သျှမ်းပြည် လဲချားမြို့နယ်တွင် သျှမ်းပြည်ပြန်လည်ထူထောင်ရေးကောင်စီ RCSS နှင့် ရှမ်းပြည်တိုးတက်ရေးပါတီ SSPP တို့ ရက်ဆက်တိုက်ပွဲဖြစ်ပွားနေကြောင်း စုံစမ်းသိရသည်။

လဲချားမြို့နယ်နှင့် ရပ်စောက်မြို့နယ်တွင် ပြီးခဲ့သည့် ဇွန်လဆန်းကတည်းက RCSS နှင့် SSPP တို့အကြား တိုက်ပွဲရက်ဆက် ပြင်းထန်လာနေခြင်း ဖြစ်သည်။

ဇူလိုင် ၁ ရက်နေ့က လဲချားမြို့နယ် မန်စိမ်းကျေးအုပ်စုအတွင်း တိုက်ပွဲထပ်မံဖြစ်ပွားခဲ့ရာ RCSS ဘက်က တပ်သား ၁ ဦးကျဆုံးပြီး သေနတ်ကျည်ဆံအချို့ကိုလည်း သိမ်းဆည်းရမိခဲ့သည်ဟု SSPP ယနေ့ ဇူလိုင် ၃ ရက်တွင်ထုတ်ပြန်ထားသည်။

SSPP ကနယ်မြေရှင်းလင်းရေး လုပ်ဆောင်ရာတွင် RCSS တပ်သား ရုပ်အလောင်း ၁ လောင်း၊ M16 သေနတ် အမျိုးအစား ၁ လတ်၊ စကားပြောစက် ၁ လုံး၊ ကျည်ဆံအချို့နှင့် ဖောက်ခွဲရေး ဆက်စပ်ပစ္စည်း အချို့ကို သိမ်းဆည်းရမိကြောင်း ဖော်ပြထားသည်။

လက်ရှိ လဲချားမြို့နယ်နှင့် ရပ်စောင်မြို့နယ်အတွင်း ဖြစ်ပွားနေသည့် တိုက်ပွဲတွင် RCSS ဘက်က မိုင်းထောင် တိုက်ခိုက်ခြင်းကြောင့် ဖြစ်ရသည်ဟု SSPP က၎င်းလူမှုကွန်ရက် SSPP Info စာမျက်နှာတွင် မကြာခဏ ဖော်ပြလေ့ရှိသည်။

သို့သော် မိုင်းထောင်သည့်ကိစ္စနှင့် ပတ်သက်၍ RCSS ဘက်ကတော့ တစ်စုံတစ်ရာထုတ်ပြန်ထားခြင်း မရှိပေ။

ပြီးခဲ့သည့် ဇူလိုင် ၁ ရက်နေ့တွင်လည်း မိုင်းနောင်မြို့နယ် နမ့်ဟူးကျေးရွာအရှေ့ဘက် လမ်းပေါ်မှာ အမျိုးသား ၁ ဦး မြေမြုပ်မိုင်းနင်းမိပြီး ထိခိုက်ဒဏ်ရာရရှိခဲ့ကြောင်း သိရသည်။