သျှမ်းပြည် ရပ်စောက်မြို့နယ်တွင် သျှမ်းတပ်နှစ်တပ် အချင်းချင်းတိုက်ပွဲဖြစ်ပွားခဲ့ရာ ဘုန်းကြီးကျောင်းပေါ် လက်နက်ကြီးကျ ပေါက်ကွဲခဲ့ခြင်းကြောင့် သံဃာ(၂)ပါး ထိခိုက်ဒဏ်ရာ ရရှိခဲ့ကြောင်း စုံစမ်းသိရသည်။

ယမန်နေ့ (အောက်တိုဘာလ ၈ ရက်) နံနက် ၁၀ နာရီခွဲကျော်တွင် ရပ်စောက်မြို့နယ် ယမ်းတွင်းငါးကြောင် ကျေးရွာအုပ်စုရှိ ရတနာပုံ အရှေ့ရွာနှင့် အနောက်ရွာတို့တွင် ရှမ်းပြည်တိုးတက်ရေးပါတီ (SSPP/SSA) နှင့် သျှမ်းပြည်ပြန်လည်ထူထောင်ရေးကောင်စီ (RCSS/SSA) တို့ အချင်းချင်း ထိတွေ့တိုက်ပွဲ ဖြစ်ပွားခဲ့ကြောင်း ဒေသခံများက ပြောသည်။

၎င်းနှစ်ဘက်ထိတွေ့ တိုက်ပွဲအတွင်း ရတနာပုံ အနောက်ရွာရှိ ဘုန်းကြီးကျောင်းသို့ လက်နက်ကြီး ကျရောက်ပေါက်ကွဲခဲ့ရာ ကျောင်းထိုင်ဆရာတော်နှင့် ဦးပဉ္ဇင်းတစ်ပါးတို့ ဒဏ်ရာပြင်းထန်ပြီး ဆွမ်းစားကျောင်းဆောင်တို့ ထိခိုက်ပျက်စီးခဲ့ကြောင်း ရပ်စောက်ဒေသခံ အမျိုးသမီးတစ်ဦးက ပြောသည်။

“ရတနာပုံ အနောက်ရွာမှာ အစိမ်း(SSPP)နဲ့ အကြား(RCSS)နဲ့ တိုက်ပွဲဖြစ်တာ။ နေ့လယ် ၁၁ နာရီ သံဃာတွေ ဆွမ်းဘုန်းတဲ့အချိန် ဖြစ်တာ။ စဖြစ်တာက ရတနာပုံ အရှေ့ရွာမှာ ပစ်ကြရင်းနဲ့ လက်နက်ငယ်ကနေ လက်နက်ကြီးအထိ လိုက်ပစ်ကြတာ။ အနောက်ရွာ ဘုန်းကြီးကျောင်း ထိပြီးတော့ ဆွမ်းစားနေတဲ့ သံဃာနှစ်ပါး လက်နက်ကြီးစ မှန်တယ်”ဟု အသက်(၄၅)နှစ် အရွယ်ခန့်ရှိ ၎င်းဒေသခံ အမျိုးသမီးက သျှမ်းသံတော်ဆင့်ကို ပြောသည်။

ရပ်စောက်မြို့နယ် သျှမ်းတပ်နှစ်တပ် တိုက်ပွဲအကြား ထိခိုက်ဒဏ်ရာရထားသည့် ကျောင်းထိုင်ဆရာတော်နှင့် ဦးပဉ္ဇင်းတို့ကို တောင်ကြီးမြို့ စဝ်စံထွန်းဆေးရုံသို့ ပို့ဆောင်ပြီး ဆေးကုသမှု ခံယူနေကြောင်း ဒေသခံများထံမှ သိရသည်။

