သျှမ်းပြည် အရှေ့ပိုင်းတွင် မိုးဆက်တိုက်ရွာသွန်းမှုကြောင့် ချောင်းရေများ တောင်ကျရေများ မြှင့်တက်ပြီး ရေကြီးရေလျှံ၍ လမ်းနှင့် တံတားများ ပျက်စီးကာ ကားများသွားလာရန် ခက်ခဲနေကြောင်း သတင်းရရှိသည်။
သျှမ်းပြည် အရှေ့ပိုင်း မိုင်တုံမြို့၊မိုင်းဖြတ်မြို့၊တာချီလိတ်မြို့ ၊မိုင်းကိုးကျေးရွာ နှင့် ကျိုင်းတုံမြို့တို့တွင် မိုးရွာသွန်းမှုသဖြင့် ချောင်းရေများ တောင်ကျရေများကြောင့် ရေကြီး ရေလျှံများကြုံ တွေ့နေရကြောင်း သိရသည်။
မိုင်းတုံမြို့နယ်တွင် နှစ်ရက်ဆက်တိုက် မိုးရွာသွန်းမှုကြောင့် ချောင်းရေတက်ကာ မိုင်းတုံ – တာဆန်း ကိုဆက်သွယ်ထားသည့် တံတား ပျက်စီးပြီး ကားကြီး/ငယ်များ သွားလာရန် ခက်ခဲနေကြောင်း မိုင်းတုံမြို့ ဒေသခံ အမျိုးသားတစ်ဦးကသျှမ်းသံတော်ဆင့်ကို ပြောသည်။
“မိုင်းတုံက မိုးနှစ်ရက်ဆက်တိုက်မိုးတွေရွာ ရေတွေကြီးတော့ တံတားက ထပ်ပြီး ပျက်ပြန်ပြီ။ရေတွေက အရင်တစ်ခေါက်ထပ် ပိုကြီးတယ်။သူတို့ အသစ်ပြန်လုပ်ထားတဲ့နေရာက ပျက်သွားတာ။သွားလာဖို့ကလည်း ခက်ပြီ။” ဟု မိုင်းတုံမြို့ ဒေသခံအမျိုးသားတစ်ဦးက ပြောသည်။
အလားတူ မိုင်းဆတ်မြို့တွင် မိုးရွာသွန်းမှု နှင့် တောင်ကျရေများကြောင့် ချောင်းရေမြင့်တက်ကာ မိုင်းဆတ် နှင့် တာချီလိတ်ကို ကြားရှိ နမ့်ကျန်တံတားသည် ချောင်းရေတိုက်စားမှုခံရပြီး စိုးရိမ်ရကြောင်း မိုင်းဆတ်မြို့ ဒေသခံအမျိုးသားတစ်ဦးက ပြောသည်။
“အဲ့မိုင်းဆတ်ကနေ တာချီလိတ်သွားတဲ့လမ်းပေါ်က တံတားပေါ့။လမ်းကော တံတားကောကျဉ်းတယ်လေ။ ချောင်းက တိုက်စားနေတာ။ကားကြီးတွေ ဆိုသွားဖို့ခက်တယ်လောက်တယ်။”ဟု မိုင်းဆတ်မြို့ ဒေသခံအမျိုးသားတစ်ဦးက ပြောသည်။
ထိုပြင် မယ်ဆိုင် ချောင်းရေမြင့်တက်မှုကြောင့် တာချီလိတ်မြို့တွင် ရေကြီးရေလျှံများဖြစ်ပေါ်နေပြီး လျှပ်စစ်အန္တရာယ် ဘေးကင်းရန် အတွက် အနိမ့်ပိုင်းနေရာများကို လျှပ်စစ်မီးများ ခေတ္တဖြတ်တောက်ထားကြောင်း သိရသည်။
ကျိုင်းတုံမြို့တွင်လည်း မိုးရွာသွန်းမှုကြောင့် ယနေ့ (စက်တင်ဘာလ ၁၀ ရက်) နံနက်တွင် လေယာဉ်ကွင်း သွားသည့် လမ်းတွင် ရေကြီးရေလျှံမှုများဖြစ်ပွားနေကြောင်း သိရသည်။
သျှမ်းပြည်အရှေ့ပိုင်းတွင် သစ်တောများ အလွန်အကျွံခုတ်ယူခြင်း၊ သတ္တုများအ လွန်အကျွံ တူးဖော်ခြင်း နှင့် တောတောင်တွင် သစ်ပင်များမရှိတော့သဖြင့် မိုးရွာသွန်းသည်အခါ မြေကြီးမှ ရေစုတ်ယူမှု မရှိတော့သဖြင့် ယခုကဲ့သို့ ရေကြီးရေလျှံမှု ဖြစ်ပွားလာရခြင်းဖြစ်ကြောင်း သဘာဝပတ်ဝန်းကျင် စောင့်ကြည့်လေ့လာသူကဆိုပြန်သည်။
Leave a Comments