မိုးကုတ် စစ်ကောင်စီတပ်က လက်နက်ကြီးပစ်ခတ်ပြီး အပစ်ရပ်စာချုပ်ချိုးဖောက်မှု တုံ့ပြန်သွားမည်ဟု TNLA ပြော

သျှမ်း-မန္တလေး နယ်စပ် မိုးကုတ်မြို့နယ်ရှိ တအာင်း(ပလောင်) အမျိုးသားလွတ်မြောက်ရေး တပ်မတော် TNLA ၏ တပ်စခန်းကို စစ်ကောင်စီက လက်နက်ကြီးပစ်ခတ်ခဲ့ရာ ပြန်လည်တုံ့ပြန်သွားမည်ဖြစ်ကြောင်း စုံစမ်းသိရသည်။

မေလ (၄) ရက် ည ၈ နာရီဝန်းကျင်တွင် မိုးကုတ်မြို့နယ်ရှိ စစ်ကောင်စီလက်အောက်ခံ ခလရ-၁၄၈ နှင့် ခလရ-၇၁ တို့က ဖြူရောင်ကျေးရွာမှနေ၍ ညောင်ကုန်းကျေးရွာရှိ TNLA တပ်စခန်းကို လက်နက်ကြီး (၄) လုံးအပြင် လက်နက်ငယ်များဖြင့်ပါ ပစ်ခတ်ခဲ့ရာ ၎င်းနှစ်ရွာအကြားသို့ ကျရောက်ပေါက်ကွဲခဲ့ကြောင်း TNLA သတင်းနှင့် ပြန်ကြားရေးဌာနက မေလ ၈ ရက်တွင် သတင်းထုတ်ပြန်လာသည်။

ယခုကဲ့သို့ TNLA တပ်စခန်းကို စစ်ကောင်စီက လက်နက်ကြီးပစ်ခတ်မှုနှင့် ပတ်သက်ပြီး “လက်ရှိကျမတို့ စာရင်းဇယားပြုစုပြီး စကစရဲ့ လှုပ်ရှားမှုကို စောင့်ကြည့်နေပါတယ်၊ လိုအပ်တဲ့ တုံ့ပြန်မှုလည်း ပြင်ဆင်ထားပါတယ်”ဟု TNLA သတင်းနှင့် ပြန်ကြားရေးဌာနမှူးက သျှမ်းသံတော်ဆင့်ကို ဖြေကြားသည်။

၅ လနီးပါးအကြာ အပစ်ရပ်ကာလအတွင်း စစ်ကောင်စီတပ်က ညီနောင်မဟာမိတ် တပ်စခန်းရှိသည့် နေရာများသို့ လက်နက်ကြီးဖြင့် ပစ်ခတ်ခြင်း၊ လေကြောင်းအသုံးပြုကာ လာရောက်ဗုံးကြဲခြင်းများ ပြုလုပ်ခဲ့ကြောင်းလည်း ထုတ်ပြန်ချက်ထဲတွင် ဆိုထားသည်။

စစ်ကောင်စီတပ်က TNLA တပ်စခန်းများကို လက်နက်ကြီး၊ လက်နက်ငယ်များဖြင့် ပစ်ခတ်တိုက်ခိုက်လာခြင်းသည် စစ်ကောင်စီ ပြည်ထဲရေးဝန်ကြီး ဒုတိယဗိုလ်ချုပ်ကြီး ရာပြည့်၏ ဧပြီလ နောက်ဆုံးပတ်က တရုတ်နိုင်ငံသို့ သွားရောက်ခဲ့သည့် ခရီးစဉ်အပြင် မေလအတွင်း စစ်ကောင်စီနှင့် ညီနောင်မဟာမိတ်တို့ (၅) ကြိမ်မြောက် ထပ်မံတွေ့ဆုံကြမည့် အချိန်နှင့်လည်း တိုက်ဆိုင်နေကြောင်း နိုင်ငံရေး၊ စစ်ရေး လေ့လာသုံးသပ်သူများက ပြောသည်။

ညီနောင်မဟာမိတ်နှင့် စစ်ကောင်စီတို့သည် တရုတ်နိုင်ငံ၏ ကြားဝင်စေ့စပ်ပေးမှုဖြင့် ဇန်နဝါရီလ ၁၀/၁၁ ရက်တို့တွင် ကူမင်းမြို့၌ တတိယအကြိမ် တွေ့ဆုံဆွေးနွေးခဲ့ပြီး သျှမ်းမြောက်တွင် ယာယီအပစ်အခတ် ရပ်စဲရန် “ဟိုင်ဂင် သဘောတူညီမှု”ကို ရရှိခဲ့သည်ဟု ဆိုသော်လည်း မြေပြင်တွင် တိုက်ပွဲများ ရပ်တန့်ခြင်း မရှိကြောင်း ဒေသခံများက ပြောသည်။

အဆိုပါ “ဟိုင်ဂင် သဘောတူညီမှု”တွင် နှစ်ဖက်တပ်ဖွဲ့ဝင် အချင်းချင်းကြား ပစ်ခတ်တိုက်ခိုက်မှုနှင့် ထိတွေ့မှုမရှိစေရေး၊ အငြင်းပွားဖွယ်ရာများနှင့် ပစ်ခတ်မှုများ ဖြစ်ပေါ်လာပါက တွေ့ဆုံဆွေးနွေးမှု လမ်းစဉ်ဖြင့် ဖြေရှင်းရေး စသည့် အချက်များအပေါ် သဘောတူညီမှု ရရှိခဲ့သည်ဟု ညီနောင်မဟာမိတ် ၃ ဖွဲ့က ဇန်နဝါရီ ၁၂ ရက်တွင် ထုတ်ပြန်ထားသည်။

ထို့အပြင် ညီနောင်မဟာမိတ်(၃)ဖွဲ့မှ သျှမ်းမြောက်ရှိ စစ်ကောင်စီ၏ စခန်းများ၊ ဗျူဟာကုန်းများအား ထိုးစစ်ဆင် တိုက်ခိုက်မှုများကို စတင်မပြုလုပ်ရန် သဘောတူခဲ့ပြီး စစ်ကောင်စီဘက်မှလည်း သျှမ်းမြောက်ရှိ ညီနောင်မဟာမိတ်တို့ သိမ်းပိုက်ထိန်းချုပ်ထားသည့် နေရာများအားလုံးကို လေကြောင်း၊ လက်နက်ကြီး ပစ်ခတ်တိုက်ခိုက်မှု မပြုလုပ်ရန် သဘောတူခဲ့သည်။

ပြီးခဲ့သည့် ဧပြီလ ၂၇ ရက်နှင့် ၂၈ ရက်ကလည်း စစ်ကောင်စီတပ်က လက်နက်ကြီးဖြင့် ပစ်ခတ်ခဲ့ခြင်းကြောင့် နောင်ချိုမြို့နယ် သုံးဆယ်ကျေးရွာမှ အသက်(၆၀) အရွယ် အမျိုးသမီးတစ်ဦး ထိခိုက်ဒဏ်ရာရရှိကာ နေအိမ် ၂ လုံး ပျက်စီးခဲ့ကြောင်း TNLA တပ်ဖွဲ့က ပြောဆိုထားသည်။