ရပ်စောက်မြို့နယ်အတွင်း သျှမ်းတပ်နှစ်တပ်အကြား ထိတွေ့တိုက်ပွဲကြောင့် ဘုန်းကြီးကျောင်း ထိခိုက်ပျက်စီးပြီး သံဃာ(၂)ပါး ထိခိုက်ဒဏ်ရာရမှုနှင့် ပတ်သက်ပြီး သျှမ်းသံတော်ဆင့်မှ SSPP ပြောရေးဆိုခွင့်ရှိသူ ဗိုလ်မှူးစိုင်းဖုန်းဟန်ထံ ဆက်သွယ်ရန် ကြိုးစားခဲ့သော်လည်း ဖုန်းစက်ပိတ်ထားပြီး RCSS ပြောရေးဆိုခွင့်ရှိသူ ဗိုလ်မှူး စိုင်းခမ်းစံ ထံသို့ ဖုန်းဖြင့်ဆက်သွယ်ခဲ့သော်လည်း ဖုန်းလက်ခံဖြေကြားခြင်း မရှိပေ။

အလားတူ ရပ်စောက်မြို့ မြောက်ဘက်ရှိ ထင်းကွင်းရွာနှင့် တပ်ဦးဘက်တို့တွင် SSPP နှင့် RCSS တပ်ဖွဲ့တို့ မကြာခဏ တိုက်ပွဲဖြစ်ပွားပြီး အနီးအနားရှိ ကျေးရွာများမှ ဒေသခံအချို့မှာ ထွက်ပြေးတိမ်းရှောင်နေရကြောင်း ဒေသခံများက ပြောဆိုသည်။

“ရပ်စောက်မြို့မြောက်ဘက်တော့ နေ့တိုင်းနီးပါး တိုက်ပွဲဖြစ်တာများတယ်။ ထင်းကွင်းရွာနဲ့ တပ်ဦးဘက်ဆိုရင် မနေ့ကော တမြန်နေ့ကော တိုက်ပွဲဖြစ်တယ်။ သေနတ်သံကတော့ နေ့ကော ညကော ကြားနေရတာပဲ။ အင်တောဘက် မဖြစ်ရင် ထင်းကွင်းမှာဖြစ်တယ်၊ မဟုတ်ရင်လည်း ကျောက်ဂူဘက်မှာ ဖြစ်တယ်။ ထင်းကွင်းရွာသားတော့ ပြေးလိုက် ပြန်နေလိုက် အဲ့လိုလုပ်နေတာ”ဟု ၎င်းဒေသခံ အမျိုးသမီးက ဆက်ပြောသည်။

လွန်ခဲ့သည့် သုံးလခန့်မှ စတင်ပြီး ရပ်စောက်မြို့မြောက်ဘက် ကားလမ်းအရှေ့ဘက်ခြမ်းနှင့် အင်တောမြို့သို့ သွားသည့် လမ်းမကြီးတလျှောက်ရှိ ဝမ်ကွေး၊ ဝမ်ဟွေး၊ နားခဲကြီး၊ နားခဲလေး၊ နမ့်လင်းနှင့် နမ့်ဟူး ကျေးရွာများတွင် SSPP တပ်ဖွဲ့မှ ကျေးရွာအတွင်းသို့ အဝင်အထွက် ကတ်ပြားများ ထုတ်ပေးပြီး ခရီးသွားလာခွင့် ကန့်သတ်ထားကြောင်း ဒေသခံများက ပြောဆိုသည်။

ရပ်စောက်မြို့နယ်အတွင်းရှိ SSPP နှင့် RCSS တပ်ဖွဲ့တို့သည် အင်တောမြို့၊ ကျောက်ဂူ၊ ကျိုင်းခမ်း၊ နောင်လုံ စသည့် ကျေးရွာအုပ်စုများတွင် နှစ်ဘက်တင်းမာမှု ဖြစ်ပေါ်လျက်ရှိပြီး မကြာခဏ မိုင်းဆွဲတိုက်ခိုက်ခြင်းများလည်း ဖြစ်ပွားခဲ့ကာ အရပ်သား ထိခိုက်ဒဏ်ရာရမှုများ ရှိနေကြောင်း သိရသည်။