ကချင်လွတ်လပ်ရေးတပ်မတော် (KIA) လက်အောက် ဒေသခံမူးယစ်တိုက်ဖျက်ရေးအဖွဲ့များ၏ သတိပေးဆိုင်းဘုတ်များကို ကိုးကန့်တပ်ဖွဲ့ ( MNDAA) မှ ဖျက်ဆီးခဲ့ကြောင်း စုံစမ်းသိရသည်။

မူဆယ်မြို့နယ် မုံးပေါ်ဒေသရှိ ကျေးရွာများတွင် စိုက်ထူးထားသော မူးယစ်တိုက်ဖျက်ရေး (Pat Jasan) အဖွဲ့များ၏ သတိပေးကြေညာချက် ဆိုင်းဘုတ်များကို ကိုးကန့်တပ်ဖွဲ့ MNDAA မှ ယမန်နေ့ (သြဂုတ် ၂၈) ရက်က လိုက်လံဖျက်ဆီးခဲ့သည်ဟု သိရသည်။

ထိုကိစ္စနှင့် ပတ်သက်၍ KIO/KIA ပြောရေးဆိုခွင့်ရှိသူ ဗိုလ်မှူးကြီးနော်ဘူက “ကျနော်ကြားတာကတော့ သူတို့ရဲ့ အုပ်ချုပ်နယ်မြေဖြစ်နေပါတယ်တဲ့။ လုပ်သင့်လုပ်ထိုက်တာကို ကျနော်တို့ လုပ်မယ်ဆိုပြီးတော့မှ ကျနော်တို့ရဲ့ ဆိုင်းဘုတ်တွေကို သူတို့က ဖြုတ်လိုက်တယ်ဖြစ်တယ်လို့ ပြောတာ ကြားရပါတယ်။ ဒါကတော့ ဘယ်လောက်ထိ မှန်ကန်မှုရှိတဲ့ အုပ်ချုပ်မှု ဟုတ်သလား၊ မဟုတ်ဘူးလား ဆိုတာကိုတော့ ကျနော်လည်း ပြောလို့မရဘူး” ဟု သျှမ်းသံတော်ဆင့်ကို ပြောသည်။

ထို့အပြင် လုံဂျာကျေးရွာအတွင်း စိုက်ထူးထားသော မူးယစ်တိုက်ဖျက်ရေး သတိပေးဆိုင်းဘုတ်များကိုလည်း MNDAA မှ ယမန်နေ့ မွန်းလွဲပိုင်းက ထပ်မံဖျက်ဆီးခဲ့ကြောင်း သိရှိရသည်။

နယ်မြေဒေသအတွင်း ဖြစ်ပေါ်နေသည့် ယင်းကိစ္စများသည် အသေးအမွှားကိစ္စဟု ဆိုသော်လည်း ရေရှည်မှာ သေချာမကိုင်တွယ်နိုင်ပါက ပြဿနာဖြစ်လာနိုင်ကြောင်း ဗိုလ်မှူးကြီးနော်ဘူက ဆက်ပြောသည်။

“ဒီကိစ္စက အရေးကြီးပါတယ်။ ဒီကိစ္စနဲ့ ပတ်သက်ပြီး ကျနော်တို့ လက်နက်ကိုင်အဖွဲ့အစည်းတွေ၊ ကျနော်တို့ တော်လှန်ရေးအဖွဲ့အစည်းတွေ အင်မတန်မှ အရေးကြီးတဲ့အချက်ဖြစ်ပါတယ်။ အချင်းချင်း ညှိရမယ်၊ ဆွေးနွေး ရမယ်၊ မဟုတ်လို့ရှိရင် ကျနော်တို့ ထိတွေ့မှုများလို့ရှိရင်တော့ နောက်နှောင်မှာ ဒီထက်ပြဿနာကြီးတွေ ပေါ်လာနိုင်ပါတယ်။ ဒါကြောင့် အဲ့ဒါကိုကိုင်တွယ်တဲ့နေရာမှာလည်း သတိထားဖို့က အရေးပါတယ်” ဟု ပြောသည်။

အဆိုပါ ကိစ္စနှင့်ပတ်သက်ပြီး MNDAA ကို ဆက်သွယ်မေးမြန်းခဲ့သော်လည်းမရရှိခဲ့ပေ။

လက်ရှိတွင် စစ်အာဏာရှင်နစ်ကို ချုပ်ငြိမ်းရေးအတွက် တိုင်းရင်းသားများအားလုံး၊ ပြည်သူလူထုများအားလုံး လက်တွဲပြီး တော်လှန်နေသော ကာလဖြစ်၍ လက်နက်ကိုင်အချင်းချင်းကြားက ပြဿနာကို ဦးစားပေးပြီး လုပ်ဆောင်ရန် မသင့်တော်သည့်အချိန်အခါဖြစ်ကြောင်း၊ လက်နက်ကိုင် အဖွဲ့အစည်းများအကြား အချင်းချင်း တန်းဖိုးထားပြီး အသိအမှတ်ပြုကြရန် လိုကြောင်း၊ ဘုံရန်သူကိုသာ ဦးစားပေးပြီး တော်လှန်ရန် အရေကြီးကြောင်း ဆိုသည်။

ပြီးခဲ့သည့် မေလ ၂၆ ရက်တွင် ပန်ဆိုင်းမြို့နယ် ဖိုင်ကောင်းကျေးရွာ စာသင်ကျောင်းမှ ကျောင်းသားမိဘများနှင့် ကျောင်းဆရာ/မ များကို MNDAA မှ စစ်အင်အားသုံးပြီး ခြိမ်းခြောက်ခြင်း၊ ကချင်အမျိုးသား အလံများကို ဖြုတ်ချခြင်း ပြုလုပ်ခဲ့သည်။