သျှမ်းပြည်မြောက်ပိုင်း၊ ကျောက်မဲမြို့နယ်တွင် စစ်ကောင်စီတပ်နှင့် တအာင်း အမျိုးသားလွတ်မြောက်ရေး တပ်မတော် TNLA တို့ ယနေ့ (ဇွန် ၂၅ ရက်) နံနက်ပိုင်းက စပြီး တိုက်ပွဲ ပြင်းထန်နေရာ လက်နက်ကြီးထိမှန်၍ အမျိုးသမီး တစ်ဦး အပါအဝင်၂ ဦး သေဆုံးပြီး ၄ ဦးဒဏ်ရာရခဲ့ကြောင်း စုံစမ်းသိရသည်။
တိုက်ပွဲ စတင်ပြီးနောက် ကျောက်မဲမြို့၊ ရပ်ကွက်(၈)၊ ထုံးဖိုရှိ အခွန်လွတ်ဈေးအနီး လက်နက်ကြီး ကျရောက်၍ အမျိုးသား တစ်ဦး သေဆုံးကာ တစ်ဦး ထိခိုက် ဒဏ်ရာရရှိခဲ့ပြီး ရပ်ကွက်နေ ပြည်သူများ ကျောက်မဲလေးနှင့် နားပြိန်းကျေးရွာဘက်သို့ ထွက်ပြေးတိမ်းရှောင် နေရကြောင်း သိရသည်။
အလားတူ ကျောက်မဲမြို့၊ ရပ်ကွက်(၉)၊ တိလင်ရပ်တွင် အမျိုးသမီး တစ်ဦး ဦးခေါင်း ကျည်ထိမှန် သေဆုံးပြီး ပြည်ထောင်စုလမ်းမကြီးပေါ်ရှိ ပန်ပေါင်းကျေးရွာသို့ လက်နက်ကြီး ကျရောက် ပေါက်ကွဲရာ အသက် (၁၄) နှစ်အရွယ် အမျိုးသမီးတစ်ဦး ကျည်စထိမှန် ဒဏ်ရာရရှိခဲ့ကြောင်း ကျောက်မဲ ဒေသခံများက ပြောသည်။
“လက်ရှိ ကနဦး သိရသလောက်ဆိုရင် သေတာ ၂ ယောက်ရှိပြီ၊ ဒဏ်ရာရတာ ၄ ယောက်။ ရပ်ကွက်(၈) အခွန်လွတ်ဈေးမှာ တစ်ယောက်၊ တိလင်ဘက်မှာ တစ်ယောက်။ ၂ ယောက်ဆုံးတာ။ လက်ရှိအချိန်ထိတော့ ရှုပ်ထွေးနေဆဲပဲ။ လက်နက်ကြီးကျပြီး မြို့ထဲတိုက်ပွဲဖြစ်ပြီလို့ ပြောလို့ရတယ်၊ ဘယ်သူမှ အပြင်မထွက်ရဲတော့ဘူး”ဟု ကျောက်မဲမြို့ခံ အမျိုးသားက သျှမ်းသံတော်ဆင့်ကို ရှင်းပြသည်။
ယနေ့ နံနက် ၆ နာရီခန့်မှ စတင်ပြီး ကျောက်မဲမြို့ အခြေစိုက် စစ်ကောင်စီတပ် ခလရ (၅၀၁) (၅၀၂) နှင့် TNLA တို့ ပစ်ခတ်မှု ဖြစ်ပွားပြီး တပြိုင်နက်ပင် ကျောက်မဲမြို့ အနီးရှိ ငြိမ်းချမ်းရေးကုန်း၊ နားအိုက်ခန့်၊ စခန်းသာနှင့် လုံဝယ်ကျေးရွာအနီးတို့တွင် တိုက်ပွဲ ဖြစ်ပွားနေရာ လက်ရှိ သီပေါ၊ ကျောက်မဲ၊ နောင်ချို တဝိုက် စစ်လေယာဉ် ပျံဝဲနေကြောင်း ကျောက်မဲ ဒေသခံများက ပြောသည်။
“၂ ဖက်စလုံးကတော့ ချိန်နေတာပေါ့၊ အရမ်းနီးနီးကပ်ကပ် ပစ်ကြတာမျိုးတော့ မဖြစ်သေးဘူး။ လက်နက်ကြီး ပစ်တာတော့ ရပ်ကွက်တွေထဲ ကျပြီး အရပ်သား ထိခိုက် သေဆုံးတာရှိတယ်။ မနက် ၆ နာရီလောက်မှာ TNLA နဲ့ စစ်တပ်နဲ့ စပြီးပစ်ကြတာ။ ၅၀၁/၅၀၂ တပ်နဲ့နီးတဲ့နားလေးတော့ ထွက်ပြေးကြရပြီ”ဟု ကျောက်မဲဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ယနေ့ နံနက် ၇ နာရီခန်က နောင်ချိုမြို့နယ်တွင်လည်း စစ်ကောင်စီတပ်နှင့် TNLA ၊ PDF ပူးပေါင်းတပ်ဖွဲ့တို့ တိုက်ပွဲ ဖြစ်ပွားနေရာ စစ်ကောင်စီတပ် စခန်းချထားသည့် ပြည်ထောင်စုလမ်းမပေါ်ရှိ အုမ္မတီး၊ အုမ္မခါး၊ ရေမောင်းတန်းနှင့် ကျောက်ကြမ်းကျေးရွာတို့တွင် တိုက်ပွဲပြင်းထန်နေကြောင်း နောင်ချိုဒေသခံများက ပြောသည်။
ယမန်နေ့ (ဇွန်လ ၂၄ ရက်) ညသန်းခေါင်ကလည်း ကျောက်မဲမြို့နယ်၊ ပိန်းအင်ကျေးရွာကို စစ်ကောင်စီ လေကြောင်းက ဗုံးကြဲ တိုက်ခိုက်ရာ ဒေသခံ တစ်ဦး သေဆုံးပြီး တစ်ဦး ဒဏ်ရာရရှိခဲ့ကြောင်း ဒေသခံများက ဆိုသည်။
စစ်ကောင်စီတပ်က ဟိုင်ဂင်သဘောတူညီချက် ချိုးဖေါက်၍ သျှမ်းပြည်မြောက်ပိုင်း၊ နောင်ချိုနှင့် မိုးမိတ်တို့တွင် လက်နက်ကြီး ပစ်ခတ်ပြီး လေကြောင်းက ဗုံးကြဲ တိုက်ခိုက်မှုများ ဆက်တိုက် ပြုလုပ်နေခြင်းကြောင့် အချိန်မရွေး တိုက်ပွဲ ပြန်လည် ဖြစ်ပွားလာနိုင်ကြောင်း TNLA အထွေထွေ အတွင်းရေးမှူး ဗိုလ်ချုပ် တာဘုန်းကျော်က ယမန်နေ့ (ဇွန်လ ၂၄ ရက်) တွင် ပြောဆိုပြီးနောက် ယနေ့ တိုက်ပွဲများ ပြန်လည် ဖြစ်ပွားလာခြင်း ဖြစ်သည်။
Leave a Comments