သျှမ်းပြည်မြောက်ပိုင်း ကွတ်ခိုင်မြို့တွင် စစ်ကောင်စီ ထပ်မံဗုံးကြဲတိုက်ခိုက်ခဲ့ရာ ဒေသခံ ၃ ဦးသေဆုံးပြီး ၁၀ ဦးဒဏ်ရာရရှိခဲ့သည်ဟု စုံစမ်းသိရသည်။
ယမန်နေ့ (နိုဝင်ဘာလ ၁၇ရက်)နေ့ည ၁၂နာရီဝန်းကျင်တွင် တအာင်း(ပလောင်) အမျိုးသား လွတ်မြောက်ရေးတပ်မတော် (TNLA) ထိန်းချုပ်ထားသည့် ကွတ်ခိုင်မြို့ပေါ် ရပ်ကွက်(၄) ရေထွက်ဦးပန်ခြံ ဈေးအနီးရှိ လူနေအိမ်ပေါ်သို့ ပေါင် (၅၀၀)ဗုံး လေကြောင်းဖြင့် ဗုံးကြဲတိုက်ခိုက်ခဲ့သည်။
အဆိုပါ ဗုံးကြဲချခဲ့ရာတွင် နှစ်လသားအရွယ် ကလေးနှင့် မိခင် တစ်ဦး၊ သက်ကြီးရွယ်အို တစ် ဦး စုစုပေါင်း ၃ ဦးသေဆုံးပြီး ၁၀ ဦးထိခိုက်ဒဏ်ရာရရှိခဲ့သည်ဟု မြို့နယ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“မနေ့ည ၁၂ နာရီလောက် စစ်တပ်က ဗုံးလာကြဲသွားတယ်။ လူနေများပြီး အဆောက်အအုံကြီးတဲ့နေရာကို ဦးတည်ပြီး ပစ်ကြတယ်။ သေဆုံတဲ့သူထဲမှာက ၂လသားအရွယ်ကလေးနဲ့ မိခင်ဖြစ်သူ ၂ ယောက်လုံးဆုံးသွားတယ်။ အသက်ကြီးတဲ့သူ ၁ယောက်လည်း ဆုံးသွားတယ်။ ထိခိုက်တဲ့သူတော်တော်များတယ် အဲထဲမှာမှ ဒဏ်ရာအပြင်းအထန်းရတဲ့သူလည်း ပါတယ်” ဟု ၎င်းက ပြောသည်။
လားရှိုးမြို့နယ်မှ ကွတ်ခိုင်မြို့သို့ စစ်ရှောင်လာသည့် ဒေသခံတစ်ချို့တွင် စစ်ကောင်စီ၏ ထပ်မံဗုံးကြဲတိုက်ခိုက် မှုကြောင့် လားရှိုးသို့ ပြန်လည် တိမ်းရှောင်နေရသည်ဟု လားရှိုးစစ်ရှောင် အမျိုးသမီးတစ်ဦးက ပြောသည်။
“လားရှိုးမှာ ဗုံးခဏခဏ ကြဲလို့ ကွတ်ခိုင်ကို လာရှောင်တာ စစ်တပ်က ထပ်မံဗုံးကြဲပြန်တယ်။ ကြောက်လို့ လားရှိုးကို ပြန်လည်တိမ်းရှောင်နေရတယ်။ ရှောင်စရာနေရာလည်း မရှိတော့ပါဘူး။ တစ်ရက်ထပ်တစ်ရက် ပိုပိုခက်ခဲလာတယ်”ဟု ၎င်းက ပြောသည်။
ပြီးခဲ့သည့် (နိုဝင်လာလ ၁ရက်) နံနက်အစော ၃ နာရီခွဲကျော်တွင်လည်း ကွတ်ခိုင်မြို့ပေါ် ရပ်ကွက်(၂) စီမံကိန်းရုံး၊ အခွန်ရုံးနှင့် တိုးဂိတ်အနီးရှိ စက်မှုကျောင်းတို့တွင် စစ်ကောင်စီတပ်က လေကြောင်းဖြင့် ပေါင်(၅၀၀)ဗုံး ကြဲချတိုက်ခိုက်ခဲ့ရာ အမျိုးသားတစ်ဦး သေဆုံးသွားကြောင်း သိရသည်။
TNLA ထိန်းချုပ်ထားသည့် ကွတ်ခိုင်မြို့တွင် “၁၀၂၇ စစ်ဆင်ရေး” ဒုတိယပိုင်းအတွင်း တိုက်ပွဲဖြစ်ပွားခြင်း မရှိဘဲ စစ်ကောင်စီတပ်၏ လေကြောင်းတိုက်ခိုက်မှု (၄) ကြိမ်မြောက် ရှိလာကြောင်း သိရသည်။
အလုပ်သင် သတင်းထောက် နန်းဆိုင်ခမ်း ရေးသားသည်။
Leave a Comments