ထိုင်း-မြန်မာနယ်စပ်ဖြစ်သည့် တာချီလိတ်နှင့်ကျိုင်းတုံရှိ ဂိုဒေါင်အချို့ကို စစ်ကောင်စီက တစ်ချို့နေရာတွင် ဝင်ရောက်ဖောက်စစ်နေကြောင်း စုံစမ်းသိရသည်။

အောက်တိုဘာ ဒုတိယပတ်မှ စတင်ပြီး တာချီလိတ်မြို့နှင့် ကျိုင်းတုံမြို့ရှိ ဂိုဒေါင်များ၊ စားသောက်ကုန် ရောင်းချသည့် ဆိုင်များကို စစ်ကောင်စီက ရှောင်တခင်း ဝင်ရောက်စစ်ဆေးနေကြောင်း ဆိုင်ပိုင်ရှင် တစ်ဦးက သျှမ်းသံတော်ဆင့်ကိုပြောသည်။

“ဒုတိယအပတ်ကစပြီး ရဲကားနဲ့စစ်တပ်ကားတွေ မြို့ထဲပတ်ပြီး ဆိုင်တွေထဲဝင်တယ် သူတို့လက်နက်ရှိတော့ ဘယ်သူမှ ဘာမမပြောရဲ့ကြဘူး။ ပစ္စည်းတွေစစ်ဆေးတယ်” ဟု ၎င်းကပြောသည်၊

ထို့ပြင်တာချီလိတ်မြို့သို့ ထိုင်းနိုင်ငံမှ တင်သွင်းသည့် လျှပ်စစ်ပစ္စည်းများ၊ ဆောက်လုပ်ရေးပစ္စည်းများကို အမှတ်(၁) နှင့် အမှတ်(၂)တံတားတွင် ယခုလ အတွင်း သယ်ခွင့်မပြုကြောင်း၊၎င်းပစ္စည်းများကို သယ်ယူခြင်းပါက လာဘ်ထိုးပေးရကြောင်း နယ်စပ်ကူးသန်းရောင်းဝယ်သည့် အမျိုးသားတစ်ဉီးက သျှမ်းသံတော်ဆင့်ကိုပြောသည်။

“ထိုင်းဘက်က သယ်လာတဲ့ ပစ္စည်းတွေဆို အကုန်ထုတ်ခိုင်းတယ် လျှပ်စစ်ပစ္စည်းတွေ ဆောက်လုပ်ရေးပစ္စည်းတွေဆို ပေးမသယ်တော့ဘူး။ သူတို့တောင်းသလောက်သာ ပိုက်ဆံပေးနိုင်ရင် ခိုးဝင်ရတယ်”၎င်းက ပြောသည်။

ဆက်လက်ပြီး တာချီလိတ်လေဆိပ်တွင်လည်း ထိုင်းနိုင်ငံထုတ်လုပ်ထားသည့် ကော်ဖီများ သယ်ယူဆောင် ခွင်မပြုကြောင်းနှင့် ၎င်းပစ္စည်းများသယ်ယူဆောင်လာသူ လေဆိပ်တွင် အကုန်ချထားခဲ့ရကြောင်း တာချီလိတ်မြို့နယ်ခံ အမျိုးသမီးတစ်ဦးက ပြောသည်။

“လေဆိပ်မှာလည်း ထိုင်းကထုတ်ထားတဲ့ ကော်ဖီတွေတောင် ပေးမသယ်တော့ဘူး သွားခါနီးဆိုတော့ အဲမာပဲထားခဲ့ရတယ်။ သူတို့သာ ပစ္စည်းပေးမသွင်းချင်ရင် ဂိတ်ကိုတခုပဲဖွင့်လိုက် ခုဟာက ဖွင့်လည်းဖွင့်ထားတယ် ပိုက်ဆံထိုးပေးရင်ကျ ပေးဖြတ်တယ်။ သူတို့အကျိုးစီးပွားရေးအတွက်ပဲ လုပ်နေကြတာ”ဟု ၎င်းက ပြောသည်။

သျှမ်းရှေ့ မိုင်းလား-ကျိုင်းတုံသွား ကားလမ်း ဝမ်တာပင်းဂိတ်နှင့် ဝမ်တာပုံဂိတ်တွင်လည်း တရုတ်ပစ္စည်းနှင့် ထိုင်းနိုင်ငံပစ္စည်း ပိုမိုဝင်ရောက်နိုင်သည့်နေရာဖြစ်သည့်အတွက် ထိုဂိတ်တွင်လည်း စစ်ဆေးရေးတင်းကြပ်လာသည်ဟု ကျိုင်းတုံဒေသခံတစ်ဦးက ပြောသည်။

“အခုလည်း ကျိုင်းတုံဘက်က စစ်ဆေးရေးတင်းကြပ်လာပြီ။ တရုတ်ပစ္စည်းနဲ့ထိုင်းပစ္စည်းတွေ ပိုဝင်တဲ့နေရာဖြစ်တယ်။ ဂိတ်တွေသာ ပိတ်လိုက်ရင် ကုန်ဈေးနှုန်းတွေ ပိုတက်လာနိုင်တယ်။ ခုတောင် စားဝတ်နေရေးအတွက် မနည်းရုန်းကန်ရှာလုပ်နေရတယ်” ဟု ၎င်းက ပြောသည်။

ထို့အပြင် (အောက်တိုဘာ ၂၂)ရက်နေ့မှ စတင်ပြီး မြန်မာ-တရုတ်နယ်စပ်ရှိ တရုတ်အာဏာပိုင်များမှ မြန်မာပြည်သို့ တင်သွင်းမည့် တပိုင်တနိုင် ပစ္စည်းများကို မူဆယ်မြို့တွင်း ယခင်လို ဖြတ်သန်းခွင့် မပေးဘဲ စစ်ဆေးမှု တင်းကြပ်ကာ အချို့ကုန်ပစ္စည်းများ မြန်မာပြည်ဘက်သို့ တင်သွင်းခွင့် မပြုကြောင်း သိရသည်။

အလုပ်သင် သတင်းထောက် နန်းဆိုင်ခမ်း ရေးသားသည်။