ကချင်ပြည်နယ် မြစ်ကြီးနားမြို့ အနီးတစ်ဝိုက်တွင် တိုက်ပွဲများကြောင့် စက်သုံးဆီဈေးများ မြှင့်တက်ကာ အကန့်အသတ်ဖြင့် ရောင်းချနေရကြောင်း သတင်းရရှိသည်။

မြစ်ကြီးနားမြို့ အနီးတစ်ဝိုက်တွင် စစ်ကောင်စီနှင့် ကချင်လွတ်လပ်‌‌ရေးတပ် KIA တို့ တိုက်ပွဲများကြောင့် လမ်းကြောများပိတ်ကာ စက်သုံးဆီဈေးများ မြှင့်တက်ခြင်းကြောင့် အကန့်အသတ်ဖြင့်သာ ရောင်းချပေးနေရ ပြီး အချို့စက်သုံးဆီဆိုင်ကြီးများလည်း ပိတ်ထားရကြောင်း မြစ်ကြီးနားမြို့ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“တချို့ဆိုင်တွေကတော့ ပိတ်ထားကုန်ပြီ ဆီတွေပြတ်နေတာ၊ တချို့ဆိုင်တွေကလည်း မနက် ဖွင့်တယ်။ ကားတွေဆို ၃ သောင်းကနေ ၅ သောင်း၊ ဆိုင်ကယ်တွေဆို ၅ ထောင် ၁ သောင်း အကန့်အသတ်နဲ့ ရောင်းပေးတယ်။ လမ်းကြောင်းတွေ ပိတ်တာကြောင့်မလို့။ ဆီတွေ ဒီလိုပျက်နေတာက ကားလမ်းတွေ၊ နိုင်ငံရေးနဲ့ တိုက်ပွဲတွေ ကြောင့်ပေါ့”ဟု မြစ်ကြီးနားမြို့ ဒေသခံအမျိုးသားတစ်ဦးက ပြောသည်။

မြစ်ကြီးနားမြို့တွင် စက်သုံးဆီဈေး ဓာတ်ဆီ 92 တစ်လီတာလျှင် ကျပ်ငွေ ငါးထောင့်ငါးရာ (၅,၅၀၀) မှ ကျပ်ငွေ ငါးထောင့်ခြောက်ရာ (၅,၆၀၀) ၊ 95 တစ်လီတာလျှင် ကျပ်ငွေ ငါးထောင့်ခြောက်ရာ (၅,၆၀၀) မှ ငါးထောင့်ရှစ်ရာ (၅,၈၀၀) အထိရှိပြီး၊ ဒီဇယ်ဆီ တစ်လီတာကို ကျပ်ငွေ လေးထောင်ငါးရာ (၄,၅၀၀) အထိ ရှိနေကြောင်း ၎င်းအမျိုးသားက ဆက်ပြောသည်။

ပြီးခဲ့သည့် ဇွန်လ ဒုတိယပတ်တွင် ကချင်ပြည်နယ် ဝိုင်းမော်မြို့တွင် စစ်ကောင်စီနှင့် ကချင်လွတ်လပ်ရေးတပ် KIA၊ PDF ပူးပေါင်းတပ်တို့ တိုက်ပွဲပြင်းထန်လျက်ရှိကြောင်း သိရသည်။

ပြီးခဲ့သည့် ဇွန်လ ၁၀ ရက်တွင်လည်း စစ်ကောင်စီ၏ လက်နက်ကြီးပစ်ခတ်မှုကြောင့် ဝိုင်းမော်မြို့နယ်တွင် အသက် ၂၇ နှစ်အရွယ် အရပ်သား ၁ ဦး သေဆုံးခဲ့ပြီး ၅ ဦးခန့် ထိခိုက်ဒဏ်ရာ ရရှိခဲ့သည်။