ထိုင်းနိုင်ငံ ဘန်ကောက်မြို့ Chatuchak ခရိုင်ရှိ ဆောက်လက်စတိုက်သစ် သည် ယနေ့ (မတ် ၂၈)ရက် ထိုင်းစံတော်ချိန် ၁နာရီခွဲတွင် အင်အားပြင် ငလျင်လှုပ်ခတ်မှုကြောင့် ပြိုကျခဲ့ပြီး၊ ၎င်းအဆောက်အဉီ၏ အပျက်အစီးများအောက်တွင် ပျောက်ဆုံးသူ ၈၁ဉီးရှိပြီး သေဆုံးသူ ၃ဦး ရှိကြောင်း ထိုင်းနိုင်ငံ သတင်းဌာနများဖော်ပြချက်အရသိရသည်။

ပြိုကျသွားသည့် အဆောက်အဉီ၏ အပျက်အစီးများအောက်ကို ပျောက်ဆုံးသောသူ ၈၁ ဉီးရှိပြီး ရှာဖွေရန် ကယ်ဆယ်ရေးခွေးများနှင့် အတူ ရှာဖွေကယ်ဆယ်ရေး တာဝန်ရှိသူများက ယနေ့ (မတ် ၂၈)ရက် ညနေပိုင်းတွင် လုပ်ဆောင်နေသည်။

ထိုပျောက်ဆုံးနေသည့် အလုပ်သမား ၈၁ဉီးထဲတွင် မြန်မာရွှေ့ပြောင်းအလုပ်သမားများလည်း ပါရှိကြောင်းသိရသည်။

“ ကျနော်ရဲ့ အမျိုးသမီးအထဲမှာကျန်ခဲ့တယ်။ သူဘယ်အထပ်မှာလည်းမရှိဘူး။ ကူပေးကြပါ” ဟု ထိုပြိုကျသည့် မိုးမျှော်တိုက်မှ လွှတ်မြောက်လာသည့် မြန်မာရွှေ့ပြောင်းအလုပ်သမားတစ်ဉီး က ငိုပြီး ထိုင်းမီဒီယာများကို ဖြေကြားခဲ့သည်။

မြန်မာနိုင်ငံ စစ်ကိုင်းတိုင်းကိုဗဟိုပြု၍ ပြင်းအား ၈ ရစ်ချ်တာစကေးနီးပါးရှိသည့် ငလျင်လှုပ်ခတ်မှုကြောင့် ထိုင်းနိုင်ငံဘန်ကောက်မြို့နှင့် အနီးတဝှိက်ရှိ နေရာအများအပြား ငလျင်ရိုက်ခတ်မှုကို ခံရသည်။

“အစက ကျမ ဖျားနေတယ်ထင်တယ်၊ ခေါင်းမူးသလို မူးလဲတော့မယ် ထင်တယ်၊ နောက်တော့ မီးပုံးတွေ ရွေ့နေတာကို သတိထားမိတယ်။ အဲ့မှ ငလျင်လှုပ်နေတာသိတယ်။” ဟု အဆောက်အဦမှ ထွက်ပြေးလွှတ်မြောက်လာသည့် ရုံးဝန်ထမ်းတဦးက ထိုင်းသတင်းမီဒီယာကို ပြောဆိုခဲ့ခြင်းဖြစ်သည်။

ထိုအဆောက်အဉီထဲ ပုံမှန်အားဖြင့် ကုမ္ပဏီ ဝန်ထမ်းနှင့် ဆောက်လုပ်ရေးဝန်ထမ်း ၄၀၀ နီးပါး အလုပ်လုပ်လေ့ရှိကြောင်း သတင်းဌာနတွင်ဖော်ပြထားသည်။

လက်ရှိမှာ ဘန်ကောက်မြို့ကို သဘာဝဘေးအန္တရာယ်ဇုန် သတ်မှတ်ပြီး နိုင်ငံလုံးဆိုင်ရာ အရေးပေါ်ငလျင် သတိပေးချက် ထုတ်ပြန်လိုက်သည်။

ဘန်ကောက်မြို့ တွင် ဆောက်လုပ်ဆဲ မိုးမျှော်တိုက်သည် အထင်ရှားဆုံး အပျက်အစီးဖြစ်ပြီး အခြားအဆောက်အဉီများသည် အက်ကြောင်းများရှိကာ အချို့တိုက်များလည်း နံရံများပျက်စီးမှုရှိကြောင်းသိရသည်။

ယနေ့လှုပ်ခတ်သည့် ငလျင်သည် နှစ်ပေါင်း ၁၀၀ အတွင်း မကြုံစဖူးဖြစ်ကြောင်း၊ နောက်ဆက်တွဲ ငလျင်များအတွက် စိုးရိမ်သဖြင့် အနီးကပ်စောင့်ကြည့်ရန် လိုအပ်ကြောင်းလည်း ထိုင်းဝန်ကြီးချုပ် Paetongtarn Shinawatra ပြောဆိုလိုက်သည်။