သျှမ်းပြည်အရှေ့ပိုင်း တာချီလိတ်ခရိုင် မိုင်းဖြတ်မြို့အဝင် စစ်ဆေးရေးဂိတ်တွင် ခရီးဝေးသို့ ဆက်သွားမည့် ကားများကိုသာ ငွေအဆမတန် ကောက်ခံနေသည်ဟု စုံစမ်းသိရသည်။
မိုင်းဖြတ်မြို့အဝင် ဟိုနား(စောမွန်)ရွာရှိ စစ်ဆေးရေးဂိတ်တွင် ခရီးဝေးသို့ ဆက်သွားမည့် ခရီးသည်တင် ကားများနှင့် လူမျိုးဘာသာကို စစ်မေးပြီး ငွေအဆမတန် ကောက်ခံနေသည်ဟု ယာဉ်မောင်းအမျိုးသားတစ်ဦးက သျှမ်းသံဆော်ဆင့်ကို ပြောသည်။
အဆိုပါ ကောက်ခံနေသည့် ငွေပမာဏသည် ကားတစ်စီးကို ကျပ်ငွေ ၅ သောင်းမှ တစ်သိန်းကျပ် အထိဖြစ်ပြီး ယခုလို ကောက်ခံနေသည်မှာ ၂ လကျော် ကြာပြီဖြစ်ကြောင်း သိရသည်။
“ခရီးဝေးကားဆိုရင် သူတို့ လူမျိုးဘာသာ ကြည့်ပြီး ကောက်တယ်။ အဓိက တိုင်းရင်းသား ဖြစ်တဲ့သူတွေပေါ့။ ဟိုနား ဂိတ်က ပိုတောင်းတယ်။ တခါနဲ့တခါ ငွေတောင်းတာတော့ မတူဘူး ဆိုပေမဲ့ တဖြေးဖြေးနဲ့တော့ ပိုများလာတယ်”ဟု ၎င်းယာဉ်မောင်းက သျှမ်းသံတော်ဆင့်ကို ပြောသည်။
မိုင်းဖြတ်မြို့အဝင်နှင့် တာချီလိတ်မြို့အဝင်ရှိ စစ်ဆေးဂိတ်များတွင် ကားသမားများကို တရားမဝင် ငွေတောင်းခံပြီး ဂိတ်အစောင့်ချထားသည့် ရဲတပ်ဖွဲ့ဝင်များနှင့် ရဲတပ်ဖွဲ့မှူးရုံးအရာရှိတို့ကြား ငွေကြေးကိစ္စ အငြင်းပွားမှုများ ဖြစ်ပွားသည်ဟု ဖြစ်စဉ်သိရှိသူတစ်ဦးက ပြောသည်။
“ဟုတ်တယ်၊ ပိုက်ဆံတွေကောက်တယ်၊ မြို့ခံတွေကိုတော့ မကောက်ဘူး။ ဂိတ်အစောင့် ချထားတဲ့ရဲနဲ့ ရဲတပ်ဖွဲ့မှူးရုံးက အရာရှိတွေက အဲ့ပိုက်ဆံကိစ္စနဲ့ အငြင်းပွားတာတွေ ဖြစ်နေကြတယ်”ဟု ဖြစ်စဉ်သိရှိသူတစ်ဦးက သျှမ်းသံတော်ဆင့်ကို ပြောသည်။
ထို့အပြင် မိုင်းဖြတ်မြို့ အဝင်လမ်းနှင့် မြို့ထဲရှိ လမ်းမကြီးအများစုသည် အချိန်ကြာမြင့်နေပြီး ပြန်လည်ပြုပြင်ခြင်း မရှိသောကြောင့် ချိုင့်ခွက်များဖြစ်ကာ သွားလာရန် ခက်ခဲနေသည်ဟု ဒေသခံပြောပြချက်အရ သိရသည်။
အလုပ်သင် သတင်းထောက် နန်းဆိုင်ခမ်း ရေးသားသည်။
Leave a Comments