သျှမ်းပြည်တောင်ပိုင်း၊ ပင်းတယမြို့နယ်တွင် ကိုဗစ်ကာလတည်းက ရပ်နားထားသည့် တပေါင်းပွဲအား ယခုနှစ်တွင်ပြန်လည်ပြုလုပ်ကျင်းပနေကြောင်း စုံစမ်းသိရှိရသည်။ 

ကိုဗစ်ကပ်ရောဂါစတင်ဖြစ်ပွားခဲ့သည့် ၂၀၂၀ ခုနှစ်မှစတင်ပြီး ၅ နှစ်ကြာရပ်နားထားခဲ့သော ပင်းတယမြို့နယ် တပေါင်းပွဲတော်အား ယခုနှစ်မတ် ၁၀ ရက်မှ မတ် ၁၅ ရက်အတွင်း စစ်ကောင်စီမှ ဦးဆောင်၍ ပြန်လည်ကျင်းပနေကြောင်း ဒေသခံအမျိုးသားတစ်ဉီးက သျှမ်းသံတော်ဆင့်ကိုပြောသည်။ 

“စစ်ကောင်စီအလိုကျ ပွဲကျင်းပရတာဆိုပေမယ့်၊ ဒေသခံတွေရဲ့ ဆန္ဒလည်းပါဝင်ပါတယ်၊ ပင်းတယတပေါင်းပွဲကျင်းပတာနဲ့ပတ်သက်ပြီး ဓနုလူမျိုးတွေကို အမုန်းမပွားစေချင်ပါဘူး၊ ၅ နှစ်နေပြီးမှ ပြန်လည်ကျင်းပရတဲ့ ပွဲမို့လို့ ပျော်ပါစေဗျ” ဟု ဒေသခံ အမျိုးသားတစ်ဦးက သျှမ်းသံ‌တော်ဆင့်သို့ ပြောသည်။

ပင်းတယ တပေါင်းပွဲဆိုသည်မှာ နှစ်စဉ်နှစ်တိုင်း မတ်လရောက်သည့်အခါ တောင်သူများမှ ကောက်ရိတ်သိမ်းပွဲတော်ကျင်းပကြပြီး ကောက်ရိတ်သိမ်းရောင်းချရသည့်ငွေများကို လှူဒါန်းရာမှဖြစ်ပေါ်လာသော ပွဲတော်တစ်ခုဖြစ်သည်။

ပွဲတော်အတွင်း ဒေသထွက်အစားအသောက်၊ ကုန်ပစ္စည်းများ၊ ဈေးဆိုင်များအပြင် ရိုးရာအားကစားပွဲ၊ စတိတ်ရှိုးနှင့် ဇာတ်ပွဲများအား ထည့်သွင်းပြုလုပ်လေ့ရှိပြီး ၂၀၂၀ ကိုဗစ်ကပ်ရောဂါကာလစတင်သည့်အချိန်တွင် ပွဲတော်ကျင်းပမှုအား ရပ်နားထားခဲ့ခြင်းဖြစ်သည်။ 

“၂ ရက်ရှိပြီ လုပ်နေတာတော့၊ ပွဲကမဖြစ်တာလည်းကြာပြီဆိုတော့ ဒေသခံတွေကလည်း ရိုးရာဓလေ့ကိုမပျောက်အောင်လုပ်တာလည်း ပါတာပေါ့၊ ခေတ်က မကောင်းတော့ ဟိုးအရင်တုန်းကလိုတော့ မစည်တော့ဘူး ဆိုင်ခန်းကြဲကြဲနဲ့ လုပ်ကြတယ်” ဟု ပင်းတယမြို့နယ်တွင် နေထိုင်သည့် လူငယ်အမျိုးသားတစ်ဦးက သျှမ်းသံတော်ဆင့်သို့ပြောသည်။ 

နှစ်စဉ်မတ်လရောက်သည့်အခါတိုင်း တပေါင်းပွဲတော်အား သျှမ်းပြည်အနှံ့မြို့နယ်အများအပြားတွင် ကျင်းပလေ့ရှိကြသည်။ ကိုဗစ်ကပ်ရောဂါနှင့် စစ်အာဏာသိမ်းမှုများကြောင့် ပွဲတော်များမှာလည်း တဖြည်းဖြည်းနှင့် စည်ကားမှုမရှိတော့ဘဲ ခြောက်ကပ်လာလျက်ရှိသည်။ 

ပြီးခဲ့သည့် ၂၀၂၄ ခုနှစ် မတ်လတွင်လည်း သျှမ်းပြည်၊ မိုင်းကိုင်မြို့နယ် မွေတော်စေတီတွင် နှစ်စဉ်နှစ်တိုင်းစည်ကားစွာကျင်းပလျက်ရှိသည့် တပေါင်းပွဲတော်အား လက်နက်ကိုင်များမှ စစ်သားစုဆောင်းမှုနှင့် နိုင်ငံရေး မတည်ငြိမ်မှု၊ တိုက်ပွဲဖြစ်ပွားမှုတို့ကြောင့် ကျင်းပပြုလုပ်နိုင်ခဲ့ခြင်းမရှိကြောင်းလည်း သိရသည်။