သျှမ်းပြည် သိန္နီမြို့နယ်တွင် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် SSPP/SSA နှင့် ကိုးကန့်တပ်ဖွဲ့ MNDAA တိုက်ပွဲအတွင်း နှစ်ဘက်တပ်သား အချင်းချင်း ဖမ်းဆီးမှု ရှိနေကြောင်း စုံစမ်းသိရသည်။

မတ်လ ၂၆ နှင့် ၂၇ ရက်တို့တွင် သိန္နီမြို့နယ်အတွင်း ဖြစ်ပွားခဲ့သည့် သျှမ်းတပ် SSPP/SSA နှင့် ကိုးကန့်တပ်ဖွဲ့ MNDAA တို့၏ ထိတွေ့တိုက်ပွဲအတွင်း စယ်အူကျေးရွာအုပ်စုတွင် နှစ်ဘက်တပ်သား အချင်းချင်း အပြန်အလှန် ဖမ်းဆီးမှုများ ရှိနေကြောင်း သိန္နီဒေသခံများက ပြောသည်။

“အဲ့နေ့ က ည ၁၀ နာရီကျော်မှာ ကိုးကန့်စစ်သား ဆယ်ချီနဲ့ လာပြီးတော့ လုံးဆန်ခမ်း ပါ့မတ်ရဲ့ အိမ်တံခါးကို ကန်ကျောက်ပြီး ဝင်ဖမ်းကြတာ။ ပန်ဝတ်ရွာထဲက လုံးဆန်ခမ်းကို ဖမ်းသွားတဲ့အပြင် အိမ်ထဲရှိတဲ့ ငွေတွေနဲ့ ကားတွေလည်း ယူသွားတယ်။ အခုသူ့ကို ဘယ်မှာသွားထားလဲ၊ အခြေအနေ ဘယ်လိုရှိလဲဆိုတာ ဘယ်သူမှ မသိသေးဘူး”ဟု သိန္နီမြို့နယ်မှ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ကိုးကန့်တပ်ဖွဲ့ MNDAA က ဖမ်းဆီးသွားသည့် စယ်အူကျေးရွာအုပ်စု၊ ပန်ဝတ်ကျေးရွာမှ လုံးဆန်ခမ်းသည် သျှမ်းတပ် SSPP/SSA ၏ အရံအင်အားဖြစ်ကြောင်း သိန္နီဒေသခံများက ပြောဆိုသည်။

အလားတူ သိန္နီမြို့နယ်တွင် သျှမ်းတပ် SSPP/SSA နှင့် ကိုးကန့်တပ်ဖွဲ့ MNDAA တို့ တိုက်ပွဲစတင်ဖြစ်ပွားသည့် မတ်လ ၂၆ ရက် ညနေ ၃ နာရီကျော် နောက်ပိုင်းတွင် စယ်အူကျေးရွာအတွင်း သွားလာနေသည့် ကိုးကန့်တပ်သား ၂ ဦးကို SSPP တပ်သားများက ဖမ်းဆီးခဲ့ကြောင်း ဒေသခံများက ပြောသည်။

“ကိုးကန့်တပ်က သိမ်းထားတဲ့ နမ့်စလပ် ၅၆၇/ ၅၆၈ တပ်ထဲကနေ SSPP ရှိတဲ့ ကောင်းကော်ရွာထဲကို ဒရုန်းနဲ့ ပစ်တာ။ အဲ့တာနဲ့ စယ်အူမှာရှိတဲ့ SSPP တပ်သားတွေက လမ်းလျှောက်သွားနေတဲ့ ကိုးကန့်တပ်သား ၂ ယောက်ကို ဖမ်းပြီး သူတို့သေနတ်ကို သိမ်းလိုက်တယ်။ ဒီဟာတွေက ကိုးကန့်တပ်က ကောင်းကော်ရွာထဲကို ဒရုန်းနဲ့ အရင်ပစ်ချလို့ ဖြစ်လာတာ”ဟု သိန္နီမြို့မှ ၎င်းဒေသခံ အမျိုးသားက သျှမ်းသံတော်ဆင့်ကို ပြောသည်။

သိန္နီမြို့နယ်တွင် ဖြစ်ပွားခဲ့သည့် တိုက်ပွဲအတွင်း နှစ်ဘက်တပ်ဖွဲ့ဝင် အချင်းချင်းကြား အပြန်အလှန် ဖမ်းဆီးမှုနှင့် ပတ်သက်ပြီး သျှမ်းသံတော်ဆင့်မှ သျှမ်းတပ် SSPP/SSA ၏ ပြောရေးဆိုခွင့်ရှိသူ ဗိုလ်မှူးစိုင်းဖုန်းဟန်ထံသို့ ဖုန်းဆက်သွယ်မေးမြန်းရန် ကြိုးစားခဲ့သော်လည်း ဖုန်းစက်ပိတ်ထားသည်။

အလားတူ ကိုးကန့်တပ်ဖွဲ့ MNDAA ၏ ပြောရေးဆိုခွင့်ရှိသူ လီကျားဝင်းထံသို့ သျှမ်းသံတော်ဆင့်မှ စာပို့ဆက်သွယ် မေးမြန်းထားသော်လည်း ပြန်လည်ဖြေကြားခြင်း မရှိသေးပေ။
သိန္နီမြို့နယ်တွင် ဖြစ်ပွားခဲ့သည့် တိုက်ပွဲသည် သျှမ်းတပ် SSPP/SSA တပ်စခန်းကို ကိုးကန့်တပ်ဖွဲ့ MNDAA က ထိုးစစ်ဆင် တိုက်ခိုက်ခဲ့ခြင်းကြောင့် နှစ်ဖက်ထိတွေ့တိုက်ပွဲ ဖြစ်ပွားခဲ့ရပြီး SSPP/SSA မှ ခုခံကာကွယ်သည့် အနေအထားဖြင့်သာ ခုခံတိုက်ခိုက်ခဲ့ကြောင်း ယမန်နေ့ (မတ်လ ၂၇ ရက်)တွင် SSPP Info မှ သတင်းထုတ်ပြန်လာခဲ့သည်။

ထို့အပြင် တိုင်းရင်းသားအချင်းချင်း ပြန်လည်သင့်မြတ်ရေးအတွက် ရှေးရှုကာ တွေ့ဆုံဆွေးနွေးခြင်း လမ်းစဉ်ဖြင့် အတတ်နိုင်ဆုံး ဖြေရှင်းဆောင်ရွက်သွားမည်ဖြစ်ပြီး လုံးဝ ဖြေရှင်း၍ မရခဲ့မှသာ ထိထိရောက်ရောက် ပြန်လည်တုံ့ပြန်သွားမည်ဖြစ်ကြောင်း ထုတ်ပြန်ချက်တွင် ဆိုထားသည်။