သျှမ်းပြည် ရပ်စောက်မြို့နယ်အတွင်း စစ်ကောင်စီတပ်နှင့် ဓနုပြည်သူ့လွတ်မြောက်ရေးတပ် DPLA တို့ ထိတွေ့တိုက်ပွဲအပြင် သျှမ်းတပ်နှစ်တပ်အချင်းချင်းကြား တိုက်ပွဲအပြိုင်အဆိုင် ဖြစ်ပွားခဲ့ကြောင်း စုံစမ်းသိရသည်။

ပြီးခဲ့သည့် ဒီဇင်ဘာလ နောက်ဆုံးပတ်မှ စတင်ပြီး ရပ်စောက်မြို့နယ်အတွင်းရှိ ကျောက်ဂူကျေးရွာဘက်တွင် စစ်ကောင်စီတပ်နှင့် ဓနုပြည်သူ့လွတ်မြောက်ရေးတပ် DPLA တို့ တိုက်ပွဲဖြစ်ပွားနေစဉ် သျှမ်းတပ်နှစ်တပ်လည်း အင်တောမြို့အနီး (၃) နေရာတွင် ထိတွေ့တိုက်ပွဲ ပြင်းထန်ခဲ့ကြောင်း ဒေသခံများက ပြောသည်။

အင်တောမြို့အနီး တောင်ထိပ်ရွာ၊ စံပယ်ကုန်းနှင့် ဇော်ဂျီဆည်အထွက် ပါမဲလုံရွာတို့တွင် SSPP နှင့် RCSS တပ်ဖွဲ့တို့ ၂၀၂၄ ဒီဇင်ဘာလ ၂၇ ရက်နှင့် ၂၈ ရက်နေ့တွင် တိုက်ပွဲဖြစ်ပွားခဲ့ပြီး နှစ်ဘက်တပ်ဖွဲ့ ထိခိုက်မှုများကြောင်း အင်တောဒေသခံ အမျိုးသားတစ်ဦးက ပြောဆိုသည်။

“လက်နက်ကြီးသံကြားတယ်၊ အင်တောဘက် ရွာနဲ့နီးနီးလေးပဲ။ အစိမ်း (SSPP) တပ်ပေါင်းစုနဲ့ အကြား (RCSS)နဲ့ ဖြစ်တာ။ ကြားတာတော့ လက်နက်ကြီး သုံးကြတာ တိုက်ပွဲပြင်းတယ်၊ တစ်နေရာတည်း မဟုတ်ဘူး သုံးနေရာတောင်မှ ဖြစ်တာ။ အစိမ်းဘက်က ထိခိုက်ဒဏ်ရာရတာ များတယ်၊ အကြားဘက်ကတော့ တောနင်းပြီး စခန်းပြောင်းသွားလို့ ထိခိုက်တာ မသိဘူး”ဟု အင်တောမြို့ဒေသခံ ၎င်းအမျိုးသားက သျှမ်းသံတော်ဆင့်ကို ပြောသည်။

ရပ်စောက်မြို့နယ်အတွင်း သျှမ်းတပ်နှစ်တပ် တိုက်ပွဲများနှင့် ပတ်သက်၍ နှစ်ဘက်တပ်ဖွဲ့မှ သတင်းထုတ်ပြန်ထားခြင်း မရှိဘဲ နှစ်ဘက်တပ်ဖွဲ့ ပြောရေးဆိုခွင့်ရှိသူများထံ မေးမြန်းနိုင်ရန် သျှမ်းသံတော်ဆင့်မှ ဖုန်းဖြင့် ဆက်သွယ်ခဲ့သော်လည်း အဆက်အသွယ် မရရှိခဲ့ပေ။

လက်ရှိတွင် နောင်ချိုမြို့နယ် တောင်းခမ်းဒေသသို့ စစ်ကောင်စီတပ်က စစ်ကူပို့နေသည့် တစ်ခုတည်းသော လမ်းကြောင်းမှာ ရပ်စောက်-အင်တော-ကျောက်ဂူ-နောင်ချို လမ်းပိုင်းဖြစ်ပြီး ဓနုပြည်သူ့လွတ်မြောက်ရေးတပ် DPLA က ကြားဖြတ်တိုက်ခိုက်လျက်ရှိရာ စစ်ကောင်စီတပ်နှင့် တိုက်ပွဲများ ပြင်းပြင်းထန်ထန် ဖြစ်ပွားလျက်ရှိသည်။

“ရပ်စောက်ကတော့ အရင်ဆုံး မဟုတ်ရင်တောင် နောက်ဆုံးမှာ တိုက်မယ်လို့ အဲ့လိုသတင်းထွက်နေတယ်။ ကျောက်ဂူ၊ အင်တော ကျော်လာရင် ဗထူးတပ်မြို့ရောက်ပြီ။ မြို့ထဲဘက် တိုက်ပွဲဖြစ်လာရင် လေယာဉ်နဲ့ ဗုံးကြဲခံရမှာ အကြောက်ဆုံးပဲ။ ကျောက်ဂူမှာ စကစနဲ့ ဓနု PDF တိုက်ပွဲဖြစ်ပြီး သျှမ်းတပ်နှစ်တပ် တိုက်ပွဲဖြစ်တာပဲ”ဟု အသက် (၄၀) ကျော်အရွယ် အင်တောဒေသခံ အမျိုးသားက သျှမ်းသံတော်ဆင့်ကို ဆက်ပြောသည်။

ယမန်နှစ် ဒီဇင်ဘာလ ၁၈ ရက်က ရပ်စောက်မြို့နယ် ကျောက်ဂူကျေးရွာအခြေစိုက် စစ်ကောင်စီ အမြောက်တပ်-(၃၄၉) အနီး ဓနုပြည်သူ့လွတ်မြောက်ရေးတပ် DPLA နှင့် တိုက်ပွဲဖြစ်ပွားခဲ့ပြီး စစ်ကောင်စီတပ်မှ လေကြောင်းဖြင့် ဗုံးကြဲတိုက်ခိုက်ခဲ့ရာ ထမင်းပေါင်းရွာမှ အရပ်သား(၁) ဦး ထိခိုက်သေဆုံးခဲ့ကြောင်း ဒေသခံများထံမှ သိရသည်။

ရပ်စောက်မြို့နယ်သည် သျှမ်းပြည်မြောက်ပိုင်းနှင့် တောင်ပိုင်းအကြား ချိတ်ဆက်ထားသည့် အချက်အချာ နေရာတွင် တည်ရှိပြီး စစ်ကောင်စီတပ်၏ ဗိုလ်သင်တန်း လေ့ကျင့်ရေးကျောင်းများနှင့် ခြေလျင် တိုက်ခိုက်ရေးတပ်များ အခြေစိုက်သည့် ဗထူးတပ်မြို့လည်း တည်ရှိသည်။