သျှမ်း-ကရင်နီနယ်စပ် တကြောရောက်ရှိနေသည့် စစ်ဘေးရှောင်အချို့သည် ထင်းချောင်းခြောက်များကောက်ကာ ဝမ်းရေးဖြေရှင်းနေရကြောင်း စုံစမ်းသိရသည်။
သျှမ်း-ကရင်နီ တကြောဖြစ်သည် စစ်ဘေးရှောင်များမှာ ဖယ်ခုံ၊ မိုးဗြဲ၊ လွိုင်ကော်နှင့် ဒီးမော့ဆိုတို့ဘက်ခြမ်းဖြစ်သည်။
“စစ်ရှောင်တချို့ဆို ထင်းခြောက်လေးတွေကောက်ပြီး ရောင်းစားနေရတဲ့သူတွေလည်းရှိတယ်။ မိသားစုများတဲ့သူတွေပါတော့ ရှိတာနဲ့တင် မလုံလောက်ဘူး။ ကိုယ်တက်နိုင်တဲ့ ဘက်ကနေ ရှာဖွေနေကြတဲ့သူလည်း ရှိတယ်” ဟု မိုးဗြဲစစ်ရှောင်အမျိုးသမီး တစ်ဉီးက သျှမ်းသံတော်ဆင့်ကိုပြောသည်။
ယခုရက်ပိုင်း စစ်ကောင်စီသည့် ဖယ်ခုံနှင့် မိုးဗြဲဘက်ကို စစ်ကြောင်းထိုးလာခြင်း၊ အရပ်သားရှိသည့် ဘက်ကို အကြောင်းမဲ့ လက်နက်ကြီးဖြင့် ပစ်ခတ်မှုပြုလုပ်နေပြီး၊ ဒရုန်းဗုံးကြဲတိုက်ခိုက်မှုများလည်း ပြုလုပ်နေကြောင်း ၎င်း အမျိုးသမီးက ပြောသည်။
“ ဒီရက်မှာ စစ်ကောင်စီက ဆက်တိုက်လက်နက်ကြီးပစ်၊ ဗုံးကြဲတော့ ကျမတို့လည်း သတိနဲ့နေရတယ်။ တချို့လည်း တခြားနေရာကို ထွက်ပြေးတိမ်းရှောင်တာရှိတယ်” ဟု မိုးဗြဲ စစ်ရှောင်အမျိုးသမီးက ထပ်လောင်းပြောသည်။
ထို့အပြင် လက်ရှိတွင် ဆောင်းရာသီရောက်ရှိလာသဖြင့် စစ်ဘေးရှောင်များအတွက် အနွေးထည်၊ ယာယီတဲအတွက် အမိုးအကာနှင့် စောင်များလိုအပ်နေကြောင်းလည်း စစ်ဘေးရှောင်ကို တပိုင်တနိုင် ကူညီနေသည့်အမျိုးသားက ပြောသည်။
“ဒီ လွိုင်ကော်၊ မိုးဗြဲ ၊ ဖယ်ခုံနဲ့ ဒီးမော့ဆို တို့ဘက်မှာဆို စစ်ရှောင်တွေ ပိုတိုးလာတယ်။ ဆောင်းရာသီရောက်တော့ မိုးကာ အခင်းနဲ့စောင်တွေဆို အရမ်းလိုအပ်နေတယ်။ အဓိကတော့ ကလေးနဲ့ သက်ကြီးရွယ်အိုတွေ ပိုလိုတယ် ရေရှည်ဆို ကျန်းမာရေးတွေ ထိခိုက်လာစေနိုင်တယ်”ဟု ၎င်းအမျိုးသားက ဆိုသည်။
ဆက်လက်ပြီး ဒီးမော့ဆို အနောက်ဘက်ခြမ်းရှိ စစ်ဘေးရှောင်စခန်းများတွင် သောက်သုံးရေ ရှားပါးလာခြင်းကြောင့် ကလေးငယ်များ သန့်ရှင်းမှုအားနည်း၍ ယားနာများ ဖြစ်နေကြောင်းလည်း စစ်ရှောင်ကူညီနေသည့်အမျိုးသားက ထပ်လောင်းပြောသည်။
သျှမ်း-ကရင်နီနယ်စပ်တကြောတွင် စစ်ကောင်စီများ ဒရုန်းဖြင့် ဗုံးကြဲတိုက်ခိုက်မှု ဆက်တိုက်ပြုလုပ်ပြီး၊ ဒရုန်းထဲတွင် အဆိပ်ငွေ့ပြားများထည့်သွင်းကာ အသုံးပြုလာသည့်အထိရှိလာကြောင်း ဒီဇင်ဘာ ၁၃ရက်တွင် တော်လှန်ရေး အင်အားစု KNDFက ထုတ်ပြန်လာသည်။
အလုပ်သင် သတင်းထောက် နန်းဆိုင်ခမ်း ရေးသားသည်။
Leave a Comments