တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် မိုးကုတ်မြို့တွင် မြို့စောင့်တပ်ဖွဲ့စည်းရန် တပ်သားစုဆောင်းမှုကြောင့် ဒေသခံများ ထပ်မံထွက်ပြေး တိမ်းရှောင်နေရကြောင်း စုံစမ်းသိရသည်။

မတ်လ (၆) ရက်မှ စတင်ပြီး မိုးကုတ်မြို့ပေါ်ရှိ အုပ်ချုပ်ရေးမှူးများကို TNLA ဘက်မှ ခေါ်ယူတွေ့ဆုံခဲ့ကာ မြို့စောင့်တပ် ဖွဲ့စည်းရန်နှင့် အသက် ၁၈ နှစ်မှ ၄၅ နှစ်ကြား ကျား/မ မရွေး တပ်သားစုဆောင်းမည်ဟု ညွှန်ကြားခဲ့ခြင်းကြောင့် ဒေသခံများ ထပ်မံထွက်ပြေး နေရကြောင်း မိုးကုတ်မြို့ခံ အမျိုးသားတစ်ဦးက သျှမ်းသံတော်ဆင့်ကို ပြောဆိုသည်။

“မိုးကုတ်မှာ လီဆူတို့ ကချင်တို့ လော်ဝေါ်တို့ ဂေါ်ရခါးတို့ မျိုးနွယ်အများကြီးရှိတော့ တစ်အိမ်တစ်ယောက်နှုန်း ကောက်တယ်လို့တော့ ပြောတယ်၊ တချို့လူတွေတောင် ပြန်ပြေးနေကြပြီ။ စစ်မှုထမ်းပုံစံမျိုး အိမ်ထောင်စုတစ်စုကို တစ်ယောက်နှုန်းတော့ ပေးရမယ်ပေါ့ အဲ့လိုမျိုး၊ မပေးရင်လည်း သူတို့ကို ငွေ သိန်း ၂၀ လောက် ပေးရင် လွှတ်တယ်”ဟု ၎င်းဒေသခံ အမျိုးသားက ပြောသည်။

မိုးကုတ်မြို့တွင် TNLA မှ မြို့စောင့်တပ် ထပ်မံဖွဲ့စည်းခြင်းနှင့် ပတ်သက်၍ သျှမ်းသံတော်ဆင့်မှ TNLA ပြောရေးဆိုခွင့်ရှိသူ လွေးယေဦးထံ စာပို့မေးမြန်းထားသော်လည်း ပြန်လည်ဖြေကြားခြင်း မရှိသေးပါ။

မတ်လ (၁၀) ရက်နေ့တွင် မိုးကုတ်မြို့ပေါ် ရပ်ကွက်အုပ်ချုပ်ရေးမှူးများမှ ရပ်ကွက်နေပြည်သူများကို အကြောင်းစုံ ပြန်လည်ရှင်းပြခဲ့ပြီးနောက် မြို့စောင့်တပ် ဖွဲ့စည်းရန် တပ်သားစုဆောင်းခြင်းကို ကန့်ကွက်ကြောင်း ယမန်နေ့ (မတ်လ ၁၂ ရက်)တွင် မြို့မိမြို့ဖများမှ ဦးဆောင်ကာ TNLA ထံ စာပေးပို့ခဲ့သည်ဟု သိရသည်။

မိုးကုတ်မြို့ကို TNLA သိမ်းပိုက်ထားသည့် ၇ လ အတောအတွင်း လူမျိုးဘာသာ၊ ကျား/မ မရွေး တပ်သားစုဆောင်းရန် လုပ်ဆောင်လာခြင်းဖြစ်ပြီး မြို့ပေါ်ရှိ လီဆူးနှင့် ဂေါ်ရခါးလူမျိုးတို့ကို စစ်သင်တန်းပေးပြီး တပ်ရင်းအဖြစ် ဖွဲ့စည်းထားကြောင်း ဒေသခံများက ပြောဆိုသည်။

