ဟိုပုံးမြို့နယ်အတွင်း စစ်ရေးတင်းမာနေသည့် ပအိုဝ်းအမျိုးသားလွတ်မြောက်ရေးတပ်မတော် (PNLA) နှင့် စစ်ကောင်စီတပ်တို့အကြား ယခုရက်ပိုင်းအတွင်း တိုက်ပွဲပြန်လည်ဖြစ်ပွားနေကြောင်း စုံစမ်းသိရသည်။

ဟိုပုံးမြို့နယ် မဲနယ်တောင်ဒေသ စံဖူးကျေးရွာတွင် ဖြစ်ပွားခဲ့သည့် ပအိုဝ်းအမျိုးသားလွတ်မြောက်ရေး တပ်မတော် PNLA ၏ ယာဉ်ကြောင်းကို စစ်ကောင်စီနှင့် ပြည်သူ့စစ် PNO အဖွဲ့က ပိတ်ဆန့်ဟန့်တား ခြင်းကြောင့် ဇန်နဝါရီလ ၂၁ ရက်တွင် တိုက်ပွဲဖြစ်ပွားခဲ့ပြီးနောက် နှစ်ဖက်တပ်ဖွဲ့ စစ်ရေးတင်းမာနေခြင်း ဖြစ်သည်။

“အခုရက်ပိုင်း တိုက်ပွဲပြန်ဖြစ်နေတာ။ ပဆျားကြိုး (ပဆျားကလိုး) ဘက်မှာ လေယာဉ်နဲ့ကော ဗုံးလာကြဲ သေးတယ်။ အခုကျောက္ကဆျားရွာမှာလည်း တိုက်ပွဲဖြစ်နေတယ်။ နှစ်ရက်လောက်ရှိပြီ သူတို့လက်နက်ကြီးတွေနဲ့ ပစ်နေတာ။ ညည သန်းခေါင်ကျော်ဆိုအသံအကျယ်ကြီးပဲကြားရတယ်” ဟု ဟိုပုံးမြို့နယ် ဒေသခံတစ်ဦးက ပြောသည်။

ယမန်နေ့ (ဖော်ဖော်ဝါရီ ၁၅ ရက်) နံနက်ပိုင်းတွင် မဲနယ်တောင်ဒေသ ကျောက္ကဆျားရွာမှာ တိုက်ပွဲဖြစ်ပြီး ဒရုန်းဖြင့် ဗုံးကြဲတိုက်ခိုက်သောကြောင့် ရွာခံအမျိုးသား ၁ ဦးသေဆုံးပြီး ၃ ဦး ထိခိုက်ဒဏ်ရာရရှိခဲ့ကြောင်း သိရသည်။

အလားတူ (ဖေဖော်ဝါရီလ ၁၄ ရက်)တွင် မဲနယ်တောင်ဒေသ ပဆျားကြိုး (ပဆျားကလိုး) ကျေးရွာသို့ စစ်ကောင်စီ လေကြောင့်ဖြင့်တိုက်ခိုက်မှုကြောင့် ပြည်သူ ၂ ဦးသေဆုံးပြီး ၈ ဦးဒဏ်ရာရရှိသကဲ့သို့ နောင်စုံရွာ ဘုန်းကြီးကျောင်းမှ ဘုန်းကြီးတစ်ပါးလည်း စစ်ကောင်စီ၏ လေကြောင်းတိုက်ခိုက်မှုကြောင့် ဒဏ်ရာရှိခဲ့သည်။

လက်ရှိတွင် ဟိုပုံးမြို့ပေါ်သို့ စစ်ကောင်စီ လူအင်အားထပ်မံ ဖြည့်တင်းနေလျက်ရှိပြီး လုံခြုံရေးအတွက် စစ်ဆေးရေးဂိတ်များ ပိုမိုချခင်းလာနေကြောင်း ဟိုပုံးမြို့ဒေသခံတစ်ဦးက ပြောသည်။

“ဟိုပုံး-ကျောက္ကဆျားဆိုတာကတော့ ဟိုပုံးဘက်ကိုလမ်းသာတယ်လေ။ အဲ့တော့ကျနော်တို့ဟိုပုံးကို ခြိမ်းခြောက်လာနိုင်တဲ့ အခြေအနေရှိတယ်။ ကျနော်ဒီနေ့ဟိုပုံးသွားတာတော့ လမ်းမှာသူတို့လုံခြုံရေး ချထားတာ ပိုပိုထက်တွေ့လာတယ်။ တကြော့ပြန်တိုက်ပွဲဖြစ်တဲ့ ပုံစံမျိုးတော့ ဖြစ်လာတယ်” ဟု ဟိုပုံးမြို့နယ်ခရီးသွားလာသူ ဒေသခံတစ်ဦးက ပြောသည်။

ယင်းတိုက်ပွဲများကြောင့် မဲနယ်တောင်ဒေသအတွင်း ကျေးရွာများမှ ဒေသခံများအား အားထွက်ပြေးတိမ်း ရှောင်ရနေရပြီး တချို့မှာတိုက်ပွဲကြောင့် ထွက်ပြေးတိမ်းရှောင်၍မရကာပိတ်မိနေကြောင်း သိရသည်။

ထို့အပြင် ဟိုပုံးမြို့ရှိ ဒေသခံတစ်ဦးကလည်း မြို့ပေါ်သို့ တိုက်ပွဲဖြစ်ပွားလာမည်ကိုစိုးရိမ်၍ ကြိုတင်ထွက်ပြေး တိမ်းရှောင်နေရသည်ဟု သျှမ်းသံတော်ဆင့်ကို ပြောသည်။

“အခုပြေးနေရတဲ့ ရွာတွေအများကြီးပဲ။ လွိုင်ကော်ကနေလာတဲ့သူတွေကော၊ ဆီဆိုင်ဘက်က လာတဲ့သူတွေ ဟိုပုံးမြို့မှာ ရောက်နေတာ။ တချို့ဆွေမျိုးအိမ်တွေမှာလိုက်နေတယ်။ တချို့တော့နမ့်ခုတ်ဘက်ကို ပြေးသွား တယ်။ အခုရုန်းရင်းဆန်ခတ် ဖြစ်ကုန်တာ။ သူတို့သာ တိုက်တာတိုက်နေကြတာဘာမှမထူးဘူး။ ကျနော်တို့တွေဘဲ ပြေးနေရတယ်” ဟု ဟိုပုံးမြို့ဒေသခံ အမျိုးသားတစ်ဦးက ပြောသည်။

သျှမ်းတောင်တိုက်ပွဲသည် ဟိုပုံးမြို့နယ် စံဖူးရွာတွင် ဖြစ်ပွားခဲ့သည့် PNLA ၏ ယာဉ်ကြောင်းကို စစ်ကောင်စီနှင့် ပြည်သူ့စစ်အဖွဲ့ PNO တို့ပိတ်ဆို့ဟန့်တားရာမှာ စတင်ဖြစ်ပွားခဲ့ပြီး လက်ရှိမှာ ဆီဆိုင်မြို့-ဆိုက်ခေါက်-ဘန်းယဉ်-ဟိုပုံး အထိ တိုက်ပွဲကူးစက်သွားသည်။