သျှမ်းပြည်တောင်ပိုင်း လွိုင်လင်ခရိုင်နှင့် တောင်ကြီးခရိုင်တို့ဘက်တွင် စက်သုံးဆီများပြတ်လပ်နေပြီး ထောက်ခံစာဖြင့်ဝယ်နေရကြောင်း စုံစမ်းသိရသည်။

ယမန်နေ့ (ဇူလိုင် ၃၁)ရက် ညနေပိုင်းတွင် စက်သုံးဆီရောင်းချနေသည့် ဆိုင်ကြီးများတွင် တန်းစီပြီး ထောက်ခံစာဖပါလာသည့် သူများကိုသာ ရောင်းချပေးနေကြောင်း တောင်ကြီးမြို့နယ် မှ ဒေသခံ အမျိုးသမီးတစ်ဦး ကသျှမ်းသံတော်ဆင့်ကိုပြောသည်။

‘’၂ပိဿာပုံးနဲ့သွားဝယ်တာတောင် ထောက်ခံစာပါမှ ရောင်းပေးတာ ။ အိမ်က မီးစက်အတွက် ပုံးနဲ့ဆီဝယ်ဖို့သွားယူရတာ ထောက်ခံစာမပါရင် မရောင်ပေးဘူး’’ဟု တောင်ကြီး မြို့နယ်မှ အမျိုးသမီးတစ်ဦးက ပြောသည်။

လက်ရှိ စက်သုံးဆီရောင်းချရန် သိုလှောင်ထားသည့် ဆီများ မရှိသည့်အတွက် ဆိုင်အများအပြား ပိတ်ထားရကြောင်း၊ စက်သုံးဆီ သိုလှောင်ပြီး ရောင်းချနေသည့် ဆိုင်များလည်း အဆမတန် စျေးနှုန်းမြှင့်ကာ ရောင်းချနေမှုကြောင့် ပြည်သူများ အခက်ကြုံနေရကြောင်း ၎င်းက ဆိုသည်။

‘’ ဒေါ်လာစျေး၊ ဘတ်ဈေး တက်လာတော့ အကုန်လိုက်တက်မှာလေ။ စက်သုံးဆီတွေက အဓိကစျေးတက်နေတာ၊ အဲဒါတောင် ဆီက လိုသလောက် မရဘူး။ ဒီဇယ်ကတော့ သိပ်မပြတ်သေးဘူးဆိုပေမယ့် ဘယ်လောက်ကြာကြာ ရှိဦးမလဲ မပြောတတ်သေးဘူး”ဟု ပင်လုံ ဒေသခံတစ်ဦးက သျှမ်းသံတော်ဆင့်ကို ပြောသည်။

သျှမ်းပြည်မြောက်ပိုင်းအတွင်း စစ်ကောင်စီတပ်နှင့် ညီနောင်မဟာမိတ် တပ်ဖွဲ့များအကြား စစ်ရေးဆက်လက် ပြင်းထန်နေပြီး “၁၀၂၇ စစ်ဆင်ရေး” စတင်ကတည်းက တရုတ်-မြန်မာ နယ်စပ်ကုန်သွယ်ရေး လမ်းကြောင်း ပြတ်တောက်သွားသကဲ့သို့ သျှမ်းပြည်မြောက်ပိုင်းနှင့် မန္တလေး ဆက်သွယ်သည့် ပြည်ထောင်စုလမ်းမကြီးလည်း ကုန်သွယ်စီးဆင်းမှု မရှိတော့ပေ။

ထို့ကြောင့် သျှမ်းမြောက်မှ မန္တလေးသို့ သွားလိုပါက သျှမ်းပြည်တောင်ပိုင်း လွိုင်လင်ခရိုင်ကို ဖြတ်သန်းကာ သွားလာနေရပြီး လားရှိုးမြို့မှ စစ်ဘေးရှောင်များလည်း လွိုင်လင်ခရိုင်အတွင်း အများအပြား စစ်ဘေးရှောင်လာကြကြောင်း ဒေသခံများက ပြောသည်။

အလုပ်သင် သတင်းထောက် နန်းဆိုင်ခမ်း ရေးသားသည်။​