Sunday, May 26, 2024

မူဆယ်ဒေသခံများ လက်နက်ကိုင်တပ်ဖွဲ့ပေါင်းစုံထံ ဆက်ကြေးပေးဆောင်ရ၊ လုံခြုံမှုမရှိ

Must read

သျှမ်းပြည် မူဆယ်မြို့နယ်တွင် တိုင်းရင်းသား လက်နက်ကိုင်တပ်ဖွဲ့ ပေါင်းစုံထံသို့ ဆက်ကြေးငွေ ပေးဆောင်နေရသော်လည်း လုံခြုံမှုမရှိကြောင်း စုံစမ်းသိရသည်။

မူဆယ်မြို့

၂၀၂၄ နှစ်ဆန်းပိုင်းမှ စတင်ပြီး မြန်မာ-တရုတ် နယ်စပ်ကုန်သွယ်ရေးမြို့ဖြစ်သည့် မူဆယ်မြို့တွင် လက်နက်ကိုင် အဖွဲ့အစည်းများထံသို့ ဆက်ကြေးငွေ ပေးဆောင်ရသော်လည်း ၎င်းတို့မှ လုံခြုံရေး တာဝန်ယူမှုမရှိဘဲ အမည်မသိ လူစုများမှ လက်နက်ကိုင်တပ်ဖွဲ့ အယောင်ဆောင်ပြီး ဓားပြတိုက်၊ ပြန်ပေးဆွဲခြင်းများ မကြာခဏ ရှိလာကြောင်း မူဆယ်ဒေသခံများက ပြောသည်။

“မြို့ပေါ်ကိုတော့ အဖွဲ့တိုင်းက တစ်နှစ်စာ အခွန်ဆိုပြီးတော့ လာကောက်ရင် ထည့်လိုက်ရတာဘဲ။ SSPP ၊ KIA ၊ TNLA လာသမျှအဖွဲ့ အကုန်ထည့်ရတယ်။ ဘယ်ရက်နောက်ဆုံးလို့ ပြောရင် မီအောင် သွားထည့်ရတာ၊ တခြားမသိတဲ့ အဖွဲ့တွေ လာရင်ကျတော့ ဘယ်သူမှ လုံခြုံရေး မယူပေးနိုင်ဘူး။ လူကို ပြန်ပေးဆွဲတာ၊ သေနတ်ပြပြီး ဓားပြတိုက်သွားတာ အများကြီးပဲ ဖြစ်လာတယ်”ဟု မူဆယ်မြို့ဒေသခံ ကုန်သည်တစ်ဦးက သျှမ်းသံတော်ဆင့်ကို ပြောသည်။

ပြီးခဲ့သည့် ဖေဖော်ဝါရီလ နောက်ဆုံးပတ်က မူဆယ်မြို့တွင် MSPDF အမည်ဖြင့် လက်နက်ကိုင်တပ်ဖွဲ့ အယောင်ဆောင်ပြီး မြန်မာ-တရုတ် ငွေလဲလုပ်ငန်း လုပ်ကိုင်သူများထံ အွန်လိုင်းမှ စာပို့ခြိမ်းခြောက်ပြီး ငွေညှစ်တောင်းခံလာကြောင်း မူဆယ်ဒေသခံများထံမှ သိရသည်။

မူဆယ်မြို့နယ်တွင် TNLA ၊ KIA နှင့် SSPP/SSA စသည့် လက်နက်ကိုင် တပ်ဖွဲ့များမှလည်း ပြည်သူလူထုထံ အခွန်ကောက်ခံသော်လည်း လုံခြုံရေး အာမခံချက် မရှိကြောင်း ဒေသခံများက ပြောသည်။

TNLA နမ့်ခမ်း

“မူဆယ်မြို့က မဟာမိတ်တပ်တွေ ဝိုင်းပတ်ထားတာတောင်မှ မသမာတဲ့လူတွေက လုပ်စားနေတုန်းပဲ။ စစ်ကောင်စီတပ်လည်း မြို့ပေါ်ကွက်ကွက်လေး ကျန်တာတောင် မထိန်းနိုင်တော့ဘူး။ ကင်းပတ်လှည့်နေလည်း ဘာလုံခြုံရေးမှ မထိရောက်ဘူး၊ သူတို့ကိုယ်တိုင် လက်နက်ကိုင်အယောင်ဆောင်ပြီး ငွေညှစ်နေတယ်လို့ ပြည်သူတွေ ယူဆနေကြတာ”ဟု မူဆယ်မြို့မှ ၎င်းဒေသခံ ကုန်သည်က သျှမ်းသံတော်ဆင့်ကို ဆက်ပြောသည်။

အလားတူ မတ်လ ၂ ရက် ညအချိန်ကလည်း မူဆယ်မြို့ ဟိုမွန်ရပ်ကွက်တွင် အလုပ်မှ ပြန်လာသည့် အရပ်သား(၂)ဦးကို စစ်ကောင်စီတပ်မှ မာရှယ်လော အကြောင်းပြ၍ ပစ်သတ်ခဲ့ပြီး အလောင်းကို ယူသွားခဲ့ကြောင်း မူဆယ်ဒေသခံများက ပြောသည်။

“၂ ရက်နေ့က ဟိုမွန်ရပ်ကွက်ထဲ ၄၅ ကုန်းဘက်မှာ ည ၉ နာရီကျော် ပြန်လာတဲ့လူ ၂ ယောက်ကို စစ်တပ်က ပစ်သတ်လိုက်တာ။ ဆိုင်ကယ်နဲ့ လာတာဆိုတော့ ရပ်ကွက်ထဲကလူတော့ မဟုတ်ဘူး။ သေနတ်ပစ်ခံရတာက ကျား/မ မသိရဘူး၊ စစ်တပ်ကပဲ အလောင်းကောက်သွားတယ် ပြောကြတယ်”ဟု မူဆယ်မြို့မှ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

မူဆယ်မြို့သည် မြန်မာ – တရုတ် နယ်စပ်ကုန်သွယ်ရေးမြို့ ဖြစ်သည့်အပြင် လက်နက်ကိုင် အဖွဲ့အစည်းများ နှင့် တရားမဝင် လုပ်ငန်းများ စုံလင်ပေါများသည့် ဒေသဖြစ်သည့်အတွက် သေနတ်ပစ်ခတ်မှု၊ ဓားပြတိုက်မှုနှင့် ပြန်ပေးဆွဲမှုများလည်း မကြာခဏ ဖြစ်ပွားလေ့ရှိသည်။

ယခင်က ဖြစ်ပွားခဲ့သည့် ဓားပြတိုက်မှုနှင့် ပြန်ပေးဆွဲမှုများတွင် ကျူးလွန်သူများကို ပြည်သူများမှ ပြန်လည်ဖမ်းဆီးမိလျှင် စစ်ကောင်စီလက်အောက်ခံ မန်ပြိန်းပြည်သူ့စစ် စသည်ဖြင့် လက်နက်ကိုင်ဆောင်သူများသာ ဖြစ်ကြောင်း မူဆယ်‌ဒေသခံများက ပြောသည်။

Leave a Comments

- Advertisement -spot_img

Latest article