စစ်ကောင်စီနှင့် တွေ့ဆုံဆွေးနွေးလိုသည့် အတွေးအခေါ်မျိုးမရှိသင့်ကြောင်း၊ စစ်ကောင်စီနှင့် ဆွေးနွေးချင်သည့် အတွေးခေါ်ရှိနေလျှင် အာဏာရှင် ကို အမြစ်ပြတ်ဖြစ်မည်ကို မကြိုက်သည့် သဘောဆောင်ကြောင်း ပအိုဝ်းအမျိုးသားလွတ်မြောက်ရေး အဖွဲ့ချုပ်(PNLA/PNLO)မှ ဗိုလ်ချုပ် ခွန်သူရိန် က ပြောဆိုလိုက်သည်။

အဆိုပါ ပြောဆိုမှုသည် ယနေ့ (မတ် ၁၃)ရက် ကျရောက်သည့် ပအိုဝ်းအမျိုးသားနေ့တွင် ပြောဆိုလိုက်ခြင်းဖြစ်သည်။

“စစ်ကောင်စီနဲ့ တွေ့ပြီး ညှိနိူင်းနေတာက အာဏာရှင်စနစ်ကို သက်ဆိုးရှည်စေသလိုပဲ။ ဒီတစ်ခုကတော့ တော်လှန်ရေးအင်အားစုတွေ မှတ်သားထားရမယ်။စစ်ကောင်စီက ကျနော်တို့ကို သူတို့ အကျိုးစီးပွားအတွက် သွေးခွဲမှုတွေ လုပ်နေတယ်။ ပအိုဝ်းပြည်သူလုထု များအနေဖြင့် သေချာစဉ်းစားသင့်ပြီ။ ညီညွတ်သင့်ပြီ” ဟု ၎င်း ဗိုလ်ချုပ် ခွန်သူရိန်က ပြောကြားထားသည်။

ထို့အပြင် စစ်ကောင်စီ မှီခိုနေသည့် ရေကြောင်းနှင့် လေကြောင်းကို မဖျက်ဆီးနိုင်လျှင် အဆိပ်ပင်ရေလောင်းသကဲ့သို့ တူညီနေကြောင်း ဗိုလ်ချုပ် ခွန်သူရိန် ထောက်ပြပြောဆိုလိုက်သည်။

ပအိုဝ်းပြည်သူ့စစ် (PNO)မှ ပအိုဝ်းပြည်သူများကို အသုံးချကာ အာဏာရှင်၏အကျိုးစီးပွားကို ကာကွယ်ပေးနေပြီး ပြည်သူ့စစ်သည် ပအိုဝ်းလူမျိုး၊ ပအိုဝ်းလူမျိုးသည် ပြည်သူ့စစ် ဟု မြင်လာစေရန် ရည်ရွယ်ချက်ရှိရှိ လုပ်ဆောင်လာမှုအပေါ် တခြားသော တိုင်းရင်းသားများအနေဖြင့် ပအိုဝ်းပြည်သူစစ်နှင့် ပအိုဝ်းလူမျိုးကို ကွဲကွဲပြားပြား နားလည် သိစေချင်ကြောင်း ဗိုလ်မှူးအောင်မန်းက ထပ်လောင်းပြောသည်။

ထို့အပြင် ပအိုဝ်းပြည်သူ့စစ် (PNO)သည် ပအိုဝ်းလူမျိုးများကို စစ်ကောင်စီတပ်သားအဖြစ် အသုံးချနေခြင်းကို ရှုံ့ချသင့်ပြီး လူမျိုးအပေါ် သစ္စာမဲ့သည့် လုပ်ရပ်ဖြစ်ကြောင်းနှင့် ပအိုဝ်းလူမျိုးများကို အာဏာရှင် စနစ်အောက်မှ ရုန်းထွက်ရန်လိုအပ်ကြောင်း အပါဝင် မြေပြင်တွင် စနစ်တကျ အင်အားတည်ဆောက်ထားရန် လိုအပ်ကြောင်း အမျိုးသားညီညွတ်ရေးအစိုးရ (NUG) ၏ ယာယီသမ္မတ ဒူဝါလရှီးလ ကနေ ယနေ့ကျရောက်သည့် ပအိုဝ်းအမျိုးသားနေ့ အခမ်းအနားတွင် ပြောကြားခဲ့သည်။

ဆက်လက်ပြီး မြန်မာပြည်အရေးကို ဆောင်ရွက်နေသူမှန်လျှင် သမိုင်းကို ပြန်လေ့လာသင့်ပြီး သမိုင်းကြောင်းကို နားလည်မှ အတု၊အစစ်ကို သေချာခွဲခြားသိမြင်နိုင်ကာ အာဏာရရေးကို ဦးစားပေးမသွားစေ◌ချင်ကြောင်း ပဒိုသမိန်ထွန်းက ပြောကြားခဲ့သည်။

