သျှမ်းပြည်နှင့် မန္တလေးတိုင်း နယ်စပ်မြို့ဖြစ်သည့် မတ္တမြားမြေ မိုးကုတ်မြို့နယ်တွင် ယနေ့ (ဇွန် ၂၅ ရက်) နံနက်က စပြီး တိုက်ပွဲ ပြင်းထန်နေရာ လက်နက်ကြီး ပစ်ခတ်သံများ ကြားနေရသည်ဟု မိုးကုတ်မြို့ခံများက ပြောသည်။

TNLA/ PDF တပ်များက မိုးကုတ်မြို့ အနောက်ဘက်၊ ဒေါ်နန်းကြည်တောင်ရှိ စစ်ကောင်စီတပ်ကို ထိုးစစ်ဆင် တိုက်ခိုက်နေပြီး လက်နက်ကြီး၊ လက်နက်ငယ်သံများ ကြားနေရသည်ဟု မြို့ အနောက်ပိုင်းတွင် နေထိုင်သည့် ဒေသခံ တစ်ဦးက ပြောသည်။

“အခုထိ ကြားနေရတယ်။ လက်နက်ကြီးသံတွေကော။ သေနတ်သံတွေကော။ ခုထိ မြို့ထဲတော့ ဖြစ်သံ မကြားသေးဘူး” ၎င်းကဆိုသည်။

လက်ရှိ မြို့ပေါ်ရှိ ကျောင်းများ ပိတ်လိုက်ပြီဖြစ်ပြီး ဆိုင်အချို့ပိတ်ထားကာ ဖွင့်ထားသည့် ဆိုင်အချို့ စားသောက်ကုန်များကို ထိန်းရောင်းနေကြောင်း၊ မြို့ပေါ်တွင် သွားလာသူများ ရှိနေဆဲဖြစ်ကြောင်း မြို့ခံများက ဆိုသည်။

“ကျပ်ပြင်-ဂွေ့ကြီးဘက် (မြို့အနောက်ဘက်) ဖြစ်တယ် ပြောတယ်။ အရှေ့ဘက်ကတော့ သိပ်မကြားဘူး။ မြို့က ထွက်တဲ့လူတွေလည်း ထွက်နေတယ်။ တံတားကျိုးလို့ လမ်းမှာ ပိတ်မိနေတယ်လို့ ပြောသံလည်း ကြားတယ်။ သေချာတော့ မသိဘူး” ဟု မြို့ခံ အမျိုးသမီး တစ်ဦးက ပြောသည်။

ယနေ့ နေ့လယ်ပိုင်း ပစ်ခတ်သံများ လျော့သွားသော်လည်း မြို့အနီးရှိ စစ်ကောင်စီတပ် ဗျူဟာကုန်းက လက်နက်ကြီး ပစ်ခတ်သံများ ကြားနေရဆဲဖြစ်ကြောင်း၊ မြို့တွင်း၌ သွားလာမှုများ ရှိနေဆဲဖြစ်ကြောင်း မြို့ခံများက ဆိုသည်။

လက်ရှိ မိုးကုတ်မြို့ပေါ် တည်ငြိမ်နေဆဲဖြစ်ပြီး ဖုန်းနှင့် အင်တာနက်လိုင်းများ ကောင်းမွန်ကြောင်း၊ တိုက်ပွဲ အခြေအနေနှင့် တကွ မိုးကုတ်- မန္တလေး လမ်းပိုင်း အခြေအနေ သတင်းမျိုးစုံ ထွက်ပေါ်နေသဖြင့် စိုးရိမ်ကြောင်း အခြားမြို့ခံ တစ်ဦးက ဆိုသည်။

လက်ရှိ မိုးကုတ်-မန္တလေး လမ်းပိုင်း၊ နွယ်ရုံရွာအနီးရှိ သရက်ချောင်း တံတားကျိုးနေသော်လည်း ကားငယ်များ သွားလာ၍ ရသေးကြောင်း မိုးကုတ်မှ မန္တလေးသို့ ယနေ့ သွားရောက်နေသူ တစ်ဦးက ပြောသည်။

“တံတားက အလယ်က တစ်ပေလောက် ပေါက်သွားတာ။ ကားလေးသွားလို့ရတယ်။ ကားကြီးတော့ မရလောက်ဘူး။ မတ္တရာလမ်းက သွားလို့ရတယ်။ ရေနံ့သာ တိုးဂိတ်ပိတ်ထားတယ်တော့ ကြားတယ်” ဟု ၎င်းကရှင်းပြသည်။

ယနေ့ နံနက်ပိုင်းမှ စတင်ကာ မိုးကုတ် ကားလမ်းမကြီးပေါ်တွင် စစ်ကားများ၊ လူနာတင်ကားများ အပြင်းမောင်းနှင်နေသည်ကို တွေ့ရကြောင်း မတ္တရာ ဒေသခံ တစ်ဦးက ၎င်း၏ လူမှုကွန်ရက်တွင် ရေးသားထားသည်။

သျှမ်းသံတော်ဆင့်၏ မေးမြန်းမှုများအရ လက်ရှိ အချိန်အထိ မိုးကုတ်-မန္တလေး ကားလမ်းမ အသုံးပြု သွားလာနေသော်လည်း အချိန်မရွေး လမ်းပိတ်သွားနိုင်သည့် အခြေအနေဖြစ်ကြောင်း လမ်းအသုံးပြုနေသူများက ဆိုသည်။

တိုက်ပွဲကာလအတွင်း ခရီးသွားပြည်သူများ ည ၇ နာရီမှ မနက် ၆ နာရီအတွင်း မန္တလေး – မိုးကုတ်နှင့် မန္တလေး – မြစ်ကြီးနား ကားလမ်းပေါ် ခရီးသွားလာမှု မပြုရန် သတ်မှတ်ချိန်အတွင်း သွားလာပါက ကားမှန်ချပြီး မောင်းနှင်ကြရန် ပြင်ဦးလွင်ခရိုင် ပြည်သူ့ကာကွယ်ရေးတပ်ဖွဲ့က ဇွန်လ ၂၄ ရက် ရက်စွဲဖြင့် ထုတ်ပြန်ထားသည်။

ယနေ့ ဇွန်လ ၂၅ ရက်တွင် ကျောက်မဲ၊ နောင်ချိုနှင့် မိုးကုတ်မြို့နယ်များတွင် တိုက်ပွဲများ ဖြစ်ပွားနေပြီး လက်နက်ကြီးကြောင့် အရပ်သား ထိခိုက်သေဆုံးမှုများ ရှိနေကြောင်း သိရသည်။