သျှမ်းပြည် လားရှိုးမြို့တွင်း တိုက်ပွဲများ ငြိမ်သက်နေပြီး စစ်ရှောင်ပြည်သူများ နေအိမ်သို့ ပြန်မရောက်ခင် နေအိမ်များ ဖောက်ထွင်းခံရပြီး အိမ်တွင်ကျန်ခဲ့သော တန်ဖိုးရှိပစ္စည်းများ၊ ကားများ ခိုးယူခံရကာ အခြားမြို့သို့ ပြန်လည်ရောင်းချနေကြောင်း စုံစမ်းသိရသည်။
“၁၀၂၇ စစ်ဆင်ရေး” ဒုတိယပိုင်းအတွင်း လားရှိုးမြို့သိမ်း တိုက်ပွဲသည် ဇူလိုင်လ ၂ရက်နေ့တွင် စတင်ခဲ့ရာ သြဂုတ် (၃)ရက်တွင် ကိုးကန့်တပ်ဖွဲ့ (MNDAA ) က အရှေ့မြောက်ပိုင်း တိုင်းစစ်ဌာနချုပ် ရမခ ကို အလုံးစုံ သိမ်းပိုက်နိုင်ခဲ့သည်။
ထို့နောက် လားရှိုးမြို့ကို MNDAA က ထိန်းချုပ်ပြီး အုပ်ချုပ်ရေး ယန္တရား ပြန်စတင်ကာ တိုက်ပွဲကြောင့် ထွက်ပြေးခဲ့သည့် လားရှိုးဒေသခံများ နေရပ်သို့ ပြန်မရောက်ခင် နေအိမ်အများအပြား ဖောက်ထွင်းခံရပြီး အိမ်တွင်ကျန်ခဲ့သော တန်ဖိုးရှိပစ္စည်းများ၊ ကားများ ခိုးယူခံရကာ အခြားမြို့များတွင် ပြန်လည်ရောင်းချနေကြောင်း ကိုယ်တိုင်ကြုံတွေ့ရသည့် လားရှိုးဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ခိုးထားတဲ့ကားကို ပျော်ဘွယ်မှာ without ကားဆိုပြီး သွားရောင်းတာ၊ ပွဲစားက မသင်္ကာလို့ ရဲစခန်းကို အပ်လိုက်တာ။ အဲ့ဒါကို သူခိုးတွေက ဘုန်းကြီးကျောင်းက ကားပါလို့ ရဲစခန်းကို ပြောပြီး ပြန်ယူသွားတယ်” ဟု ၎င်းအမျိုးသားက သျှမ်းသံတော်ဆင့်ကို ပြောသည်။
အချို့ ခိုးယူသွားသော ကားများအား မိုင်းရယ်မြို့တွင် ပြန်လည်တွေ့ရှိထားသော်လည်း ကားခိုးယူသွားသည့် သူခိုးများကို ဖမ်းဆီးရမိခြင်း မရှိသေးသကဲ့သို့ လက်ရှိ လားရှိုးမြို့ပေါ်တွင် အိမ်ဖောက်ထွင်းခံရမှုများ၊ ကားပျောက်မှုများ ဆက်တိုက်ဖြစ်ပေါ်နေကြောင်း ၎င်းမှဆက်ပြောသည်။
“ခိုးတာက အားလုံးကို ခိုးတာ၊ ကားတင်မဟုတ်ဘူး။ အိမ်မှာကျန်ခဲ့တဲ့ ပစ္စည်းမှန်သမျှကို မီးစက်၊ အဝတ်လျှော်စက်၊ ရေခဲသေတ္တာ အကုန်ယူသွားကြတယ်။ ပြီးတော့ ခုဆို အဲ့ဒီပစ္စည်းတွေကို အဟောင်းဈေးနဲ့ ပြန်ရောင်းတာ ဈေးကွက်တောင် ဖြစ်နေပြီ” ဟု လားရှိုးမြို့သို့ ပြန်လည်ရောက်ရှိနေသော အမျိုးသမီးတစ်ဦး က သျှမ်းသံတော်ဆင့်ကို ပြောသည်။
လက်ရှိတွင် လားရှိုးမြို့ အုပ်ချုပ်ရေးကို ကိုးကန့်တပ်ဖွဲ့ MNDAA က လွှဲယူလိုက်ကြောင်း ကြေညာထားပြီး ‘ဝ’တပ်ဖွဲ့ UWSA ကလည်း ၎င်းတို့၏ ‘ဝ’ပြင်ပဆက်ဆံရေးရုံးနှင့် ပိုင်ဆိုင်မှုများကို ကာကွယ်ရန်ဟုဆိုကာ လားရှိုးမြို့ပေါ် ‘ဝ’တပ်ဖွဲ့ လုံခြုံရေးအဖွဲ့ဝင်များ နေရာယူထားသော်လည်း စစ်ကောင်စီမှ လေကြောင်းပစ်ခတ်မှုများ ရှိလာနိုင်သောကြောင့် ဒေသခံများ နေရပ် မပြန်ရဲသေးကြောင်း သိရသည်။
အလုပ်သင် သတင်းထောက် ယူဂျင်း ရေးသားသည်။
Leave a Comments