သျှမ်းပြည် ရပ်စောက်မြို့နယ်တွင် ဓနုပြည်သူ့လွတ်မြောက်ရေးတပ်ဦး DPLA နှင့် PDF ပူးပေါင်းတပ်ဖွဲ့ကို စစ်ကောင်စီတပ်မှ လေကြောင်းဗုံးကြဲ တိုက်ခိုက်နေစဉ် သျှမ်းတပ်နှစ်တပ် အချင်းချင်း တိုက်ပွဲဖြစ်ပွားပြီး နှစ်ဘက်ထိခိုက်ကျဆုံးမှု ရှိကြောင်း စုံစမ်းသိရသည်။

ယမန်နေ့ (စက်တင်ဘာလ ၃ ရက်) ညနေပိုင်းတွင် ရပ်စောက်မြို့နယ် အင်တောမြို့အနီး ပါမဲနှင့် မားသဲကျေးရွာအုပ်စုအတွင်း ရှမ်းပြည်တိုးတက်ရေးပါတီ (SSPP/SSA) နှင့် သျှမ်းပြည်ပြန်လည်ထူထောင်ရေးကောင်စီ (RCSS/SSA) တို့ အချင်းချင်း ထိတွေ့တိုက်ပွဲ ဖြစ်ပွားခဲ့ပြီး နှစ်ဘက်တပ်သား ထိခိုက်ကျဆုံးမှုရှိကြောင်း ဒေသခံများက ပြောသည်။

“ရေကျော်မှာကျတော့ မိုင်း(၁၀)လုံးလောက် ပေါက်ကွဲတယ် နင်းမိတယ် သူတို့ အစိမ်းက နှစ်ယောက်လား သုံးယောက်လား သေသွားတယ်လို့ ကြားတယ်။ ဖြစ်တာက မားသဲအုပ်စုထဲမှာ။ အဲ့တာက တောထဲမှာကြီး ရွာထဲမှာ မဟုတ်ဘူး။ တိုက်ပွဲဖြစ်တဲ့နေရာမှာ အကြားဘက် တစ်ယောက်သေပြီး တစ်ယောက်အရှင် ဖမ်းမိတယ်လို့ပြောတာ”ဟု ဖြစ်စဉ်သိရှိသူ အင်တောဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

SSPP တပ်ဖွဲ့၏ စစ်ယာဉ်တန်းမှ ကားနှစ်စီးသည် အုန်းတောရွာနှင့် အင်တောမြို့အကြား သွားလာနေစဉ် ရေကျော်တံတားအနီး ယမန်နေ့ (စက်တင်ဘာလ ၃ ရက်) တွင် ဆွဲမိုင်းနင်းမိ၍ SSPP တပ်သား ၃ ဦးထက်မနည်း သေဆုံးခဲ့ကြောင်း ဒေသခံများက ပြောသည်။

အလားတူ ယမန်နေ့ တစ်ရက်တည်းတွင် ရပ်စောက်မြို့နယ် ပါမဲကျေးရွာအုပ်စုရှိ ညောင်ပင်သာရွာအနီး ဖြစ်ပွားခဲ့သည့် သျှမ်းတပ်နှစ်တပ် အချင်းချင်း ထိတွေ့တိုက်ပွဲအတွင်း RCSS တပ်ဖွဲ့မှ တပ်သားတစ်ဦးလည်း သေဆုံးခဲ့ကြောင်း ဒေသခံများက ပြောဆိုသည်။

ရပ်စောက်မြို့နယ်အတွင်း သျှမ်းတပ်နှစ်တပ်အကြား ထိတွေ့တိုက်ပွဲကြောင့် နှစ်ဘက်တပ်သား ထိခိုက်သေဆုံးမှုနှင့် ပတ်သက်ပြီး သျှမ်းသံတော်ဆင့်မှ SSPP ပြောရေးဆိုခွင့်ရှိသူ ဗိုလ်မှူးကြီး စိုင်းဆုထံ ဆက်သွယ်ရန် ကြိုးစားခဲ့သော်လည်း ဖုန်းစက်ပိတ်ထားပြီး RCSS ပြောရေးဆိုခွင့်ရှိသူ ဗိုလ်မှူး စိုင်းခမ်းစံ ထံသို့ ဖုန်းဖြင့်ဆက်သွယ်ခဲ့သော်လည်း ဖုန်းလက်ခံဖြေကြားခြင်း မရှိပေ။

ထို့အပြင် ယနေ့ (စက်တင်ဘာလ ၄ ရက်) နံနက်ပိုင်းအထိ ရပ်စောက်မြို့နယ် ထင်းကွင်းရွာအနီး SSPP နှင့် RCSS နှစ်ဘက်တပ်ဖွဲ့တို့ ထိတွေ့တိုက်ပွဲ ထပ်မံဖြစ်ပွားနေပြီး ထင်းကွင်းကျေးရွာမှ ပြည်သူနေအိမ် (၂) လုံး ထိခိုက်ပျက်စီးကြောင်း ဒေသခံများထံမှ သိရသည်။

လက်ရှိတွင် SSPP နှင့် RCSS တပ်ဖွဲ့တို့သည် ရပ်စောက်မြို့နယ်အတွင်းရှိ အင်တောမြို့၊ ကျိုင်းခမ်း၊ နောင်လုံ၊ မားသဲ၊ ပါမဲကျေးရွာအုပ်စု အနီးတဝိုက်တွင် နှစ်ဘက်တင်းမာမှု ဖြစ်ပေါ်လျက်ရှိပြီး မကြာခဏ မိုင်းဆွဲတိုက်ခိုက်ခြင်းများ (၇) ကြိမ်ထက်မနည်း ဖြစ်ပွားခဲ့ကာ အရပ်သား ထိခိုက်ဒဏ်ရာရမှုများ ရှိနေကြောင်း ဒေသခံများက ပြောသည်။

အခြားတဘက်တွင် စက်တင်ဘာလ ၃ ရက်က ရပ်စောက်မြို့နယ် ကျောက်ဂူတိုက်နယ် ဝါးပြားကျေးရွာသို့ စစ်ကောင်စီတပ်မှ တိုက်ပွဲဖြစ်ပွားခြင်းမရှိဘဲ ဓနုပြည်သူ့လွတ်မြောက်ရေးတပ်ဦး DPLA နှင့် PDF ပူးပေါင်းတပ်ဖွဲ့ ရောက်ရှိနေသည်ဟု ဆိုကာ လေကြောင်းဗုံးကြဲ တိုက်ခိုက်ခဲ့ခြင်းကြောင့် အသက် ၆၀ အရွယ် အမျိုးသမီးတစ်ဦး ထိခိုက်ဒဏ်ရာ ရရှိခဲ့သည်။