သျှမ်းပြည် သိန္နီမြို့ပေါ်ရှိ ကိုးကန့်တပ်ဖွဲ့ MNDAA ထိန်းချုပ်ထားသည့် ရဲစခန်းသို့ စစ်ကောင်စီတပ်က ညသန်းခေါင်အချိန် လေကြောင်းဗုံးကြဲတိုက်ခိုက်ခဲ့ကြောင်း စုံစမ်းသိရသည်။
ယမန်နေ့ (ဇူလိုင်လ ၃ ရက်) ညသန်းခေါင်ကျော်တွင် သိန္နီမြို့ပေါ် ရပ်ကွက်(၂) ရှိ ရဲစခန်းအနောက်ဘက်သို့ စစ်ကောင်စီတပ်မှ ဂျက်လေယာဉ်ဖြင့် ဗုံး ၃ လုံး လာရောက်ကြဲချသွားခဲ့ရာ ပြည်သူနေအိမ်အနီး ကျရောက်ပေါက်ကွဲခဲ့ပြီး (၁၀) လုံးထက်မနည်း ထိခိုက်ပျက်စီးသွားကြောင်း သိန္နီဒေသခံများက ပြောသည်။
“မနေ့ညက ၁၀နာရီတစ်ကြိမ် လာပတ်သွားတာ၊ ညသန်းခေါင်ကျော်မှာ သိန္နီရဲစခန်းနားကို ဂျက်လေယာဉ်နဲ့ ၃ ခါ လာချသွားတာ။ အဲ့နောက်က ပါ့လှ မုန့်ဟင်းခါးဆိုင်ပေါ် ကျပြီး အိမ် ၂ လုံးကတော့ လုံးဝ ရစရာ မရှိအောင် ပြိုကျသွားတယ်။ တခြားအိမ်လဲ အမိုးလှန်တာ၊ အိမ်ထရံကွာတာနဲ့ လူထိတာတော့လည်း ရှိတယ်”ဟု သိန္နီမြို့မှ ဒေသခံအမျိုးသမီး တစ်ဦးက သျှမ်းသံတော်ဆင့်ကို ပြောသည်။
အလားတူ ယမန်နေ့ (ဇူလိုင် ၄ ရက်) မွန်းလွဲ ၂ နာရီကျော်တွင် သိန္နီမြို့နယ်အတွင်း မိုင်းလီကျေးရွာအုပ်စုရှိ စာသင်ကျောင်းအနီးသို့ စစ်ကောင်စီတပ်မှ လေကြောင်းဖြင့် ဗုံးကြဲတိုက်ခိုက်ခဲ့ရာ အသက် ၃၀ ကျော်အရွယ်ရှိ အမျိုးသားတစ်ဦး သေဆုံးသွားခဲ့ပြီး လူနေအိမ်လည်း ထိခိုက်ပျက်စီးကြောင်း ဒေသခံများ ထံမှ သိရသည်။
“မြို့ပေါ်မှာတော့ ကိုးကန့်စစ်သားတွေ မရှိတော့ဘူး၊ အောက်ဘက်(လားရှိုး)ကို ဆင်းသွားပြီလို့ ပြောကြတယ်။ အခုဟာက မိုးပေါ်ကနေ လေယာဉ်နဲ့ ဗုံးထပ်လာကြဲမှာကို ကြောက်ရတာ။ အရင်တစ်ခါကတည်း သိန္နီက ဆိုးဆိုးရွားရွား ခံခဲ့ရပြီးပြီလေ။ ဒီနေ့မနက်တော့ ဘေးလွတ်မယ့်ရွာတွေဘက် စစ်ရှောင်ကြတယ်”ဟု သိန္နီမြို့မှ ၎င်းဒေသခံ အမျိုးသမီးက သျှမ်းသံတော်ဆင့်ကို ဆက်ပြောသည်။
ကိုးကန့်တပ်ဖွဲ့ MNDAA ထိန်းချုပ်ထားသည့် သိန္နီမြို့နယ်အတွင်းသို့ စစ်ကောင်စီတပ်က တကျော့ပြန် လေကြောင်းဗုံးကြဲ တိုက်ခိုက်လာခြင်းကြောင့် ဒေသခံများမှာ လုံခြုံရေး စိုးရိမ်ထိတ်လန့်ပြီး ဘေးလွတ်ကင်းရာသို့ ထပ်မံတိမ်းရှောင်ရန် ပြင်ဆင်နေကြကြောင်း ဒေသခံများထံမှ သိရသည်။
ပြီးခဲ့သည့် ၂၀၂၃ အောက်တိုဘာ နောက်ဆုံးပတ်မှ စတင်ခဲ့သည် စစ်ကောင်စီ နှင့် ညီနောင်မဟာမိတ်တို့၏ “၁၀၂၇ စစ်ဆင်ရေး”အတွင်း သိန္နီမြို့ပေါ်နှင့်ကျေးရွာအုပ်စု (၁၀) စုကျော်မှ ဘာသာရေး အဆောက်အဦးနှင့် ပြည်သူနေအိမ် ၆၀၀ ထပ်မနည်း ပျက်စီးခဲ့ပြီး ဒေသခံထက်ဝက်ကျော် ထွက်ပြေးတိမ်းရှောင်ခဲ့ရသည်။
ဇွန်လ ၂၅ ရက်မှ စတင်ပြီး နောင်ချို၊ ကျောက်မဲ၊ သီပေါ၊ မိုးကုတ်နှင့် မိုးမိတ်မြို့နယ်များတွင် စစ်ကောင်စီတပ်နှင့် တအာင်း(ပလောင်) အမျိုးသားလွတ်မြောက်ရေးတပ်မတော် TNLA တို့အကြား မြို့သိမ်းတိုက်ပွဲများ ပြန်လည်ဖြစ်ပွားလာခဲ့သည်။
ဇူလိုင်လ ၃ ရက်နေ့တွင် လားရှိုးမြို့အခြေစိုက် အရှေ့မြောက်တိုင်း စစ်ဌာနချုပ် ရမခကို ကိုးကန့်တပ်ဖွဲ့ MNDAA အပါအဝင် ညီနောင်မဟာမိတ်တပ်များက ထိုးစစ်ဆင် တိုက်ခိုက်လျက်ရှိရာ သိန္နီမြို့ဘက်သို့ စစ်ကောင်စီတပ်က လေကြောင်းဖြင့် ထပ်မံဗုံးကြဲ တိုက်ခိုက်လာခြင်းဖြစ်ကြောင်း ဒေသခံများက ပြောဆိုသည်။
Leave a Comments