သျှမ်းပြည် ကွတ်ခိုင်မြို့တွင် ငလျင်ဒဏ်အတွက် အလှူငွေ ကောက်ခံသည့် နေရာ၌ တအာင်း(ပလောင်)အမျိုးသားလွတ်မြောက်ရေးတပ်မတော် TNLA နှင့် ကိုးကန့်တပ်ဖွဲ့ MNDAA တို့ ခိုက်ရန်ဖြစ်ပွားခဲ့ကြောင်း စုံစမ်းသိရသည်။

ယနေ့ (ဧပြီလ ၁ ရက်) နေ့လယ် ၁၁ နာရီခွဲတွင် ကွတ်ခိုင်မြို့မဈေး နေရာ၌ ကိုးကန့်တပ်ဖွဲ့ MNDAA မှ မဏ္ဍပ်ဖွင့်လှစ်ကာ ငလျင်ဒဏ်အတွက်အလှူငွေကောက်ခံနေစဉ် TNLA တပ်သားများ ရောက်ရှိလာပြီး နေရာမှ ထွက်ခွာသွားရန် နှင်ထုတ်ခဲ့ခြင်းကြောင့် နှစ်ဘက်တပ်သားများ ခိုက်ရန်ဖြစ်ပွားခဲ့ကြောင်း ဒေသခံများက ပြောသည်။

“ဈေးနားမှာ ကိုးကန့်တပ်ကို အလှူခံမဏ္ဍပ်ကနေ ထွက်သွားဖို့ ပလောင်စစ်သားက လာပြောတာ။ အဲ့ကနေ စပြီးတော့ ရန်ဖြစ်ကြတာ၊ ကိုးကန့်ဘက်က သေနတ်ဒင်နဲ့ ထုလိုက်လို့ ပလောင်စစ်သားတစ်ယောက် ခေါင်းပေါက်ပြီး သေတယ်ပြောတယ်။ အခုနှစ်ဘက်လုံး အင်အားဖြည့်ပြီး စစ်ရေးတင်းမာနေကြတယ်” ဟု ကွတ်ခိုင်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

လက်ရှိဖြစ်ပွားခဲ့သည့် ဖြစ်စဉ်မှာ TNLA ထိန်းချုပ်ထားသည့် ကွတ်ခိုင်မြို့ပေါ်တွင် MNDAA မှ ခွင့်ပြုချက်တောင်းခံခြင်း မရှိဘဲ အလှူခံမဏ္ဍပ်ဖွင့်လှစ်ခြင်းကြောင့် TNLA တပ်သားများမှ လာရောက်နှင်ထုတ်ခဲ့ကြောင်း ဒေသခံများက ပြောဆိုသော်လည်း သျှမ်းသံတော်ဆင့်မှ TNLA ပြောရေးဆိုခွင့်ရှိသူထံ အတည်ပြုနိုင်ရန် ဆက်သွယ်မေးမြန်းနေသည်။

ကွတ်ခိုင်မြို့ TNLA နှင့် MNDAA နှစ်ဘက်တပ်ဖွဲ့ ခိုက်ရန်ဖြစ်ပွားမှုအတွင်း TNLA တပ်သားတစ်ဦး ဦးခေါင်းရိုက်နှက်ဒဏ်ရာဖြင့် သေဆုံးခဲ့ကြောင်း ကနဦး သိရှိရသော်လည်း အသေးစိတ်ကို ဆက်လက်စုံစမ်းနေသည်။

ကွတ်ခိုင်မြို့ ပြည်ထောင်စုလမ်းမကြီးပေါ်တွင် ငလျင်ဒဏ် ကူညီရန်အတွက် တအာင်းပညာရေးကောင်စီ TLEC မှ ဆရာ၊ ဆရာမများနှင့် ပြည်သူများလည်း အလှူငွေ ကောက်ခံနေကြောင်း သိရသည်။

ပြီးခဲ့သည့် မတ်လ ၇ ရက်ကလည်း ကွတ်ခိုင်မြို့ပေါ် ဖွင့်လှစ်ထားသည့် KIA ဆက်ဆံရေးရုံးသို့ TNLA ဘက်မှ အင်အားအများအပြားဖြင့်ရောက်ရှိလာပြီး ဆက်ဆံရေးရုံးနှင့် နားနေဆောင်ရှိ နေရာ (၂) ခုမှ KIA တပ်သား (၄၀) ခန့်ကို ကားတင်ခေါ်ဆောင်ကာ နမ့်ဖတ်ကာဘက်သို့ပို့ဆောင်လိုက်ကြောင်း ကွတ်ခိုင်ဒေသခံများက ပြောသည်။