သျှမ်းတောင် ဆီဆိုင်မြို့နယ်နှင့် ဟိုပုံးမြို့နယ်တွင် ဖြစ်ပွားနေသည့် တိုက်ပွဲအတွင်း စစ်ကောင်စီနှင့်အတူ ပူးပေါင်းပါဝင်တိုက်ခိုက်နေသည့် ပအိုဝ်းပြည်သူ့စစ် PNO/PNA အဖွဲ့က ပုံးအင်းဒေသရှိ ဒေသခံများထံ  ဆက်ကြေး တိုးကောက်လာနေကြောင်း စုံစမ်းသိရသည်။ 

ဆီဆိုင်မြို့နယ် ဆိုင်လဲကျေးရွာအုပ်စုအတွင်း နေထိုင်သည့် (ရွာပေါင်း ၃၅ ရွာ) ဒေသခံများအနေဖြင့် မဖြစ်မနေ ပအိုဝ်းပြည်သူ့စစ် PNO အဖွဲ့ထံသို့ အခွန်ဆောင်ရန် မတ်လ ၉ ရက်နေ့၌ ဆိုင်လဲကျေးရွာအုပ်စုရေးမှူး ဦးလုံးဇွဲနေအိမ်တွင် အစည်းအဝေးခေါ်ပြီး ပြောဆိုခဲ့ခြင်း ဖြစ်သည်။ 

အိမ်စီးကားရှိပါက ၁ စီးကို ၁ သိန်း၊ သဲ/ကျောက် တင်ကား ၁ စီးကို ၄ သိန်း၊ လယ်ထွန်စက် ၁ စီးကို ၆ သိန်း၊ စပါးရိုက်စက် ၁ စီးကို ၇ သိန်းနှင့်ဆန်စက်ရုံ ၁ ရုံကို ၁၀ သိန်းအထိ အခွန်ဆောင်ခိုင်းခဲ့ကြောင်း ပုံးအင်းဒေသခံတစ်ဦးက သျှမ်းသံတော်ဆင့်ကိုပြောသည်။

“ရွာသူကြီးတွေ၊ ကားရှိသူတွေကို ခေါ်ပြီးတော့ ကားအခွန်ကောက်မယ်၊ အခွန်အမျိုးမျိုးကောက်မယ်ဆိုပြီး ပြောတယ်။ လာမယ့် မတ်လ ၅ ရက်နေ့ကျရင် စာရင်းတွေ ပေးထားရမယ်။ မပေးရင် ဒဏ်ငွေရိုက်မယ်၊ ၁ သိန်းကနေ ၂ သိန်းအထိ တိုးကောက်သွားမယ်ဆိုပြီး ခြိမ်းခြောက်အခွန်ဆောင်ခိုင်းတာ” ဟု ၎င်းကပြောသည်။ 

လက်ရှိတွင် နိုင်ငံရေးခေတ်ကာလမကောင်းသည့်အပြင် စီးပွားရေးလည်း ကျဆင်းနေသည့်အတွက် ဒေသခံများအနေဖြင့် အခွန်ဆောင်ရန် ငွေရေးကြေးရေးမှာ အခက်ခဲရှိနေကြောင်း၊ တချို့မှာ စားဝတ်နေရေးအတွက် အနိုင်နိုင်ကြိုးစားရုံးကန်ရှာဖွေနေရကြောင်း ဒေသခံများကဆိုသည်။ 

ယင်းကဲ့သို့ အခက်ခဲများစွာဖြင့် ဒေသခံများကြုံတွေ့နေရသော်လည်း ပအိုဝ်းပြည်သူ့စစ် PNO ဘက်က အကြောင်းပြချက်မျိုးစုံဖြင့် ပိုက်ဆံတောင်းခံနေလျှက်ရှိသည်ဟု သိရသည်။ 

“ပြီးခဲ့တဲ့ တစ်ပတ်တုန်းကလည်း ရပ်ရွာနဲ့ပြည်သူလုံခြုံရေးအတွက်ဆိုပြီးတော့ လာတောင်းသေးတယ်။ အဲ့တုန်းကလည်း တစ်အိမ်ကို ၅ သောင်းထည့်ရတယ်။ ပြီးရင် ကက္ကူဘုရားပွဲ (တပေါင်းပွဲ) အတွက်ဆိုပြီး တော့လည်း တစ်အိမ်ကို ၄ ထောင်ထည့်ရသေးတယ်။ မတ်လဆန်းပိုင်းတုန်းကလည်း စစ်ဘေးရှောင်တွေ အတွက်ဆိုပြီး တောင်းခဲ့သေးတယ်။ ဒီလထဲမှာ ၄ ခေါက်လောက်တောင် တောင်းနေပြီ၊ အခုလည်း ထပ်တောင်းတော့ ပေးဖို့ကအဆင်မပြေတော့ဘူး” ဟု အသက် ၄၀ ကျော် အမျိုးသားတစ်ဦးက ထပ်လောင်းပြောသည်။

စစ်တပ်အာဏာသိမ်းချိန်မှစပြီး ပအိုဝ်းပြည်သူ့စစ် PNO/PNA အဖွဲ့သည် ၎င်းတို့ထိန်းချုပ်ရာဒေသအတွင်း၌ တပ်သားသစ် အဓ္ဓမစုဆောင်းခြင်း၊ အခွန်ဆောင်ခိုင်းခြင်းများ ဆက်တိုက်ပြုလုပ်လာသောကြောင့် တပ်သားသစ် မပြုလိုသည့် လူငယ်များက ထိုင်းနိုင်ငံသို့ ထွက်ပြေးတိမ်းရှောင်သွားကြသည်။ 

ထို့အပြင် ပအိုဝ်းပြည်သူ့စစ် PNO/PNA အဖွဲ့သည် စစ်ကောင်စီနှင့်ပူးပေါင်း၍ ဇန်နဝါရီလ ၂၇ ရက်ကတည်းက ၎င်းတို့ထိန်းချုပ်ရာဒေသဖြစ်သည့် ဆီဆိုင်မြို့နယ်၊ ဟိုပုံးမြို့နယ်နှင့် ပင်လောင်းမြို့နယ်အတွင်း ဒေသခံများကို တပ်သားသစ် အဓ္ဓမစုဆောင်းပြီး တစ်ယောက်ကို သေနတ် ၁ လတ် တပ်ဆင်ပေးနေကြောင်း သိရသည်။

ပုံစာ – ပြီးခဲ့တဲ့ ဖေဖော်ဝါရီလ ၂၄ ရက်က ပအိုဝ်းပြည်သူ့စစ် PNO အဖွဲ့က ပုံးအင်းဒေသရှိ ဒေသခံများထံသို့ သွားရောက်တွေ့ဆုံနေစဉ်