သျှမ်းပြည် လားရှိုးမြို့မှာတိုက်ပွဲဖြစ်ပြီးနောက်ပိုင်း ကိုးကန့်တပ်ဖွဲ့ MNDAA တပ်ဖွဲ့က လူသစ်စုဆောင်းဖို့အတွက် တစ်အိမ်တက် တစ်အိမ်ဆင်းကာ အမျိုးသမီး၊ အမျိုးသား အပါအဝင် လူကြီးနှင့် လူငယ်အမရွေး အဓမ္မဖမ်းဆီးနေတယ်ဆိုပြီး သတင်းတစ်ပုဒ်ဖြန့်ချိနေပါတယ်။

စစ်ကောင်စီဝါဒဖြန့်တယ်လီဂရမ်ချန်နယ် Ka Ka Han ချန်နယ်ကဖြန့်ချိခဲ့တာ ဖြစ်ပြီး “အခုလည်း MNDAA ဟာ လားရှိုးမှာ အရက်စက်ဆုံးနည်းလမ်းတွေကို ထုတ်သုံးပြီး တစ်အိမ်တက် တစ်အိမ်ဆင်း မိန်းမ၊ ယောက်ျား လူကြီး လူငယ်မရွေး လူသစ်စုဆောင်းဖို့ အဓမ္မဖမ်းဆီးနေပြီတဲ့” လို့ (မူရင်းအတိုင်း) ရေးသားဖြန့်ချိထားပါတယ်။

ဒါ့အပြင် Freedom News Group နာမည်ရှိ ပေ့ချ်တစ်ခုကဖော်ပြထားသော အကြောင်းအရာကိုလည်း စခရင်ရှော့ (screenshot) ဓာတ်ပုံနှင့်အတူ ဖြန့်ဝေထားပါတယ်။

အဲ့ဒီသတင်းအမှားကို ကြည့်ရှု့သူပေါင်း ၁၅,၀၀၀ ကျော်ရှိပါတယ်။

မူရင်းလင့်ခ် – https://archive.ph/Ckq28
ဆက်စပ်သတင်းအမှားလင့်ခ် – https://t.me/KaKaHan777999/25969

သျှမ်းသံတော်ဆင့် အချက်အလက် စစ်ဆေးသူများအနေနဲ့ အဲ့ဒီအကြောင်းအရာကို စစ်ဆေးကြည့်တဲ့အခါမှာ လုပ်ကြံရေးသားထားတဲ့ ဝါဒဖြန့်သတင်းအမှားဖြစ်တာကိုတွေ့ရပါတယ်။

သတင်း စစ်ဆေးတွေ့ရှိချက်

၂၀၂၄ သြဂုတ် ၁၇ ရက်နေ့က ရွှေဖီမြေသတင်းဌာနမှတင်ဆင်ထားသော အင်တာဗျူးရုပ်သံတစ်ခုမှာ
“လက်ရှိမှာ အုပ်ချုပ်ရေးယန္တရားတည်ထောင်နေတဲ့အချိန်ဆိုတော့လေ သူခိုးတွေကတော့ လက်ရှိသောင်းကြမ်းနေတယ်ဆိုတာ မှန်ပါတယ်။ အဲ့ဒီအတွက်လည်း ကျနော်တို့ MNDAA ရဲ့ ပြည်တွင်းရဲကနေ ညလုံခြုံရေးပတ်တာတွေ၊ တကယ်လို့ မသင်္ကာဖွယ် ကားပေါ်မှာပစ္စည်းတင်နေတာတွေ့ရင် ကျနော်တို့က ရှောင်သခင်ဝင်ရောက်စစ်ဆေးတယ်” (မူရင်းအတိုင်း) ဆိုပြီး ကိုးကန့်သတင်းပြန်ကြားရေးအဖွဲ့ ဦးဂျာရီးက ပြောပါတယ်။ မူရင်းလင့်ခ် – https://shorturl.at/xnGj8

