပြီး ဘိလပ်မြေ အတု ထုတ်လုပ်ရောင်းချနေသဖြင့် အဆိုပါ ဆိုင်ရှင်နှင့် အလုပ်သမား(၇)ဦးကို အေးသာယာနယ်မြေ ရဲစခန်းတွင် ရာဇသတ်ကြီး ပုဒ်မ -၄၄၂၀/၄၆၈/ ၁၁၄ တို့ဖြင့် အမှုဖွင့်ထားကြောင်း သိရသည်။
Leave a Comments