“မိုးကုတ်ကျတော့ လူအင်အားက မိုးကုတ်ဗျူဟာ ရှိတယ်လေ၊ ပလောင်ဆိုရင် TNLA က ယူသွားတယ်။ လီဆူတို့၊ ဂေါ်ရခါးတို့ ဆိုလည်း သူတို့တပ်ရင်းတွေဆီ သွားရတယ်။ လူကောက်တာတော့ TNLA အာဏာနဲ့ သွားတာပေါ့။ အဲ့အဖွဲ့တွေကို ကိုယ့်မြို့နဲ့ကိုယ်ပဲ ထားခဲ့တာ။ ကျန်တဲ့ဟာတော့ တိုက်ခိုက်ရေးသွားရမယ် အဲ့လိုရှိလာတယ်”ဟု မိုးကုတ်ဒေသခံ အမျိုးသားက ထပ်လောင်းပြောသည်။

မိုးကုတ်မြို့ကို “၁၀၂၇ စစ်ဆင်ရေး” ဒုတိယပိုင်းအတွင်း ယမန်နှစ် ၂၀၂၄ ဇူလိုင်လ ၂၄ ရက်တွင် TNLA နှင့် ပူးပေါင်းတပ်ဖွဲ့များက ထိန်းချုပ်နိုင်ခဲ့ပြီးနောက် တိုက်ပွဲငြိမ်သက်နေစဉ် ဒေသခံအများစု နေရပ်ပြန်ခဲ့ကြသည်။

ယခင်က မိုးကုတ်မြို့ပေါ်ရှိ မူးယစ်ဆေးဝါး သုံးစွဲသူများနှင့် မာရှယ်လော ကန့်သတ်ထားသည့် အချိန်အတောအတွင်း ဖမ်းဆီးရမိသူများကိုလည်း TNLA စစ်သားစုဆောင်းရေးသို့ ပို့ဆောင်ပြီး စစ်သင်တန်းပေးကြောင်း ဒေသခံများက ပြောသည်။

“မူးယစ်ဆေး သုံးတဲ့လူတို့၊ မြို့မှာ ဆိုရင် အပျော်အပါး သွားတဲ့လူတို့ အဲ့တာတွေကို TNLA က ဆွဲတာလေ။ နောက်ဆုံးပြစ်ချက်က ဘာလဲဆိုတော့ အချိန်မတော် သွားလာလို့၊ သူတို့က ည ၆ နာရီ မာရှယ်လော ထုတ်တာတို့ အမျိုးမျိုးပေါ့။ တကယ်တမ်းက လူစုချင်လို့၊ ဘာမှ မပေးနိုင်တဲ့လူဆိုရင်တော့ စစ်သားစုဆောင်းတဲ့ထဲ ပါသွားတယ်”ဟု ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

TNLA မှ ယခုထပ်မံ ဖွဲ့စည်းမည့် မြို့စောင်တပ်အတွက် ဒေသခံများကို စစ်သင်တန်းပေးမည်ဟု ကနဦး ကြားသိရသော်လည်း မြို့မိမြို့ဖများမှ ကန့်ကွက်ထားခြင်းကြောင့် မည်သို့ ဆက်လက်ဆောင်ရွက်မည်ကို မသိနိုင်သေးကြောင်း ၎င်းဒေသခံ အမျိုးသမီးက ဆက်ပြောသည်။

သျှမ်း-မန္တလေးနယ်စပ် ကျောက်မျက်ရတနာ ထွက်ရှိသည့် မိုးကုတ်မြို့တွင် TNLA က အုပ်ချုပ်ရေးယန္တရား ဖော်ဆောင်နေပြီး ပြည်သူ့ကာကွယ်ရေးတပ် PDF မိုးကုတ်ဗျူဟာတပ်ရင်း (၁၂၂၁၊ ၁၂၂၂၊ ၁၂၂၃) ၊ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး ABSDF နှင့် ကချင်လွတ်လပ်ရေးတပ် KIA တို့လည်း သွားလာလှုပ်ရှားနေသည်။