MNDAA က လူသစ်စုဆောင်းနေတယ်ဆိုတဲ့ သတင်းနဲ့ပတ်သက်ပြီး နေရပ်ပြန်သွားတဲ့ လားရှိုးမြို့ဒေသခံ အမျိုးသမီးတစ်ဦးကို မေးမြန်းခဲ့ရာမှာ “အခုလားရှိုးမြို့ကို သွားသွားပြန်ပြန်လုပ်နေတာပဲ။ ဒါပေမဲ့ ကိုးကန့်က လူသစ်စုဆောင်းနေတယ် ဘာညာတော့မကြားဘူး။ မြို့ထဲမှာပစ္စည်းခိုးနေတဲ့သူတွေကိုတော့ ဖမ်းနေတာရှိတယ်” လို့ ပြောပါတယ်။

လားရှိုးမြို့နဲ့ ကျောက်မဲမြို့ကို တော်လှန်အင်းအားစုဘက်က ထိန်းချုပ်ထားပြီး နှစ်ပတ်ကျော်အကြာ ဖုန်းလိုင်းနှင့် လျှပ်စစ်မီး ပြန်ရတော့မယ်ဆိုတဲ့ သတင်းကြကောင့် စစ်ရှောင်များနေရပ်သို့ ပြန်နေကြကြောင်း ဒေသခံကိုကိုးကာပြီး သျှမ်းသံတော်ဆင့် သတင်းတစ်ပုဒ်မှာလည်း ဖော်ပြထားပါတယ်။

ဆက်စပ်ဖတ်ရှု့ရန် – https://shorturl.at/hYoIh

လွတ်လပ်ပြီး ယုံကြည်စိတ်ချရသော Myanmar Now သတင်းတစ်ပုဒ်မှာလည်း “ စစ်ရှောင်များ လားရှိုးပြန်ရောက်၊ ကိုးကန့်တပ်က မြို့အုပ်ချုပ်ရေးစတင်” ဆိုပြီး သြဂုတ် ၁၄ ရက်နေ့က ဖော်ပြထားပါတယ်။

သတင်းလင့်ခ် – https://shorturl.at/aEEGk

သုံးသပ်ချက်

ဒါကြောင့် လားရှိုးမြို့တိုက်ပွဲဖြစ်ပြီးနောက်ပိုင်း ကိုးကန့်တပ်ဖွဲ့ MNDAA တပ်ဖွဲ့က လူသစ်စုဆောင်းဖို့အတွက် တစ်အိမ်တက်တစ်အိမ်ဆင်းကာ အဓမ္မဖမ်းဆီးနေတယ်လို့ စစ်ကောင်စီဝါဒဖြန့်ချိမှုမှာ မှားယွင်းနေပါတယ်။

သတင်းအမှားဖြန့်ချိသူတွေက လားရှိုးမှာသူခိုးဖမ်းနေတဲ့အကြောင်းအရာကို အခြေခံပြုပြီးတော့ ကိုးကန့်တပ်ဖွဲ့ MNDAA တပ်ဖွဲ့က လူသစ်စုဆောင်းဖို့အတွက် အဓမ္မဖမ်းဆီးနေသယောင် လှည့်ဖြားမှားယွင်းဖြန့်ချိနေခြင်း ဖြစ်ပါတယ်။

သျှမ်းသံတော်ဆင့် စာဖတ်ပရိတ်သတ်တွေအနေနဲ့ လူမှုကွန်ရက် စာမျက်နှာတွေမှာ ဖော်ပြနေတဲ့ သတင်းတွေကို ချက်ချင်းမယုံကြည်ဘဲ စိတ်ချရသော သတင်းမီဒီတွေမှာ သွားရောက်ဖတ်ရှု့ကြဖို့ တိုက်တွန်းပါတယ်။

သတင်းတုသတင်းအမှားများနှင့် ပတ်သက်ပြီး အချက်အလက်စစ်ဆေး မေးမြန်းလိုလျှင် Myanmar Fact-Checking Network အဖွဲ့ဝင်ဖြစ်သော သျှမ်းသံတော်ဆင့် လူမှုကွန်ရက်စာမျက်နှာ (SHAN Burmese Vision ) Facebook Chat Box ကနေဆစ်ဆင့်သတင်းရဲ့ လင့်ခ် (သို့မဟုတ်) Screen Short ပုံပေးပို့ခြင်းဖြင့် စစ်ဆေးနိုင်ပါတယ်။