သျှမ်းပြည် သိန္နီမြို့နယ်တွင် နှစ်လအတွင်း မြေမြှုပ်မိုင်းပေါက်ကွဲမှုကြောင့် ၂ ဦးသေဆုံးပြီး ၅ ဦး ထိခိုက်ဒဏ်ရာရရှိခဲ့ကြောင်း စုံစမ်းသိရသည်။
မေလ ၁၄ ရက် နံနက် ၁၀ နာရီကျော်တွင် သိန္နီမြို့နယ် ကောင်းဟော်ကျေးရွာအုပ်စုရှိ ဟိုတာ့ကျေးရွာမှ အသက် ၃၁ နှစ်အရွယ်ရှိ စိုင်းဆိုင်လျန်း သည် တောင်ယာရှင်းလင်းနေစဉ် သစ်ကိုင်းဖြင့် မြေမြှုပ်မိုင်းကို ထိခိုက်မိရာမှ ပေါက်ကွဲမှုဖြစ်ပွားပြီး ထိခိုက်ဒဏ်ရာ ရရှိခဲ့ကြောင်း သိန္နီဒေသခံများက ပြောသည်။
“ခြံသွားရှင်းရင်းနဲ့ သစ်ကိုင်းက မြေမြှုပ်မိုင်းကို သွားထိမိတာ။ ခြံစပ်နားမှာ မီးရှို့နေတော့ သစ်ကိုင်းနဲ့ မီးတားရင်း အဲ့မြေမြှုပ်မိုင်းကို ခိုင်းမိပြီး ပေါက်ကွဲတာ သူ့အစ မှန်တာပေါ့။ ဆေးခန်းပြကြည့်တော့ ခြေကျင်းဝတ်မှာ ထိတယ်လို့ပဲ သိတာ၊ အဲ့တာနဲ့ ဓာတ်မှန်ရိုက်ကြည့်တော့ အရိုးထိတယ် ပြောလို့ ကွမ်းလုံဆေးရုံကို ပို့လိုက်ရတာ”ဟု သိန္နီမြို့မှ ဖြစ်စဉ်သိရှိသူ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
လက်ရှိတွင် ထိခိုက်ဒဏ်ရာရရှိခဲ့သည့် စိုင်းဆိုင်လျန်းကို ကွမ်းလုံဆေးရုံသို့ ဆေးကုသရန် ပို့ဆောင်ထားပြီး မိသားစု စားဝတ်နေရေးနှင့် ဆေးဝါးကုသမှုစရိတ် အခက်အခဲများ ကြုံတွေ့နေရကြောင်း သိန္နီမြို့မှ ၎င်းအမျိုးသမီးက ဆက်ပြောသည်။
အလားတူ ဧပြီနှင့် မေ (၂)လအတွင်း သိန္နီမြို့နယ် ကောင်းဟော်ကျေးရွာအုပ်စုတွင် မြေမြှုပ်မိုင်းနင်းမိသူ စုစုပေါင်း (၇) ဦးအထိ ရှိလာပြီး ၎င်းတို့အထဲမှ (၂)ဦး သေဆုံးကာ (၅) ဦး ထိခိုက်ဒဏ်ရာပြင်းထန်ခဲ့ကြောင်း သိန္နီဒေသခံများထံမှ သိရသည်။
“ခြံသွားရင်လည်း မလုံခြုံတော့ဘူး၊ လမ်းဘေးတွေမှာလည်း မိုင်းတွေထောင်ထားတာ ရှိတယ်။ စာသင်ကျောင်းတွေနားမှာတောင်မှ မိုင်းထောင်ထားတာ ရှိတယ်။ မိုင်းနင်းမိရင် အများစုက ခြေထောက်ပြတ်ရင်ပြတ်၊ မဟုတ်ရင်လည်း ဒုက္ခိတဘဝ ရောက်ရတော့ ရွာသားတွေကတော့ စိုးရိမ်ကြတာပေါ့”ဟု သိန္နီမြို့ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ပြီးခဲ့သည့် မေလ ၆ ရက်နေ့ကလည်း သိန္နီမြို့နယ် ကောင်းဟော်ကျေးရွာအုပ်စု ဟိုတာ့ရွာရှိ ဆောက်လုပ်လက်စ ခရစ်ယာန်ဘုရားကျောင်းတစ်ခုတွင် သန့်ရှင်းရေး ဝင်လုပ်သည့် အမျိုးသားနှစ်ဦး မြေမြှုပ်မိုင်းနင်းမိပြီး တစ်ဦးသေဆုံးသွားကြောင်း သိန္နီဒေသခံများ ထံမှ သိရသည်။
“ကိုးကန့်စစ်သားတွေလည်း မြေမြှုပ်မိုင်းတွေ လာမယူပေးဘူး။ သူတို့ကို သွားပြောရင်လည်း ဒီဟာက သူတို့မိုင်းမဟုတ်ဘူး၊ စစ်ကောင်စီက ကျန်ခဲ့တဲ့မိုင်းတွေလို့ ပြောတာ။ နောက်ပြီးတော့ မိုင်းရှင်းဖို့လည်း လူရှာနေတုန်းပဲ မရောက်လာသေးဘူးလို့ပဲ အကြောင်းပြချက် ပေးတာ”ဟု သိန္နီမြို့မှ ၎င်းဒေသခံ အမျိုးသားက သျှမ်းသံတော်ဆင့်ကို ဆက်ပြောသည်။
သိန္နီမြို့တွင် “၁၀၂၇ စစ်ဆင်ရေး” အပစ်ရပ်ပြီးနောက် (၅) လနီးပါးအတွင်း ဒေသခံအချို့မှာ နေရပ် ပြန်လာနိုင်ကြသော်လည်း မည်သည့်လက်နက်ကိုင် အဖွဲ့အစည်းများမှ နယ်မြေရှင်းလင်းရေး မလုပ်နိုင်သကဲ့သို့ ပြည်သူများအား မြေမြှုပ်မိုင်းအကြောင်းနှင့် ပတ်သက်၍ အသိပညာပေးခြင်း မရှိသေးကြောင်း ဒေသခံများက ပြောဆိုသည်။
Leave a Comments