သျှမ်းပြည် မိုးနဲမြို့နယ်အတွင်း သင်္ကြန်အကြောင်းပြချက်ဖြင့် မြို့နယ် အုပ်ချုပ်ရေးမှူး နှင့် ရပ်ကွက်အုပ်ချုပ်ရေးမှူးတို့ ပိုက်ဆံလိုက်လံ ကောက်ယူနေကြောင်း သတင်းရရှိသည်။
လက်ရှိ သင်္ကြန်ကာလအတွင်း စစ်ကောင်စီ လက်အောက်ခံ မြို့နယ်အုပ်ချုပ်ရေးမှူးက မိုးနဲမြို့ လွိုင်မြေရပ်ကွက်ထဲတွင် လုပ်ငန်းရှင်များထံ ပိုက်ဆံ ကောက်ယူနေကြောင်း သိရသည်။
“ လုပ်ငန်းရှင်တွေကောက်တာ။ လုပ်ငန်းကြီးရင်တော့ ၁ သိန်းလောက်ထိ ကောက်တယ်။ အလယ်အလတ်ဆိုရင်တော့ ၅ သောင်းကောက်တယ်။ ဆိုင်သေးဆိုရင် ၃ သောင်းလောက်ထိ ကောက်တယ်။ သင်္ကြန်အတွက်ဆိုပြီးတော့ ကောက်တာ” ဟု မိုးနဲမြို့ ဒေသခံတစ်ဦးက ပြောသည်။
အဆိုပါ ငွေလိုက်လံ ကောက်ယူရာတွင် ရပ်ကွက်အုပ်ချုပ်ရေးမှူးက လိုက်လံကောက်ယူနေသည့်အပြင် လက်ရှိ မိုးနဲမြို့တွင် သင်္ကြန်မဏ္ဍပ်ကို စုပေါင်းရုံတွင် ပြုလုပ်ထားကြောင်း သိရသည်။ ထိုအပြင် ဌာန ဆိုင်ရာများကိုလည်း ငွေကောက်ယူမှုလည်းရှိကြောင်း သိရသည်။
“မနက်ဖြန်မှာ သူတို့ ဖွင့်ပွဲလုပ်မှာ လို့ကြားတယ်။ သင်္ကြန်မဏ္ဍပ်ကိုတော့ စုပေါင်းရုံကွင်းမှာ လုပ်ထားပါတယ်။ ပြီးတော့ သူတို့က ဌာနဆိုင်ရာတွေကိုလည်း ကောက်တယ်။ တစ်ဌာနကို ၃ သောင်းကောက်တယ်” ဟု အထက်ပါ ဒေသခံ ကပြောသည်။
ယခုနှစ် သင်္ကြန်ပွဲတော်ကို စစ်ကောင်စီက ဦးဆောင်ပြီး ကျင်းပ ပေးနေလျက်ရှိသည်။ ထိုအပြင် မြို့ကြီးတွင် စစ်ကောင်စီက မဏ္ဍပ်ဆောက်ပေးထားကြောင်း သိရသည်။
