သျှမ်းပြည် မိုးနဲမြို့နယ်သို့ ရောက်ရှိနေသည့် နမ့်လန်စစ်ဘေးရှောင် ကျောင်းသားကျောင်းသူ ၄၀၀ ကျော်သည် စာမေးပွဲ ဖြေဆိုပြီးနောက် နေရပ်ပြန်မည်ဖြစ်ကြောင်း စုံစမ်းသိရသည်။

ယမန်နှစ် ၂၀၂၄ ဒီဇင်ဘာ လဆန်းပိုင်းက သီပေါမြို့နယ် နမ့်လန်မြို့အနီးတဝိုက်တွင် စစ်ကောင်စီတပ်နှင့် ကိုးကန့်တပ်ဖွဲ့ MNDAA တို့ တိုက်ပွဲပြင်းထန်ခဲ့ရာ လုံခြုံရေးစိုးရိမ်မှုကြောင့် မိဘများမှ ကျောင်းနေအရွယ် သားသမီးများကို ခေါ်ဆောင်ကာ မိုးနဲမြို့ဘက်သို့ စစ်ဘေးတိမ်းရှောင် ရောက်ရှိခဲ့ကြသည်။

မိုးနဲမြို့သို့ စစ်ဘေးရှောင်ပြီး ရောက်ရှိနေသည့် ၎င်းကျောင်းသား/သူ (၄၀၀) ကျော်မှာ အတန်းတင်စာမေးပွဲ ဖြေဆိုပြီးနောက် ဆရာ/မများနှင့်အတူ တိုက်ပွဲငြိမ်သက်နေသည့် နမ့်လန်မြို့သို့ နေရပ်ပြန်မည်ဖြစ်ကြောင်း စစ်ဘေးရှောင်ကူညီသူတစ်ဦးက သျှမ်းသံတော်ဆင့်ကို ပြောသည်။

“နမ့်လန်က စစ်ဘေးရှောင်တွေ မိုးနဲဘက် ရောက်တာတော့ အရင်နှစ် ၁၂ လပိုင်းကတည်းကပါ။ ဆရာနဲ့ ကျောင်းသား စုစုပေါင်း ၄၃၂ ယောက် ရှိတယ်၊ မူလတန်းကနေ အထက်တန်းထိ အရွယ်စုံပဲ။ သူတို့စာသင်ဖို့ ၄ နေရာ စီစဉ်ပေးထားတယ်၊ အခု ၂ လပိုင်းအကုန် စာမေးပွဲ ဖြေပြီးတော့ အိမ်ပြန်ကြမှာ။ စာမေးပွဲဖြေဖို့ ကျန်တာ အထက်တန်း၊ (၁၆၀) ယောက် ရှိဦးမယ်”ဟု မိုးနဲဒေသခံ စစ်ဘေးရှောင်ကူညီသူ လူငယ်တစ်ဦးက ပြောသည်။

မိုးနဲမြို့ရောက် နမ့်လန်စစ်ဘေးရှောင်များအတွက် တည်းခိုရန် မြို့ပေါ်နှင့် ကျေးရွာရှိ ဘုန်းကြီးကျောင်း ၄ နေရာတွင် စီစဉ်ပေးခဲ့ပြီး စာမေးပွဲ ဖြေဆိုပြီးသည့် မူလတန်းနှင့် အလယ်တန်း ကျောင်းသားကျောင်းသူ (၂၇၀) နေရပ်ပြန်သွားပြီဖြစ်ကြောင်း သိရသည်။

လက်ရှိတွင် စာမေးပွဲ ဖြေဆိုရန် စောင့်ဆိုင်းနေသည့် အထက်တန်း ကျောင်းသားကျောင်းသူ (၁၆၀) ကျန်ရှိပြီး ၎င်းတို့လည်း စာမေးပွဲဖြေဆိုပြီးပါက နေရပ်ပြန်မည်ဖြစ်ကြောင်း စစ်ဘေးရှောင်ကူညီသူများက ပြောသည်။

“စစ်ရှောင်တွေ စရောက်တုန်းက ကျောင်းနေအရွယ် ကလေးတွေ အများကြီး ပါတော့ မိုးနဲက လူကြီးတွေ တိုင်ပင်ပြီး နေရာစီစဉ်ပေးကြတာ။ ဒီမှာနေတဲ့ ၃/၄ လ စားသောက်ဖို့ကျတော့ မိုးနဲဒေသခံတွေရယ်၊ ရပ်နီးရပ်ဝေး အဖွဲ့ပေါင်းစုံ ကူကြတာပေါ့။ TYO ၊ သျှမ်းကျောင်းသားအဖွဲ့၊ နမ့်ခုံး ပရဟိတအဖွဲ့နဲ့ ထိုင်းတို့ ကိုးရီးယားတို့မှာ အလုပ်လုပ်တဲ့ လူငယ်တွေ ပြန်ကူကြတယ်”ဟု ၎င်းစစ်ဘေးရှောင်ကူညီသူ လူငယ်က ဆက်ပြောသည်။

ယမန်နှစ် ၂၀၂၄ နိုဝင်ဘာလမှ စတင်ပြီး သီပေါမြို့နယ် နမ့်လန်အခြေစိုက် စစ်ကောင်စီတပ်များကို ကိုးကန့်တပ်ဖွဲ့ MNDAA မှ ထိုးစစ်ဆင်တိုက်ခိုက်ခဲ့ပြီး စစ်ကောင်စီဘက်မှ နမ့်လန်မြို့ပေါ် လူနေရပ်ကွက်ထဲ လက်နက်ကြီး ပစ်ခတ်ခဲ့ခြင်းကြောင့် အရပ်သား ထိခိုက်သေဆုံးပြီး ပြည်သူနေအိမ် အများအပြား ပျက်စီးဆုံးရှုံးခဲ့ရသည်။

၎င်းနောက် နမ့်လန်မြို့နှင့် အနီးအနား ကျေးရွာများမှ ဘေးလွတ်ကင်းရာ ကျေးသီး၊ မိုင်းကိုင်၊ လဲချား၊ ပင်လုံမြို့အပြင် မိုးနဲမြို့နယ်ဘက်ထိ စစ်ဘေးတိမ်းရှောင် ရောက်ရှိခဲ့ကြသည်။