သျှမ်းပြည် နမ့်စန်မြို့နယ်တွင် SSPP နှင့် RCSS တိုက်ပွဲအတွင်း ကျေးလက်ဆေးပေးခန်းကို လက်နက်ကြီးထိမှန်ခဲ့ပြီး စစ်ဘေးရှောင်များ ထပ်မံထွက်ပြေးနေရကြောင်း စုံစမ်းသိရသည်။

ဇန်နဝါရီလ (၁၅) ရက် ညပိုင်းတွင် နမ့်စန်မြို့နယ် နောင်ဟီးကျေးရွာအုပ်စုရှိ နမ့်မိုရွာအနီးတွင် သျှမ်းတပ်နှစ်တပ်ဖြစ်သည့် SSPP နှင့် RCSS တပ်ဖွဲ့တို့ တိုက်ပွဲပြင်းထန်ခဲ့ရာ နမ့်မိုကျေးလက်ဆေးပေးခန်းကို လက်နက်ကြီး ထိမှန်ခဲ့ပြီး ရွာအတွင်း စစ်ဘေးရှောင်နေသူများလည်း ထပ်မံထွက်ပြေးနေရကြောင်း ဒေသခံများက ပြောသည်။

“အရင်ညက ဆေးခန်းမှာ လက်နက်ကြီးကျတာ၊ ဆေးခန်းဆိုင်းဘုတ်နား ကျတယ်။ လူတော့ ဘာမှ မဖြစ်ဘူး၊ ဆေးကုပေးတဲ့ ဆရာ/မတွေတော့ ထိတ်လန့်ကုန်တယ်။ ရွာနဲ့အရမ်းနီးတော့ ရွာထဲကလူ ထပ်ပြေးနေရပြီ၊ လူထိခိုက်တာတော့ မရှိဘူး။ လက်နက်ကြီး မှန်မှာစိုးလို့ အသံကြားတာနဲ့ ကြိုပြေးထားတယ်၊ သူတို့နှစ်ဖွဲ့က အခုနယ်မြေလုနေတာ”ဟု နမ့်စန်မြို့ပေါ် စစ်ဘေးရှောင်လာသည့် နောင်ဟီးဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

နမ့်စန်မြို့နယ်တွင် သျှမ်းတပ်နှစ်တပ် ထိတွေ့တိုက်ပွဲအတွင်း ကျေးလက်ဆေးပေးခန်း လက်နက်ကြီးထိမှန်ခြင်းနှင့် ပတ်သက်၍ RCSS ပြောရေးဆိုခွင့်ရှိသူ ဒုတိယဗိုလ်မှူးကြီး အုမ်ခေးကို သျှမ်းသံတော်ဆင့်မှ ဆက်သွယ်မေးမြန်းခဲ့ရာ ယခုဖြစ်စဉ်နှင့် ပတ်သက်ပြီး မကြားသိရသေးကြောင်း ပြန်လည်ဖြေကြားခဲ့သည်။

အလားတူ SSPP ပြောရေးဆိုခွင့်ရှိသူများထံ စုံစမ်းမေးမြန်းရန် သျှမ်းသံတော်ဆင့်မှ အကြိမ်ကြိမ် ဖုန်းဆက်သော်လည်း အဆက်အသွယ် မရရှိခဲ့ပါ။

နမ့်စန်မြို့နယ် နောင်ဟီးကျေးရွာအုပ်စုအတွင်း SSPP နှင့် RCSS ထိတွေ့တိုက်ပွဲမှာ (၁၀) ကျော်ကြာ တိုက်ပွဲပြင်းထန်နေပြီး ဟိုခို၊ ကွန်ဆဲ၊ ဝမ်ပန်၊ နမ့်အုတ်ကျေးရွာများမှ ပြည်သူများမှာ နမ့်မိုကျေးရွာသို့ စစ်ဘေးရှောင်လာကြသည်။

ယမန်နေ့ည တိုက်ပွဲထပ်မံဖြစ်ပွားပြီး ကျေးလက်ဆေးပေးခန်းသို့ လက်နက်ကြီးကျည် ကျရောက်ပေါက်ကွဲခြင်းကြောင့် နမ့်မိုရွာအတွင်းရှိ စစ်ဘေးရှောင်များလည်း နမ့်စန်မြို့ပေါ်သို့ ထပ်မံထွက်ပြေးတိမ်းရှောင်ရကြောင်း ဒေသခံများထံမှ သိရသည်။

“အနီးအနား ရွာတွေက ရောက်လာတဲ့ စစ်ဘေးရှောင်လည်း ဒီတခေါက် တိုက်ပွဲထပ်ဖြစ်တော့ မြို့ပေါ် ထပ်ပြေးလာတယ်။ အရင်က တိုက်ပွဲဖြစ်ရင် ရွာပြင်မှာပဲဖြစ်တာ၊ အခု ရွာနဲ့နီးနီးမှာ လက်နက်ကြီးကျတာ။ ရွာသားတွေတော့ ပြေးလိုက် အိမ်ပြန်သွားလိုက် လုပ်နေရတယ်”ဟု နမ့်စန်မြို့မှ ၎င်းစစ်ဘေးရှောင် အမျိုးသမီးက သျှမ်းသံတော်ဆင့်ကို ဆက်ပြောသည်။

နမ့်စန်မြို့နှင့် (၁၃) မိုင်ခန့် အကွာအဝေး၌ တည်ရှိနေသည့် နောင်ဟီးကျေးရွာအုပ်စုတွင် ၂၀၂၁ ခုနှစ်မှ စတင်တူးဖော်နေသည့် ဧက (၅၀၀) ကျော် ကျောက်မီးသွေးတွင်း (၅) ခုထက်မနည်း တည်ရှိကာ နားယိုင်းပြည်သူ့စစ်အဖွဲ့များလည်း ပါဝင်တူးဖော်နေကြောင်း သိရသည်။

နမ့်စန်မြို့နယ် နောင်ဟီးကျေးရွာအုပ်စုရှိ ၎င်းကျောက်မီးသွေးတွင်းများမှ အခွန်ကောက်ခံရန် သျှမ်းတပ်နှစ်တပ်အချင်းချင်းကြား လွန်ခဲ့သည့် (၃) နှစ်ကျော်မှ စတင်ပြီး မကြာခဏ တိုက်ပွဲဖြစ်ပွားခဲ့ခြင်းကြောင့် ပြည်သူများလည်း စစ်ဘေးရှောင်နေရကြောင်း ဒေသခံများက ပြောဆိုသည်။