“ တိုင်းရင်းသားလက်နက်ကိုင်တွေ အနေနဲ့လည်း အာဏာရှင်စနစ်က လွတ်ဖို့ သူတို့ဆီက စိတ်ကူးမယဉ်နဲ့တော့ သူတို့က တိုင်းပြည်ပျက်နေ ပါစေ နောက်မဆုတ်ဘူး။ လူတွေက အာဏာရရင် တစ်မျိုး ၊မရခင်တစ်မျိုး အဲလိုမျိုးတွေ မဖြစ်စေချင်ဘူး။” ဟု အဆိုပါ ပဒို သမိန်ထွန်းက ပြောသည်။

အချုပ်အားဖြင့် ကိုယ်ပိုင်ပြည်နယ် ပြဌာန်းရေးး၊ ပအိုဝ်းလူမျိုး လွတ်မြောက်ရေး အပါဝင် အာဏာရှင်စနစ်ကျဆုံးရေးကို အစဉ်တစိုက် လုပ်ဆောင်သွားကြမည်ဖြစ်ကြောင်း ပြောကြားခဲ့သည်။

ယနေ့ ကောဇာသက္ကရာဇ် ၁၃၈၆ ခုနှစ် တပေါင်းလပြည့်နေ့တွင် ကျရောက်သည့် (၇၆)နှစ်မြောက် ပအိုဝ်းအမျိုးသားနေ့ကို ပအိုဝ်းအမျိုးသား ဖယ်ဒရယ်ကောင်စီ(PNFC) နှင့် ပအိုဝ်းအမျိုးသားလွတ်မြောက်ရေးအဖွဲ့ချုပ် (PNLA/PNLO)တို့ ပူးပေါင်းကျင်းပခဲ့သည်။

အဆိုပါ ဆွေးနွေးပွဲကို အမျိုးသားညီညွတ်ရေးအစိုးရ ဒုသမ္မတ ဒူးဝါလရှီးလ ၊ ကရင်အမျိုးသားအစည်းရုံး (KNU) မှ ပဒိုသမိန်ထွန်း ၊ အမျိုးသားလွှတ်တော်ကိုယ်စားလှယ် ဦးအောင်ကြည်ညွန့် အပါအဝင် PNLA မှ ဗိုလ်မှူးအောင်မန်း၊ ဗိုလ်ချုပ် ခွန်သူရိန်၊ PNFC မှ ခွန်မြင့်ထွန်း တို့ ပါဝင် ပြီး သတင်းမီဒီယာများ အမျိုးသားရေးတက်ကြွလှုပ်ရှားသူများ ဒေသခံ များတက်ရောက်ခဲ့ကြသည်။

၁၉၄၈ ခုနှစ် မတ်လတွင် သထုံမြို့၌ ဖဆပလ အစိုးရ၏ မြေယာဝေခြမ်းရေး အစီစဉ်ကို ပအိုဝ်းလူမျိုးများက ကန့်ကွက် ချီတက် ဆန္ဒပြပြီး အဆို(၃)ရပ်ကို တောင်းဆိုခဲ့ကြသည်။ ၎င်းအဆို(၃)ရပ်မှ ပအိုဝ်းလူမျိုးကို တောင်သူလူမျိုးဟု ရေးသားခေါ်ဆိုခြင်း မပြုဘဲ ပအိုဝ်းလူမျိုးဟု ခေါ်ဆို အသိမှတ်ပြုရန် ဆိုသော အချက်ကိုသာ ဖဆပလ အစိုးရမှ လိုက်လျောပေးခဲ့သည်။

ထိုအချိန်မှစ၍ သထုံမြို့ရှိ ရွှေစာရံစေတီတော်၏ မူလ ဒါယိကာ ပအိုဝ်းမင်းဖြစ်သည့် သထုံပြည့်ရှင် သူရိယစန္ဒာ၏ မွေးနေ့ဖြစ်သော တပေါင်းလပြည့်နေတိုင်းကို ပအိုဝ်းအမျိုးသားနေ့ အဖြစ် သတ်မှတ်ခဲ့ကြသည်။

၁၉၉၆ ခုနှစ် နောက်ပိုင်းတွင် နအဖ စစ်အစိုးရမှ ပအိုဝ်းအမျိုးသားနေ့ကို ပအိုဝ်းအမျိုးသားပွဲတော် အဖြစ်သို့ ပြောင်းလဲ ကျင်းပစေခဲ့သည်။